မတ်မလီု၊ မေ ၁
ပ္ဍဲတွဵုရးမန် အပ္ဍဲအရာအလဵုအသဳပၞာန် မကဵုအခေါၚ်ဗၠးဒုဟ်ဒဏ် ယှအ်ဖျေံဒုဟ်ဒဏ်တံဂှ် ကောန်ထံၚ်ပရေၚ်ဍုၚ်ကွာန် မဒးဒုၚ်ဖျေံလဝ် ထံၚ် နကဵုၝောံပိုဒ်ပရေၚ်ဍုၚ်ကွာန်နာနာတံ ဟွံပါလုပ်ပုဟ် ညးကြပ်ကဵုဗွိုၚ်ထံၚ်တံ ဟီုကဵု ဌာန်ပရိုၚ်သြၚ်လောန်တိုၚ်မ် ရ။
နကဵုအလဵုအသဳပၞာန်သီအဝဵုဝွံ သွက်ဂွံစၟတ်သမ္တီ သ္ပပူဇဴတ္ၚဲဗုဒ္ဓ ကျာ်ကတဵုဒှ် ဂိတုပသာ်ပေၚ် ပ္ဍဲဂိတုအေဗရာ ၃၀ တုဲ၊ ပ္ဍဲထံၚ်၊ ထံၚ်အချုက် ကေုာံ ဗ္ဒိုပ်ကောန်ထံၚ်နာနာ အလုံမွဲဍုၚ်တံဂှ် ကောန်ထံၚ်တြုံဗြဴ ၁၅၀၈ တၠတံဂှ် ကဵုလဝ်အခေါၚ်ဗၠးဒုဟ်ဒဏ်ရ။
အပ္ဍဲဂှ်တှ်ေ နူတွဵုရးမန် ပ္ဍဲကဵုထံၚ်၊ ထံၚ်အချုက် ကေုာံ ဗ္ဒိုပ်ထံၚ် ၁၀ ဒၞာဲတံဂှ် ကောန်ထံၚ် ၉၂ တၠရ ဗၠးတိတ်ကၠုၚ်လဝ် မဒှ်ရ။
ကောန်ထံၚ် မဗၠးတိတ်ကၠုၚ်တံဂှ် လ္ၚဵုကြပ်စိုပ်မံၚ်အခိၚ်ဗၠးဂှ်ကီု ရဲကမၠောန်ပိုန်ဒြပ် ဒးဒုၚ်ရပ်လဝ်တံသၟး ပါလုပ်မံၚ်ရဂှ် ညးကြပ်ကဵု ဗွိုၚ်ထံၚ်တံ ဟီုကဵု ဌာန်ပရိုၚ်သြၚ်လောန်တိုၚ်မ် ရ။
ညးဒးဒုၚ်ထံၚ် ဂွံအခေါၚ်ဗၠးဒုဟ်ဒဏ်တံဏံ ယဝ်ရ ထပ်ကၠောန်ဗၠေတ်သၞောဝ် မွဲဝါပၠန်မ္ဂး ပါဲနူဒုဟ်ဒဏ်ဂှ်တုဲ ဒုဟ်ဒဏ် မသှ်ေမံၚ်လၟုဟ်ဂှ်လေဝ် ဒးဆက်ဒုၚ်အာထံၚ်ပၠန်ရောၚ် နကဵုတၚ်ဒုၚ်ဝန် ကဵုလဝ်အခေါၚ်ဗၠးဒုဟ်ဒဏ်ဏံဂှ်ရောၚ်။
အပ္ဍဲတ္ၚဲအတးတိုန် လောန်ကၠုၚ် ပ္ဍဲဂိတုအေဗရာ ၁၇ တေံလေဝ် ပ္ဍဲထံၚ်ဂမၠိုၚ် နွံမံၚ်မွဲအလုံဍုၚ်တံဂှ် ကောန်ထံၚ် ၄၃၃၅ တၠတံဂှ် အလဵုအသဳပၞာန်သီအဝဵု ကဵုလဝ်အခေါၚ်ဗၠးဒုဟ်ဒဏ်ကီုရ။
ပရိုၚ် – သြၚ်လောန်တိုၚ်မ်
Photo -CJ