ဗေကျေန်၊ မေ ၁
အတိုၚ်ဥပဒေတၟိ လမျီုစလုပ် ပ္ဍဲဂိတုမေ ၁ မ္ဂး ပ္ဍဲဍုၚ်ဗေကျေန် ဍုၚ်ကြုက် ပရေၚ်သွံရာန်ဒရုၚ်ဂှ် ကၟာတ်ထောံတုဲ ယဝ်ရသုၚ်စောဲမ္ဂး ဒးအာတ်အခေါၚ် မဒှ်ရ။
သွက်ဂွံသွံ၊ သွက်ဂွံကဵုလိၚ် ဟွံသေၚ်မ္ဂး သွက်ဂွံရာန်ကေတ် ဒရုၚ် ကေုာံ ကပေါတ်ဆက်စပ်အဓိကတံဂှ် ပ္ဍဲဍုၚ်ဇၞော်ကြုက်ဂှ် ဒၞာတာကၟာတ်အာရောၚ်။
သွက်တၠဒရုၚ်တံမ္ဂး ဒရုၚ်ညးတံဂှ် ဒးအာပတိုန် ပၠုပ်လဝ်စရၚ် ပ္ဍဲကဵုဌာနဗၠာဲသၟိၚ်ရောၚ်။
ပ္ဍဲဍုၚ်ကြုက် ပ္ဍဲသၞာံခြာဟွံလံ မလောန်ကၠုၚ်ဏံ ဥပဒေဆေၚ်စပ်ကဵုဒရုၚ်တံဂှ် စရပ်စပ်ပတေၚ်ကၠုၚ်လဝ် သိုက်က်တုဲ ဟိုတ်နူဒှ်ဒွိၚ်ကဵု ဘဲအန္တရာဲညးဍုၚ်ကွာန်တံတုဲ ရပ်စပ်ကၠောန်အာအတိုၚ်ဏံရောၚ် ညးနွံတာလျိုၚ်တံ ဟီုလဝ်ရ။
ဒရုၚ် ကေုာံ တက္ကသဳပဝ်ကျာတံဝွံ ဒှ်ကွဳစက် အဓိကမဟာဗျူဟာ သွက်ဍုၚ်ကြုက် မစၟဳစလဝ် သြန်လုပ် ဒဝ်လာ ၂၉၀ ဗဳလဳယာန် ပ္ဍဲသၞာံ ၂၀၃၅ တေံတုဲ၊ ဒှ်ကဏ္ဍကမၠောန် မကော်ခဴစ ပရေၚ်ပိုန်ဒြပ်ပဝ်ယာန်သၟဝ် မဒှ်ရ။
ပ္ဍဲကၟိန်ဍုၚ်ကြုက် ဍုၚ်ဇၞော်လ္ၚဵုတံဂှ် ဒရုၚ်တံပဝ်မံၚ်ဂှ် ဂွံဆဵုမံၚ်လၟေၚ်ဓမ္မတာတုဲ၊ သုၚ်စောဲမံၚ် သွက်အရာပလံၚ်ဗစိုပ်စၞစ၊ ပရေၚ်တဵုလွဳ ကေုာံ အရာမသ္အးဇ္ၚးစမြိုၚ်ဒၞာဲတံရ။
ပ္ဍဲဗွဝ်ဖျာဒရုၚ်ဂၠးကဝ်ဂှ် ကာမ္မဏဳကြုက်တံ အုပ်ဓလီုမာန်ကီုလေဝ် ဒရုၚ်သွက်ဂွံပဝ် အပ္ဍဲဍုၚ်ကြုက်ဂှ် ဒှ်ဒၞာဲခက်ခုဲအိုတ်မွဲ ကတဵုဒှ်ကၠုၚ်မံၚ်ရ။
အခိၚ်ကၠာဟွံဂွံပၠုပ်ပတိတ် ဒရုၚ်တံ နူဍုၚ်ဗေကျေန်ဏီဂှ် ဒးပတိုန်စၟတ်စွံလဝ် စရၚ်ရောၚ်။
ယဝ်ရညးသုၚ်စောဲတံ သွက်ဂွံပဠေဝ်ဒရုၚ်ညးတံ ဒးပလံၚ်ဏာမ္ၚးဍုၚ်မ္ဂး အလဵုဇကု ညးတံဒးအာပလံၚ်တုဲ အလဵုဇကုညးတံဟေၚ် ဒးကလေၚ်ဒုၚ်တဲရောၚ်။
ပ္ဍဲဍုၚ်ဗေကျေန် သွက်အရာမပဝ်ဒရုၚ် မ္ၚးစမြိုၚ်ဒၞာဲသီုဖအိုတ်တံဂှ် ဒးကေတ်အခေါၚ်ကိုပ်ကၠာတုဲ ညးသုၚ်စောဲဒရုၚ်တံဝွံ ဒးတိုန်ဘာဗတောန်အန်လာၚ် သၟးဟွံက သီုဒးအံၚ်ဇၞး ပရေၚ်စၟဳစၟတ်ဆေၚ်စပ်ကဵု စေဝ်ပၞောန် ဥပဒေစကာသုၚ်စောဲဒရုၚ်တံကီုရောၚ်။
ဆဂး အရာတၚ်တၟေၚ်တံနွံမံၚ်တုဲ ရန်တၟအ်သွက်ဂွံဗတိုက်သရိုဟ် ပရေၚ်ပကီုပရာတ်တံ၊ သွက်ဂွံရီုဗၚ်ဘဲအန္တရာဲသဘာဝတံဂှ် ယဝ်ရညးနွံအဝဵုတံ ကဵုအခေါၚ်မ္ဂး ရာန်ပၠုပ်အပ္ဍဲဍုၚ်တုဲ စွံလဝ်ဂွံရ။
ဆဂး စနူသၞာံမလောန်ကၠုၚ်တံဏံ အလဵုအသဳကြုက်ဝွံ ဥပဒေဆေၚ်စပ်ကဵုသုၚ်စောဲဒရုၚ်အပ္ဍဲဍုၚ်တံဂှ် စပတေၚ်ဓရတ်ကၠုၚ်ရ။
ပ္ဍဲဗေကျေန် အရာတင်စၟတ်ပိုၚ်ခြာထိၚ်ဒဝ်ဒရုၚ်ဂှ် ပ္ဍဲဂိတုမာတ်တေံ သ္ပလဝ်ဒတန်ရ။
ပ္ဍဲအခိၚ်တေံ ညးပိုၚ်အဝဵုဍုၚ်ဇၞော်တံ သွက်ဂွံကလေၚ်ပလန်အာ တၚ်ကော်ဆော ပရေၚ်ဗၠးဘဲဗလးကျာ ပဝ်သၟဝ်တံဂှ်တှ်ေ အရာပရေၚ်အုပ်ဓုပ်စဳရေၚ်ဒရုၚ်တံဂှ် ဒးကၠောန်ဗိုန်ဗိုန်ဗတ်ဗတ်ရောၚ် ဟီုလဝ်ရ ။
ညံၚ်ဂွံဒှ်ဟလေၚ်ညဳညဳ အကြာပရေၚ်ဗၠးဘဲ၊ နဲကဲပညာ ကေုာံ ပရေၚ်ဇၞော်မောဝ်ပရေၚ်ပိုန်ဒြပ်တံဂှ် ရန်တၟအ်လဝ်ရောၚ် ညးတာလျိုၚ်အဆံၚ်သၠုၚ် ကောန်ဂရက်ညးဍုၚ်ကွာန် ဗဂဵုလဟဵုဍုၚ်ဗေကျေန် ယှံၚ်ကျေန်ဟွာ ဟီုရ။
ပ္ဍဲအခိၚ်ဥပဒေတၟိဏံ လမျီုစလုပ်ကၠုၚ်ဏံဂှ် ဆေၚ်သွံဒရုၚ် ပ္ဍဲဍုၚ်ဗေကျေန်တံဝွံ ကပေါတ်ညးတံဂှ် စပသောၚ်သအးမံၚ်အိုတ်ရောၚ် ဂွံတီကေတ်ရ။
Ref:BBC