နေပျဳဒဝ်၊ မေ ၁
အလဵုအသဳပၞာန်သီအဝဵု သွက်ဂွံဒက်ပ္တန် ကမ္မတဳစဳရေၚ်ဖန်ဖက် ပရေၚ်အုပ်ဓုပ် ခရိုၚ်ကဵု ပွိုၚ်ဍုၚ်မ္ဂး နကဵု ကောန်ဂကောံ ညးစၞးဒပ်ပၞာန်မွဲတၠ သွက်ဂွံပါလုပ်အာဂှ် နုက်ပတိတ်ထောံလဝ် မဒှ်ရ။
နကဵုတင်ပဠေဝ်ပဠေတ်စ စၞောန်ပ္ညုၚ်ဆေၚ်စပ်ကဵု ပရေၚ်အုပ်ဓုပ် ခရိုၚ်ကဵု ပွိုၚ်ဍုၚ် မပတိတ်လဝ် ပ္ဍဲဂိတုဂျူလာၚ် ၃၀ သၞာံ ၂၀၂၅ ပ္ဍဲလက်ထက်ကံၚ်သဳပၞာန်ဂှ် နူကဵုရုၚ်သမ္မတ အလဵုအသဳပၞာန် လလောၚ်လဝ် ပ္ဍဲဂိတုအေဗရာ ၂၉ ဂှ်ရ။
အတိုၚ်စၞောန်ပ္ညုၚ် မပဠေဝ်ပဠေတ်လဝ်ဏံ သွက်ဂွံထမံက်အာ ရုပ်ရဴကမၠောန် ပရေၚ်အုပ်ဓုပ်ခရိုၚ်မ္ဂး နကဵု အလဵုအသဳရးဒေသ ဟွံသေၚ်မ္ဂး တွဵုရး၊ သွက်ဂွံဒက်ပ္တန်အာ ကမ္မတဳစဳရေၚ်ကဵု ပရေၚ်အုပ်ဓုပ်ခရိုၚ် နူကဵုကံၚ်သဳနေပျဳဒဝ်မ္ဂး ဂကောံအလဵုအသဳ ကၟိန်ဍုၚ်ဟေၚ် ဒးသ္ပကဵုဒတန် မဒှ်ရ။
အပ္ဍဲကမ္မတဳဏံမ္ဂး သ္ကိုပ်ပရေၚ်အုပ်ဓုပ်နာနာ ဌာနအုပ်ဓုပ်ခရိုၚ်ဂှ် ဒှ်ဥက္ကဌ၊ သ္ကိုပ်ဒပ်ဗၠာဲသၟိၚ်ခရိုၚ်ဂှ် ဒှ်ညးအုပ်ကာတုဲ ညးတာလျိုၚ် နူဌာနကိုန်အစဳဇန်၊ ရုၚ်သၟာဥပဒေခရိုၚ် ကေုာံ ဌာနလဝကတံဂှ် စုတ်ကဵုလဝ် နဒဒှ် ကောန်ဂကောံတံရ။
တုဲပၠန် ပူဂိုလ်မွဲတၠ သ္ကိုပ်ပရေၚ်အုပ်ဓုပ်ခရိုၚ် မကဵုတာလျိုၚ်ဂှ်လေဝ် ပါလုပ်အာ နဒဒှ်ကောန်ဂကောံရောၚ် ချူလဝ်နွံတုဲ၊ သွက်အရာဏံမ္ဂး ညးယိုက်ဝန်ဍုၚ် နူသွာၚ်ပၞာန်ဟာ ဟွံသေၚ်မ္ဂး သွာၚ်ညးဍုၚ်ကွာန် ဟာဂှ်တှ်ေ ဟွံဗၟံက်ထ္ၜးလဝ် သောဲသောဲဗြောဲဗြောဲဏီပုဟ်။
အတိုၚ်ပ္ဍဲစၞောန်ပ္ညုၚ် ကိုပ်ကၠာတေံမ္ဂး ပ္ဍဲကမ္မတဳဂှ် စုတ်လဝ် ညးစၞးဒပ်ပၞာန်မွဲတၠ နဒဒှ်ကောန်ဂကောံကီုလေဝ် အပ္ဍဲစၞောန်ပ္ညုၚ် ပဠေဝ်လဝ် အခိၚ်လၟုဟ်ဏံမ္ဂး နုက်ပလီုထောံလဝ်ရောၚ် ဂွံဆဵုကေတ်ရ။
တုပ်တဴညံၚ်ရဴသာ်ဂှ်ကီု ပ္ဍဲအဆံၚ်ပွိုၚ်ဍုၚ်လေဝ် သွက်ဂွံထမံက်အာ ရုပ်ရဴကမၠောန်ပရေၚ်အုပ်ဓုပ်ဂှ် ဒးဒက်ပ္တန်အာ ကမ္မတဳစီရေၚ် ပရေၚ်အုပ်ဓုပ် ပွိုၚ်ဍုၚ်တုဲ၊ ဥက္ကဌ၊ ညးအုပ်ကာ ကေုာံ ကောန်ဂကောံ တံဂှ်လေဝ် ဒးထပ်စုတ်ဗပေၚ်ကေတ် နူကဵုညးတာလျိုၚ်ဌာနနာနာ မၞုံအပ္ဍဲပွိုၚ်ဍုၚ်တံဂှ်ရောၚ်။
အပ္ဍဲတာလျိုၚ် ကမၠောန်ကမ္မတဳတံဂှ်တှ်ေ ပရေၚ်ညိၚ်ဝပ် ကေုာံ ပရေၚ်အုပ်လဒမ်သၞောဝ်ဓဝ် အပ္ဍဲခရိုၚ်ကဵု ပွိုၚ်ဍုၚ်၊ စပ်ကဵု ပရေၚ်ပညာဒေသန္တရ၊ ပရေၚ်ထတ်ယုက်၊ သွက်ဂွံဇၞော်မောဝ် ပရေၚ်ပရေၚ်ပိုန်ဒြပ်မၞိဟ်တံကီု၊ ပရေၚ်ပြုပြေၚ်စဳရေၚ်တိဍာ် စတမ် ကဏ္ဍစုၚ်နာနာတံဂှ် ဒးပံၚ်တောဲကၠောန်အာ ကရောံဌာနအလဵုအသဳ ကေုာံ ဂကောံအလဵုအသဳ မဆေၚ်စပ်တံရောၚ်။
တုဲပၠန် ဆေၚ်စပ်ကဵုပရေၚ်ဂီုကၠီု၊ ပရေၚ်အုပ်လဒမ်သၞောဝ်ဓဝ် ကေုာံ ပရေၚ်ၜိုဟ်လလမ်သာယာဍုၚ်ကွာန် အပ္ဍဲခရိုၚ်ကဵု ပွိုၚ်ဍုၚ်တံဂှ် ယဝ်ရဌာနအလဵုအသဳ အာတ်မိက်နၚ်အရီုအဗၚ်မ္ဂး ဒးထံက်ပၚ်ရီုဗၚ်အာတုဲ ဒးပ္ညဳပ္ညပ်ကဵု ဒပ်ဗၠာဲသၟိၚ်ကီု သီုဂကောံပရေၚ်ဂီုကၠီုညးဍုၚ်ကွာန် ကေုာံ ဂကောံဗတိုက်ပလီုပကီုပရာတ်တံရောၚ်ဂှ် ချူဗၟံက်ထ္ၜးလဝ် ပ္ဍဲတၚ်စၞောန်ပ္ညုၚ်ဂှ်ရ။
ပရိုၚ် – သြၚ်လောန်တိုၚ်မ်
Photo – MOI