ရေဝ်၊ ဂိတုမေ ၁
ပ္ဍဲတွဵုရးမန် ပွိုၚ်ဍုၚ်ရေဝ် ကရပ်ကွာန်အံၚ်သာယာဂှ် ဒပ်ကဝ်မယှေန်ပၞာန် ထပက်မံၚ်ကရောၚ်ပၞာန်တံ ဒးမာၚ်တုဲ ချိုတ်အာလဝ် ၄ တၠဂှ် ညးတာလျိုၚ် ဂကောံစဵုဒၞာညးဍုၚ်ကွာန်ရေဝ် YPDF ဗိုလ်ယျာန်နိုင် ဟီုကဵု ဌာန်ပရိုၚ်သြၚ်လောန်တိုၚ်မ် ရ။ ပ္ဍဲဂိတုအေဗရာ ၂၈ ၜိုတ်အခိၚ်နူဂယး ၁၁ နာဍဳပြၚ်ၚ်ဂှ် ကရောၚ်ပၞာန် ဒပ်ကဝ်မယှေန်ပၞာန် ထပက်လုပ်ကၠုၚ် ပ္ဍဲဂြိုပ်လ္ပာ်သၠုၚ်ကျာ ကွာန်အံၚ်သာယာဂှ် နူကဵုဂကောံပၠန်ဂတးတံ သုၚ်စောဲမာၚ် ပဒေတာတုဲ တံၚ်ဗတိုက်လဝ်ရောၚ်။
အပ္ဍဲအရာပန်ဗတိုက်လဝ်ဏံဂှ် ကောန်ဒပ်ကဝ်မယှေန်ပၞာန် ၄ တၠ ချိုတ်အာ ပ္ဍဲဒၞာဲဂှ်တုဲ ရဲဒးဝပ်လေဝ် နွံမံၚ်ဗွဲမဂၠိုၚ်ရောၚ် သ္ဂးရ။
ကြဴနူဒးဒုၚ် တံၚ်မာၚ်ဗတိုက်လဝ်တုဲ ကောန်ပၞာန်ချိုတ် ဒးလဝ်ဝပ် တံဂှ် နူကဵုဒပ်ကဝ်မယှေန်ပၞာန် ကလေၚ်ပလံၚ်ထောံစးပၞာန်တုဲ စဵုကဵုစိုပ် အခိၚ်နူဂယး ဂိတုအေဗရာ ၃၀ ဂှ် ဆက်နွံတန်တဴမံၚ် ပ္ဍဲပွဳဗွိုၚ် ကွာန်အံၚ်သာယာဖိုဟ် မဒှ်ရ။
ပ္ဍဲပွဳဗွိုၚ် ကွာန်အံၚ်သာယာ ဂကောံပၠန်ဂတးတံ ဖျေံလဝ်သ္ဇိုၚ်ဂှ် နူကဵုဒပ်ကဝ်မယှေန်ပၞာန် ထပက်မံၚ်ကရောၚ်ပၞာန်တုဲ ပေါဲဗတိုက် အကြာၜါလ္ပာ် မွဲဏှမွဲဏှ ကတဵုဒှ်မံၚ်ရောၚ်။
ကရောၚ်ပၞာန်ဒပ်ကဝ်မယှေန်ပၞာန် လၟုဟ်ဏံဂှ် နူတမ်ဒပ်ပၞာန် ခလရ ၁၀၆ ဖျေံလဝ်သ္ဇိုၚ် ပ္ဍဲကွာန်တၟံကၞေၚ် ပွိုၚ်ဍုၚ်ရေဝ်တုဲ ကောန်သ္ဂံၚ် ယိုက်ဝန်ပၞာန်ညးဍုၚ်ကွာန် ဇြဟတ် ၁၀၀ ပြၚ်တံ ပါလုပ်မံၚ် ပ္ဍဲကရောၚ်ပၞာန်ဏံ ဂၠိုၚ်အိုတ်ရောၚ် ဂွံတီကေတ်ရ။
အပ္ဍဲဂိတုမာတ် ၉ စဵုကဵုစိုပ် ၂၀ တေံလေဝ် နူကဵုဒပ်ကဝ်မယှေန်ပၞာန် ထပက်ကၠုၚ်ကရောၚ်ပၞာန် ပ္ဍဲပွဳဗွိုၚ်ကွာန်အံၚ်တပျေ ကေုာံ ကွာန်ကုန်ကျာ်တုဲ ပေါဲဗတိုက်တံ ဆက်ကတဵုဒှ်ကၠုၚ်ဂှ်တှ်ေ ပရေၚ်ချိုတ်ဒးဝပ် သီုၜါလ္ပာ်လေဝ် နွံမံၚ်ကီုရ။
ပရိုၚ် – သြၚ်လောန်တိုင်မ်
Photo – Social Media