ဝါယှေန်တာန်၊ ဨပရဴ ၃၀
သွက်ဂွံဘိုၚ်ဗ္တိုက်ကဵု လ္ပာ်ရုယှာ မဗ္တိုက်ၜက်ၜေတ်ဒၟံၚ်ယူကရုၚ်ဂှ်တုဲ ကိုဝ်ရဳယျာသၟဝ်ကျာ ဗလးဏာလဝ်ကောန်ဒပ်ဂမၠိုၚ်ဂှ်ဝွံ ညံၚ်ဂွံဒေါအ်ကၠေံဂှ် အမေရိကာန် ဖ္တိုက်ဖ္အောဝ်လဝ်ရ။
ပ္ဍဲအရာကလေၚ်သီကေတ် ဒေသကာသ် နူဒပ်ယူကရုၚ်တံ မသီဂွံလဝ်ဂှ် သၞာဲဒဴလ္ပာ်ပၞာန်ရုယှာမွဲတၠ ဟီုပ္တိုန်ထိုၚ်သးလဝ် ကုအစောံစရာဲကောန်ဒပ်ကိုဝ်ရဳယျာသၟဝ်ကျာရ။
ကောန်ပၞာန်ကိုဝ်ရဳယျာသၟဝ်ကျာ လုပ်ဒၟံၚ်ပေါဲဗ္တိုက် ကရောံဒပ်ရုယှာတံဂှ်ဝွံ ဒှ်သရာဲသဂံၚ်ဂမၠိုၚ်ရောၚ် ဌာန်ပရိုၚ်ကၟိန်ဍုၚ်ပိုၚ် ကိုဝ်ရဳယျာသၟဝ်ကျာ ထ္မံက်ထ္ၜးလဝ်တုဲ ဒဒှ်ရဗလးဏာလဝ်ကောန်ဒပ်ဂမၠိုၚ် ဍုၚ်ရုယှာဂှ် သ္ပဒတန်ကၠုၚ်လဝ် အလန်ပထမကၠာအိုတ်ရ။
ဒဒှ်မကိုဝ်ရဳယျာသၟဝ်ကျာ မပါလုပ်ဒၟံၚ်တိုက်ရိုက် အပ္ဍဲပေါဲပၞာန်ရုယှာ−ယူကရုၚ်ဂှ် ဒးပတုဲကၠေံဏောၚ် ထ္မံက်ထ္ၜးလဝ် ပ္ဍဲအဳမေဝ်ဌာနဝန်ဇၞော်ကာဍုၚ်သ္အာၚ်အမေရိကာန် မပလံၚ်ဗစိုပ်လဝ် ပ္ဍဲဂိတုဨပရဴ ၂၈ တေံရ။
နကဵုဍုၚ်တတိယ မပါလုပ်ဒၟံၚ်တိုက်ရိုက် အပ္ဍဲပေါဲပၞာန်ရုယှာ−ယူကရုၚ် ညံၚ်ရဴကိုဝ်ရဳယျာသၟဝ်ကျာဂှ် ဒးနွံကဵု ပရေၚ်ကေတ်လျိုၚ်တံဏောၚ်ဂှ် ထ္မံက်ထ္ၜးလဝ် ပ္ဍဲအဳမေဝ်ဂှ်ရ။
ကောန်ပၞာန်ကိုဝ်ရဳယျာသၟဝ်ကျာဂမၠိုၚ်ဝွံ လုပ်ဒၟံၚ်ပေါဲဗ္တိုက် သွက်ပရေၚ်ဗဗွဲဓဝ်ဏောၚ်တုဲ ညးတံဝွံ ဒှ်ညးစၞး မသၠုၚ်ပ္တိုန်ကဵုစရာဲ ဍုၚ်မိတိမဏောၚ်ဂှ် ဌာန်ပရိုၚ်ကၟိန်ဍုၚ်ပိုၚ် ကိုဝ်ရဳယျာသၟဝ်ကျာ ထ္မံက်ထ္ၜးလဝ်ရ။
ပ္ဍဲကဵုကောန်ဒပ် ၁၁၀၀၀ တၠ နူကဵုကိုဝ်ရဳယျာသၟဝ်ကျာ ဖျေံကဵုလဝ် သွက်ဂွံရီုဗၚ်ကဵုရုယှာဂှ် ဂၠိုၚ်ကဵုလ္ၚီ ဒးချိုတ်အာလဝ်ရောၚ် ထံၚ်ပရိုၚ်ဗျိတိၚ်ဂမၠိုၚ် ဟီုလဝ်ရ။
ကုကောန်ပၞာန်ကိုဝ်ရဳယျာသၟဝ်ကျာ အဟိန်ဘိုၚ်ဗ္တိုက်ကဵုလ္ပာ်ရုယှာတုဲ မ္ဒးပြဟ်လလုဲအာတံဂှ် ပ္တိုန်အာဂုန်စရာဲ ကဆံၚ်ကၟိန်ဍုၚ်ဏောၚ်ဂှ် ကေန်ဂျုၚ်အာန် က္ဍိုပ်သ္ကိုပ်ကိုဝ်ရဳယျာသၟဝ်ကျာ ဟီုလဝ်ရ။
Ref: Independent