ဘာပန်၊ မေ ၁၈
ဒပ်ပံၚ်ကောံပၠန်ဂတး သၟဝ်သ္ကိုပ်သ္က KNLA ပန်ပှော်ဗ္တိုက်ဒၟံၚ် ဗ္ဒိုပ်ဒပ်ကံၚ်ဇြဳပၞာန် ဗ္ဒိုပ်(လယ်မူပလော) နွံပ္ဍဲပွိုၚ်ဍုၚ်ဘာပန် တွဵုရးကရေၚ်ဂှ်တုဲ သီုကဵုဗိုၚ်ကၟာတ်လဒဵုလဝ် ဗ္ဒိုပ်ဂှ်ရောၚ် သ္ကိုပ်ဗိုလ်ဇၞော် သဝ်ကလာဒိုဝ် ညးမၞုံအခေါၚ်ဟီုဂး ဒပ်မဟာ ၅ KNU ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကောန်ဒပ်ဒရုၚ် FFD ကဵု ကောန်တန်ဗ္တောန်ဒရုၚ် KNLA တံ ဗ္တိုက်ဒၟံၚ် ဗ္ဒိုပ်ဒပ်ကံၚ်ဇြဳပၞာန် ဗ္ဒိုပ်ဒပ် ဓဝ်မုပလေအ်မေဝ် (လယ်မူပလော) မၞုံအပ္ဍဲတိဍာ်ဒပ်မဟာ ၅ KNU ဂှ် ပ္ဍဲဂိတုမေ ၁၄ တေံ Force for Federal Democracy-FFD လေဝ် လလောၚ်ပ္တိတ်လဝ်ပရိုၚ်ရ။
ဗ္ဒိုပ်(လယ်မူပလော) ဝွံ ဒှ်ဗ္ဒိုပ်နွံသ္ကုတ်သၟဝ်ကျာ ဍုၚ်ဘာပန်မွဲတုဲ ဒၞါဲလုပ်တိတ်အာကၠုၚ်ဗ္ဒိုပ်ဏံသီုဖအိုတ်ဂှ် ဒပ်ပံၚ်ကောံပၠန်ဂတး သၟဝ်သ္ကိုပ်သ္က ဒပ်မဟာ ၅ ဒပ်ပၞာန်ဗၠးၜးကောန်ဂကူကရေၚ် KNLA ဗိုၚ်ကၟာတ်လဒဵုလဝ်ရောၚ် သ္ကိုပ်ဗိုလ်ဇၞော် သဝ်ကလာဒိုဝ် သ္ဂးရ။
ဒပ်ပံၚ်ကောံပၠန်ဂတး ဒပ်မဟာ ၅ KNLA ဂှ် ပန်ဒၟံၚ်ဗ္ဒိုပ်ဒပ်(လယ်မူပလော) နကဵုလွဟ်ဇၞော်၊ သနာ်ပါတံတုဲ လ္ပာ်ဒပ်ကံၚ်ဇြဳပၞာန်လေဝ် ကလေၚ်ပန်ဒၟံၚ် နူကဵုဗ္ဒိုပ်ညးတံရ။
ပန်ဒၟံၚ်ဗ္ဒိုပ်ဏံ နကဵုလွဟ်ဇၞော်၊ သနာ်ပါသၟးရတုဲ တိုန်စိုပ်ဗ္တိုက် လ္တူဗ္ဒိုပ်ဂှ် ဟွံမွဲဏီတုဲ ပရေၚ်ဇီုကပိုက်ချိုတ် ကလိဂွံဝပ်တံလေဝ် ဟွံမွဲဏီပုဟ်ဂှ် သ္ကိုပ်ဗိုလ်ဇၞော် သဝ်ကလာဒိုဝ် သ္ဂးလဝ်ရ။
ပ္ဍဲတိဍာ်ဒပ်မဟာ ၅ ခရိုၚ်ဘာပန် KNU ဂှ် အကြာဒပ်ကံၚ်ဇြဳပၞာန်ကဵု ဒပ်ပၞာန်ဗၠးၜးကောန်ဂကူကရေၚ် KNLA တံ ပြဟ်ဟ်ဏံ ဒှ်ဒၟံၚ်ပေါဲဗ္တိုက်ၜါလ္ပာ် ဇၞော်ကဵုဇြဟတ် ဟွံမွဲကီုလေဝ် လ္ပာ်ဒပ်ပံၚ်ကောံတံ ကၟာတ်လဒဵုလဝ် ဗ္ဒိုပ်ဒပ်ပၞာန် လ္ပာ်ဘာပန်ဂှ်ရ။
သ္အာၚ်နူဂှ်ပၠန် ဒပ်ကံၚ်ဇြဳပၞာန် ကၠုၚ်စိုပ်ထောံဂြာတ်လဝ်မခတိုဟ် နကဵုက္ၜၚ်ကျာ ပ္ဍဲတိဍာ်ဒပ်မဟာ ၅ ခရိုၚ်ဘာပန်ဂှ်တုဲ နူကဵုကမမံၚ် လ္ပာ်သ္ကုတ်သၟဝ်ဘာပန်ဂှ် ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်ကီုလေဝ် ဒဵုကဵုအခိၚ်လၟုဟ် ဟွံဂွံစိုပ်ကၠုၚ် လ္ပာ်ကတိုၚ်တိဏီတုဲ ချဳဒရာၚ်ဒၟံၚ်ပရေၚ်ပၞာန် ဗ္ဒါဲကမမံၚ်သၟးရဂှ် ဂွံတီကေတ်ရ။
အကြာဒပ်ပံၚ်ကောံပၠန်ဂတး ဒပ်မဟာ ၅ KNLA ကဵု ကရောၚ်ပၞာန်ဒပ်ကံၚ်ဇြဳပၞာန် ထ္ပက်ကၠုၚ်ဒၟံၚ်ကရောၚ်ပၞာန် နူကဵုကမမံၚ် သွက်ဂွံကဵုပၞာန်အရီု လ္ပာ်ကတိုၚ်တိဂှ် ဒှ်ဒၟံၚ်ပေါဲဗ္တိုက်ဆေၚ်မုက် အရိုဟ်တ္ၚဲရ။
ပရိုၚ်−သြၚ်လောန်တိုၚ်(မ်)
ဗီုရုပ်− Force for Federal Democracy-FFD