မတ်မလီု၊ မေ ၂၀
ပ္ဍဲတွဵုရးဍုၚ်မန် ယဲဇွဟ်ရာသဳ ဒှ်ဂၠိုၚ်ဒၟံၚ်တုဲ အရာမသ္ကာတ်မြဟ်ကၠုၚ်တံ နွံကၠုၚ်ဂှ်ရ နကဵုညးဍုၚ်ကွာန်ဂမၠိုၚ် သ္ပသတိဗွဲတၟေၚ်တုဲ မံၚ်စံၚ်အိုတ်ညိဂှ် အ္စာသဝ်ဝန်ဂမၠိုၚ် ဖ္တိုက်ဖ္အောဝ်ကၠုၚ်ရ။
အခိၚ်လၟုဟ်ဝွံ ကညၚ်အိုတ်တုဲ စလုပ်ရာသဳကသီုဂှ်ရ အပ္ဍဲတွဵုရးဍုၚ်မန် ပရေၚ်ဒှ်ကၠုၚ်ယဲဇွဟ် ဗက်ကဵုရာသဳတံ ဂၠိုၚ်တိုန်ကၠုၚ်ဒၟံၚ် သိုက်က်ရ။
ယဲဇွဟ် ဒှ်ဗက်ကဵုရာသဳဂှ်ဝွံ ဒှ်ဟိုတ်နူစၟယဲဗိုၚ်ရာသ်တုဲ ဍေံကၠောံထၞာန်နူကဵုဂၠံၚ်ယဝီုကျာမွဲကဆံၚ်ဂှ်ရ ဗွဲမလောဲသွာ ဍေံကၠောံမာန်တုဲ ကေတ်အခိၚ် ဗွဲတွဵုမအောန် နူ ၃ တ္ၚဲ စဵုကဵု မွဲသတ္တာဟရ။
အ္စာသဝ်ဝန်မွဲတၠဂှ်တှ်ေ ယဲဇွဟ် ဒှ်ကဵုရာသဳဏံဂှ်ဝွံ မွဲသၞာံမွဲအလန် သၠာဲကၠုၚ်ဗီုပြၚ်တုဲ ဒှ်ဂှ်ရ ယဝ်ဒှ်မွဲတၠမ္ဂး အတိုၚ်သ္ၚိမွဲ ကၠောံထၞာန်မာန်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ အခိၚ်လၟုဟ်ဂှ်တှ်ေ ယဲဇွဟ် ဒှ်ကဵုရာသဳဂှ် ဂၠိုၚ်အိုတ်ရ။ ဍေံဂှ် ဗိုၚ်ရာသ်မွဲဂကူကီု။ မွဲသၞာံမွဲဝါ လှဲာဗီုပြၚ်တုဲဒှ်ဂှ်ရ ယဝ်ဒှ်မွဲတၠတုဲမ္ဂး အလုံသ္ၚိမွဲ ဒးဒုၚ်ကၠောံမာန်ဏောၚ်” သာ်ဝွံ သ္ဂးရ။
သ္အာၚ်နူဂှ်ပၠန် ယဲဇွဟ်ရာသဳဂှ်တှ်ေ မ္ၚးနူကောန်ၚာ်သၟတ်တံဂှ် ပ္ဍဲမၞိဟ်ဇၞော်တအ်လေဝ် ဒှ်ဂၠိုၚ်ဒၟံၚ်ဂှ် ဂွံဆဵုကေတ်တုဲ နကဵုညးလ္ၚဵုတံဂှ်တှ်ေ အဆက်ဖဵုယဲဇွဟ်ဂှ် ဒှ်ကၠုၚ်သီုကဵုဂၞဴလီုဂၞဴအာဂှ် ဂွံဆဵုကေတ်ကီုလေဝ် ဒးဂွိၚ်ကဵု အန္တရာယ်လမျီုဂှ် ဟွံမွဲဏီပုဟ်ဂှ် ညးဆက်ဟီုရ။
အ္စာသဝ်ဝန်မွဲတၠပၠန်ဂှ်လေဝ် ယဲဇွဟ်ဝွံ မွဲသၞာံတုဲမွဲသၞာံ သ္ကာတ်မြဟ်ကၠုၚ်ဂှ်ရ လှာဲဗီုပြၚ်တုဲ ဒးလွဳဒၟံၚ်တုဲ ဒှ်ဟိုတ်နူစၟယဲဗိုၚ်ရာသ် လှာဲကၠုၚ်လွေဟ်တံဂှ်တုဲ ကဵုဂဥုဲခိုဟ်ဟ်တံဂှ်လေဝ် ၜိုတ်ညိညတှ်ေ ဂမ္တဴဟွံစှ်ေ ဒှ်ကၠုၚ်ရောၚ် ဟီုရ။
“ယဲဇွဟ် ဒှ်ကဵုရာသဳတံဂှ်တှ်ေ မွဲသၞာံကဵုမွဲသၞာံ သ္ကာတ်ကၠုၚ်ညိညဂှ် နွံ။ ရံၚ်အာကဵုပိုယ်တံ လွဳဒၟံၚ်ဂှ်မ္ဂး မွဲသၞာံကဵုမွဲသၞာံဂှ် ယဲဇွဟ်ဏံ ဍေံသ္ကာတ်ကၠုၚ်ဒၟံၚ်ညိ။ သ္ကာတ်ဟီုဂှ် ဂမ္တဴဟွံစှ်ေစကွေံ။ ဇကုဂမ္တဴဂှ် လွဳကဵုဂဥုဲ ပါရာသဳတမော မခိုဟ်ကွေံကွေံဂှ်လေဝ် ဟွံစှ်ေပုဟ်။ ဗီုပြၚ်တံဏံ နွံ” သာ်ဝွံ သ္ဂးရ။
သ္အာၚ်နူဂှ်ပၠန် ဟိုတ်နူယဲဇွဟ် ဒှ်ဗက်ကဵုရာသဳတံဏံဂှ်တုဲ လမျီုဒးအိုတ်အာဟွံမွဲကီုလေဝ် ယဲဇွဟ်ဝွံ ဇီုကပိုက်ကၠုၚ် သၞောတ်ဒုၚ်ဒဝ်စဵုဒၞါယဲမာန်တုဲ ညံၚ်ယဲတၞဟ်ဟ် လုပ်စိုပ်ကၠုၚ်ဟွံဂွံ သွက်ဂွံသ္ပဂရုဂှ် နွံပၟိက်ရောၚ် ညးဆက်ဟီုရ။
နကဵုညးဍုၚ်ကွာန်ဂမၠိုၚ် ယဝ်ဂိယဲကၠုၚ်မ္ဂး ဒးထ္ၜး ပ္ဍဲရုၚ်ဂဥုဲ မကြပ်တံဂှ်ဏောၚ်တုဲ ယဝ်ထ္ၜး ဗွဲမဂတာပ်အခိၚ်မှဟေၚ် ဂွံပါ်ပါဲတီကေတ် ယဲဇွဟ်ဒှ်ကဵုရာသဳ ကဵု ယဲပုၚ် မာန်တုဲ လွဳလွတ်ဗွဲမဂတာပ်အခိၚ်မာန်ဏောၚ် အ္စာသဝ်ဝန်ဂမၠိုၚ် ဖ္တိုက်ဖ္အောဝ်လဝ်ရ။
အပ္ဍဲဒေသဂှ်တှ်ေ ယဲဇွဟ်ဒှ်ကဵုရာသဳ ကေုာံ ယဲပုၚ်တံဂှ်ဝွံ ဒှ်ဒၟံၚ်ကၠိုဟ်သၞာံကီုလေဝ် အခိၚ်ကာလကသီုဂှ် ဒှ်ဂၠိုၚ်တုဲ ကောန်ၚာ်တံသၟးဟွံက စနူမၞိဟ်ဇၞော်ဇၞော်တံ စွံသတိတုဲသွက်ဂွံမံၚ်စံၚ်အိုတ်ဂှ် နွံပၟိက်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ