လိုၚ်ဗၠဲ၊ မေ ၂၁
ဗ္ဒိုပ်ဒပ်ကံၚ်ဇြဳပၞာန် ဗ္ဒိုပ်(မော်ဖိုးကေး) နွံကရပ်ကွာန်(ကျော်ကေထ) ပွိုၚ်ဍုၚ်လိုၚ်ဗၠဲ တွဵုရးကရေၚ် ပယျဵုသေံ−ဗၟာဂှ် ဒပ်ပံၚ်ကောံ ဒပ်မဟာ ၇ ဒပ်ပၞာန်ဗၠးၜးကောန်ဂကူကရေၚ် KNLA ဗ္တိုက်သီဂွံလဝ် မွဲချိုန်ဂှ် တမ်ရိုဟ်ပရိုၚ်ပယျဵုဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပၞောဝ်ကဵုဗ္ဒိုပ်(မော်ဖိုးကေ) ကဵု ဗ္ဒိုပ်(နော်တရာ) မဒှ်ဗ္ဒိုပ်ဒပ်ကံၚ်ဇြဳပၞာန် မသှ်ေဒၟံၚ် ကရပ်ပယျဵုသေံ ပွိုၚ်ဍုၚ်(ပိုၚ်ကျုံ) ဒပ်မဟာ ၇ KNU ဂှ် ပ္ဍဲဂိတုမေ စၟတ်တ္ၚဲ ၁၉ အခိၚ်လဒေါဝ်တ္ၚဲဂှ် ဒပ်မဟာ ၇ KNLA ကဵု ဒပ်စဵုဒၞါကောန်ဂကူကရေၚ် KNDO တံ စဗ္တိုက်လဝ် ဗ္ဒိုပ်(မော်ဖိုးကေ) နကဵုဒရုၚ်ရ။
စဗ္တိုက်လဝ် ပ္ဍဲဂိတုမေ စၟတ်တ္ၚဲ ၁၉ အခိၚ်လဒေါဝ်တ္ၚဲ ၁ နာဍဳ ၄၅ မိနေတ်တုဲ အခိၚ်ဇိုၚ်သဝ်တ္ၚဲ ၜိုတ် ၉ နာဍဳဂှ် ဒပ်ပံၚ်ကောံ ဒပ်မဟာ ၇ KNLA သီဂွံလဝ် အလုံဗ္ဒိုပ်မွဲတုဲ ကောန်ဒပ်ကံၚ်ဇြဳပၞာန်ဂမၠိုၚ်ဝွံ ထောံလသာဗ္ဒိုပ်တုဲ ဂြိပ်တိတ်ကၠုၚ် လ္ပာ်ဍုၚ်သေံ ပွိုၚ်ဍုၚ်ထသံက်ယာန် ကွာန်(မယ့်တန်) ရောၚ် တမ်ရိုဟ်ပရိုၚ်ပယျဵုဂမၠိုၚ် ထ္မံက်ထ္ၜးလဝ်ရ။
ပ္ဍဲပေါဲဗ္တိုက်သီဗ္ဒိုပ်(မော်ဖိုးကေ) ဂှ် ဒပ်ပံၚ်ကောံ ဒပ်မဟာ ၇ KNLA ကလိဂွံလဝ် မကမ်လွဟ်လက်နက်ပၞာန် နူဒပ်ကံၚ်ဇြဳပၞာန် ဗွဲမဂၠိုၚ်ဂၠေၚ်တုဲ ပ္ဍဲဂိတုမေ ၂၀ အခိၚ်လဒေါဝ်တ္ၚဲဂှ် စံၚ်ပလီုဏာလဝ် အလုံဗ္ဒိုပ်မွဲရောၚ် တမ်ရိုဟ်ပရိုၚ်ပယျဵုဂမၠိုၚ် သ္ဂးရ။
ဟိုတ်နူပေါဲဗ္တိုက်သီဗ္ဒိုပ်တုဲ ညးဍုၚ်ကွာန်ဒေသ ၂၀၀ ပြၚ် နူပွိုၚ်ဍုၚ်လိုၚ်ဗၠဲ ပါလုပ်သီုကွာန်(ကျော်ကေထ) သီုကဵုကွာန်ဗ္ဒါဲဗ္ဒါဲဂမၠိုၚ်ဂှ် ပါဲဂြိပ်ဘဲပၞာန် စိုပ်ကၠုၚ် အပ္ဍဲဍုၚ်သေံတုဲ ညးတာလျိုၚ်သေံဂမၠိုၚ် ရီုဗၚ်မၚ်မွဲကဵုလဝ်ရောၚ်ဂှ်လေဝ် တမ်ရိုဟ်ပရိုၚ်သေံဂမၠိုၚ် လလောၚ်ပ္တိတ်ကဵုလဝ်သမ္တီရ။
ဟိုတ်နူသီဂွံလဝ် ဗ္ဒိုပ်(မော်ဖိုးကေ) တုဲ လ္တူက္ဍဟ်ဒဵု(နော်တရာ) ပ္ဍဲပယျဵုသေံ ဗွဲဒိုဟ်ဗၟံက်ဒဵုဒဝ်ဏ ပွိုၚ်ဍုၚ်(ပိုၚ်ကျုံ) တိဍာ်ဒပ်မဟာ ၇ KNU ဂှ် ဗ္ဒိုပ်ဒပ်ကံၚ်ဇြဳပၞာန် သှ်ေမွဲဓဝ်ရတုဲ ဂွံဆက်သီကေတ် ဗ္ဒိုပ်ဏံမာန်ဂှ်လေဝ် ဆက်ထ္ပက်အာပၞာန်ဏောၚ် တမ်ရိုဟ်ပရိုၚ်ပရေၚ်ပၞာန်ဂမၠိုၚ် သ္ဂးရ။
ဒပ်ပံၚ်ကောံ ဒပ်မဟာ ၇ ဒပ်ပၞာန်ဗၠးၜးကောန်ဂကူကရေၚ် KNLA ဝွံ နူဂိတုမာတ် ၇ စဵုကဵုဂိတုမေ အပ္ဍဲပွိုၚ် ၃ ဂိတုဂှ် ဗ္တိုက်သီဂွံလဝ် ဗ္ဒိုပ်ဒပ်ကံၚ်ဇြဳပၞာန် နွံကရပ်ပယျဵု တိဍာ်ဒပ်မဟာ ၇ KNU မပ္တံကဵုဗ္ဒိုပ်မော်ဖားသူး၊ တာလယ်၊ တခေါဘီခီး၊ မယ်လ ကေုာံ ဗ္ဒိုပ်မော်ဖိုးကေ အပံၚ်ဖအိုတ် သီဂွံလဝ် ၇ ဗ္ဒိုပ်ရ။
ဒပ်ကံၚ်ဇြဳပၞာန်ဂှ်တှ်ေ နကဵုပၞာန်အရီုဗလးတိဂှ် ပလံၚ်ဗစိုပ်ကဵု ဇရေၚ်ဗ္ဒိုပ်ဒပ်ဒးဒုၚ်သီလဝ်ဂမၠိုၚ် ဟွံမာန်ရတုဲ ဒးသ္ပပဓာန်ဒၟံၚ်ကဵု ပရေၚ်ပန်ပှော်နူကဵုပၞာန်ကျာသၟးတုဲ အပ္ဍဲပွိုၚ် ၃ ဂိတုဂှ် ဒးဗလးလဝ်တဲ ဗ္ဒိုပ်ဒပ်နွံဒၟံၚ်ပ္ဍဲတိဍာ်ဒပ်မဟာ ၇ KNU ဂှ် ၇ ဗ္ဒိုပ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်− KNU