မတ်မလီု၊ မေ ၂၀
သွက်ဂွံကလေၚ်ဗ္တိုက်ကေတ် ပရေၚ်ဗၠးၜးမဒးဆောံလေၚ်ကၠုၚ်လဝ်၊ သွက်ဂွံကလေၚ်ဒက်ပ္တန်ဍုၚ်မန် မဍိုက်ပေၚ်ကဵုအခေါၚ်စၞောန်ပျးအပိုၚ်တံမာန်ဂှ် သွာၚ်ညးကဵုညး ဇၟာပ်ကောန်ဂကူမန် ဒးဗပေၚ်အာဇြဟတ်ဏောၚ် ဇြဟတ်ရာမညဖေဝ်ဒရာခေတ်တၟိ NRFF ဖ္တိုက်ဖ္အောဝ်လဝ်ရ။
ထ္မံက်ထ္ၜးလဝ် ပ္ဍဲတၚ်လလောၚ်တြးစၟတ်သမ္တီ တ္ၚဲဍုၚ်မန်ဟံသာဝတဳလီု ပေၚ် ၂၆၈ သၞာံ မဒးဆောံလေၚ်အာလဝ်အဝဵုစၟိန်ပြမာန်ဍုၚ်မန် ဟိုတ်နူသၟိၚ်ဗၟာအံၚ်ဇေယျ ပ္ဍဲကောဇာသက္ကရာဇ် ၁၁၁၉ သၞာံ၊ ဂိတုပသာ် ၉ စွေက်ဂှ်ရ။
ကုဂကောံဇြဟတ်ပၠန်ဂတး မလုပ်မံၚ်ပေါဲဗ္တိုက် သွက်ကံကုသိုလ်မန် မန်ဂွံဖန်ဖက်ကေတ်ဂှ် သၟတ်မန်အပ္ဍဲဍုၚ်ကီု သၟတ်မန်စိုပ်ဍုၚ်သ္အာၚ်တံကီု သွာၚ်ညးကုညး ၜိုတ်အစောံဇြဟတ်နွံ သွက်ဂွံဗပေၚ်အာဇြဟတ် မဒှ်ရ။
သ္အာၚ်နူဂှ်ပၠန် နကဵုဂကောံက္ဍိုက်ပ်ပရေၚ်ပၞာန် ပရေၚ်ဍုၚ်ကွာန်မန်ဂမၠိုၚ် ရန်ကဵုဒတုဲဖဵုညးဍုၚ်ကွာန်မန်တံတုဲ ညံၚ်ဂွံပ္တိတ်ဇြဟတ်ရေၚ်တၠုၚ်အာ သွက်အလဵုအသဳတွဵုရးမွဲ မဒုၚ်သ္ဇိုၚ်ကဵုဖေဝ်ဒရာ ဂွံမံက်ဂတဝ်ကၠုၚ်ဂှ်လေဝ် NRFF ဖ္တိုက်ဖ္အောဝ်လဝ်ရ။
ညံၚ်ညးဍုၚ်ကွာန်မန်တံ ဂွံစှ်ေစးအာ ကုကမၠောန်ကဵုအရီုဗၚ် ကေုာံ ပရေၚ်မပါလုပ် ပ္ဍဲပေါဲရုဲမာဲကံၚ်ဇြဳပၞာန် မဒစဵုဒစးဒၟံၚ်ကဵု အခေါၚ်ဖန်ဖက်ကေတ်ကံကုသိုလ်တံဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
မေန်တာန်လွေန် ညးဒုၚ်လျိုၚ် NRFF ဂှ် ဇရေၚ်တၠအဝဵုလဵုမွဲမှ အာတ်ကေတ် အခေါၚ်ဖန်ဖက် ကံကုသိုလ်ဇကု ဟွံဂွံဂှ်တုဲ စၞးဒးအောန်စိုတ် လ္တူဝၚ်ကလေၚ်ပလေဝ်ဟွံဂွံဂှ် စိုပ်အခိၚ်ဒးကလေၚ်ချူခၞံဝၚ်တၟိရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ ကြဴနူဍုၚ်မန်ဟံသာဝတဳလီုတုဲ ဒးဆောံလေၚ်အာလဝ် အခေါၚ် ကံကုသိုလ်ဇကု ဇကုဖန်ဖက်ကေတ်ဂှ်ရ။ ပ္ဍဲကာလပၠန်ဂတးသၞောတ်တၠအဝဵုပၞာန်ဏံ အခိၚ်ညးဍုၚ်ကွာန်အလုံဍုၚ်မွဲ ဗ္တိုက်ပၠန်ဂတးဒၟံၚ် ကုကံၚ်ဇြဳပၞာန်ဂှ် မန်တအ်လေဝ် ဒးလုပ်ပေါဲဗ္တိုက် သွက်အခေါၚ် ကံကုသိုလ်ဇကု ဇကုဖန်ဖက်ကေတ်ဂှ်ဏောၚ်။ ဇရေၚ်တၠအဝဵုလဵုမွဲမှ အာတ်ကေတ်အခေါၚ်ဗၠးၜးဇကု အခေါၚ်ဖန်ဖက်ကေတ် ကံကုသိုလ်ဇကုတံဂှ်ဟွံဂွံရ။ ဟိုတ်ဂှ်ရ စၞးဒးဂဇအ်ဒှ်လၞီအောန်စိုတ် တ္ၚဲစၟတ်သမ္တီ တ္ၚဲဍုၚ်ဟံသာဝတဳလီု မဒှ်ဝၚ်တြေံ ကလေၚ်ပလေဝ်ဟွံဂွံဂှ် အခိၚ်ကာလလၟုဟ် ညံၚ်ဒေသမန် ဂွံဗၠးၜးနူသၟဝ်သၞောတ်တၠအဝဵုပၞာန်ဂှ် ရုန်ဂ္စါန်လုပ်ပေါဲဗ္တိုက်တုဲ စိုပ်အခိၚ်ဒးချူဝၚ်တၟိဏောၚ်” သာ်ဝွံ သ္ဂးရ။
ပရေၚ်ချဳဒရာၚ် ပရေၚ်ပၞာန်၊ ပရေၚ်ဍုၚ်ကွာန်ဂကူမန်တံ အသိၚ်ကလေၚ်ခိုဟ်ကၠုၚ်လၟုဟ်ဂှ်ဝွံ ဒှ်ဟိုတ်နူတၞောဝ်ပၠန်ဂတးတၟိကဵု ဂကောံဗော်သွး မစှ်ေစိုတ်ကဵု ဒဒှ်မထပိုတ်ကၠေံရိုဟ်ကၞက် သၞောတ်တၠအဝဵုပၞာန်မာန်မှဟေၚ် ကလိဂွံ အရာကောန်ဂကူမန်တအ်မၞုံပၟိက် ကံကုသိုလ်ဇကု ဇကုဖန်ဖက်ကေတ်ဂွံဂှ်ဏောၚ် မဒှ်ရ။
ဆ္ဂး နကဵုဗ္ၜတ်အလုံဍုၚ်မွဲ ကံၚ်ဇြဳပၞာန် ဒးကျဗြီုဂၠိုၚ်တုဲ ဇြဟတ်မဍိုန်လျကၠုၚ်ဒၟံၚ်ဂှ်ဝွံ သွက်ဒတုဲဖဵုဍေံတံဂှ် ရပ်စပ်စကာဒၟံၚ် ဒေသသ္ကုတ်သၠုၚ်ကျာ ပါလုပ်သီုကဵုဒေသမန် ဒၞါဲဍေံတံ မအုပ်ဓလီုဂွံတံဂှ်ရောၚ် NRRF သ္ဂးရ။
ကံၚ်ဇြဳပၞာန် ဗပေၚ်ဇြဟတ်ပရေၚ်ပၞာန်၊ ပံၚ်တောဲကဵုဍုၚ်သ္အာၚ်ဂမၠိုၚ်တုဲ ထ္မံက်ဒၟံၚ်ကိုန်စဳမာန်ပၞော်ဂွံသြန်၊ ဆက်ဘပဠဒၟံၚ် ပရေၚ်ဂီုကၠီုညးဍုၚ်ကွာန်တံသၟးဟွံက သီုကဵုပ္တိတ်ကၠုၚ်ဒၟံၚ်ဇြဟတ် သွက်ဂွံကၠောန်ဗဒှ် ပေါဲရုဲမာဲပတောံ မပတှ်ေကေတ် ပၞော်တိတ်ပရေၚ်ဍုၚ်ကွာန် သွက်ညးတံဂှ်ရ။
အခိၚ်ကာလလၟုဟ်ဏံ နကဵုညးဍုၚ်ကွာန်ဂမၠိုၚ် အခိၚ်ဒးဂဗဒၟံၚ်ကဵု ဘဲအန္တရာယ်သဘာဝဂှ် ကံၚ်ဇြဳပၞာန် ထောံဂြာတ်မခတိုဟ် ပြိုက်ဂစိုတ်ဒၟံၚ် ညးဍုၚ်ကွာန်ကေုာံ ကောန်ၚာ်သၟတ် ဟၟဲကဵုစိုတ်ဆာန်ဍူဂရုဏာဂှ် ကလိလောန်ဒၟံၚ် ဂၠိုၚ်ၚ်ကဵုဝါရ။
ပ္ဍဲအကာဲအရာ ဒှ်သာ်ဏံဂှ် ယဝ်ဟွံထပိုတ်ကၠေံရိုဟ်ကၞက် ကံၚ်ဇြဳပၞာန်ဝှေတ်သေတ် စိုပ်တၞုၚ်တၞးပ္ဍဲပရေၚ်ကောန်ဂကူတံဂှ်မ္ဂး သ္ၚောဲအာ ကဵုအခေါၚ်စၞောန်ပျးအပိုၚ် ဂကူမန်တံ သၟိက်မိက်ဂွံဂွံတံဂှ်တုဲ ဂွံမံၚ် ဗွဲမဗဗွဲကဵုဂုန်သိက္ခာမၞိဟ်ဂှ်လေဝ် ဟွံလောဲသွာပုဟ်ဂှ် NRFF ထံက်ထ္ၜးလဝ်ရ။
ဟိုတ်ဂှ်ရ နကဵုညးဍုၚ်ကွာန်မန်ဂမၠိုၚ် ဆၜိုတ်ဗှ်သၞာအတိက်သၟးဂှ်ဟွံတုဲ အရာဇကုတံ မဒးဆောံလေၚ်လဝ်တံဂှ် သွက်ဂွံကလေၚ်ဗ္တိုက်ကေတ်၊ သွက်ဂွံကလေၚ်ဒက်ပ္တန် ဍုၚ်မန်ဂှ် အလုံကောန်ညးဍုၚ်ကွာန်မန် လ္ပာ်ဇကုသ္ပမာန် သွက်ဂွံပါလုပ်ကဵုအိုတ်ဂှ် ဖ္တိုက်ဖ္အောဝ်လဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−NRFF