မတ်မလီု၊ မေ ၂၄
သွက်ဂွံသ္ပဒတန် လၟေၚ်ကမၠောန်ပရေၚ်ဍုၚ်ဗၟာတၟိမွဲဂှ် ဥက္ကဌဒးအလန်အာဇြဳယာန် သ္ကိုပ်ဝန်ဇၞော် အာန်နဝါအဳဗရာဟေန် ဒးက္ဍိုက်ပ်ဏောၚ် ကံၚ်ဇြဳကဵုကသပ်စပ်ကဵုပရေၚ်ဍုၚ်ဗၟာ SAC-M ဖ္တိုက်ဖ္အောဝ်လဝ်ရ။
တၚ်တုပ်စိုတ်အာဇြဳယာန် ၅ တၚ် မသုၚ်စောဲဟွံဂွံဂှ် လသာထောံကၠေံတုဲ ပ္ဍဲကဵုကောံဓရီုအာဇြဳယာန် မရနုက်ကဵု ၄၆ ဝါ နူကဵုဍုၚ်မလေဝ်ယှာ မသ္ကိုပ်သ္ကကၠောန်အာ နဒဒှ်ဥက္ကဌဂှ် သွက်ဂွံကဵုက္ဍိုပ်ကၠောန်ကဵုဂှ်တုဲ ပ္ဍဲဂိတုမေ ၂၂ တေံ SAC-M လလောၚ်ပ္တိတ်လဝ် လၟေၚ်ကမၠောန်တၟိ မသုန်သာ်ရ။
အာဇြဳယာန် ကော်ကေတ်ပေါဲသဳကၠဳ မပါလုပ်သီုညးဖအိုတ် မပ္တံကဵု ဂကောံပၞာန်၊ NUG ၊ ဂကောံပၠန်ဂတးကောန်ဍုၚ်အရၚ်၊ ဂကောံရပ်လွဟ်တၞဟ်သ္အာၚ်တံဂှ်တုဲ နူဏံမွဲကဆံၚ် ဒးဖအိုတ်ကၠေံ အိုဿီုကဵုပရေၚ်ဗ္တိုက်ဂမၠိုၚ် ဗွဲတၟေၚ် ပရေၚ်ဗ္တိုက်ကဵုပၞာန်ကျာဂှ်ရောၚ် သ္ဂးရ။
သ္အာၚ်နူဂှ်ပၠန် ပရေၚ်ဒေါအ်ပန်ပှော် နဗ္ၜတ်အလုံဍုၚ်မွဲ နူအာဇြဳယာန်ကီု ကံၚ်ဇြဳဂီုကၠီုကုလသမဂ္ဂကီု ထံက်ဂလာန်တုဲ မ္ဒးဒ္ဂေတ်ဗက်တံဂှ်လေဝ် ထ္မံက်ရုပ်ရဴတုဲ ညးလ္ၚတ်နူဍုၚ်သ္အာၚ်ဂမၠိုၚ်လေဝ် ဒးမၚ်ရံၚ်စၟဳတ်ဏောၚ်ဂှ် ထ္မံက်ထ္ၜးလဝ်ရ။
ပ္ဍဲပရေၚ်ဍုၚ်ဗၟာဂှ် ဍုၚ်ဇိုၚ်ဝုတ်ဒိုဟ်ဂမၠိုၚ် ကေုာံ အေဂျေန်ဇြဳကုလသမဂ္ဂဂမၠိုၚ် မပါလုပ် ကုဂကောံမဆက်စပ် အဓိကဂမၠိုၚ်ဂှ် အာဇြဳယာန် ပ္ညဳပ္ညပ်ရေၚ်တၠုၚ်ဒၟံၚ်တုဲ ညံၚ်ဟွံဂွံသုၚ်စောဲ အရီုဗၚ်ပရေၚ်ဗ္စာရဏာမၞိဟ်တံဏံ ညံၚ်ရဴလွဟ်ဂှ် မၚ်ရံၚ်တုဲ တိဍာ်အိုဿီုဂှ်လေဝ် ဒးကဵုအာအခေါၚ်လုပ်စိုပ် သီုဟၟဲကဵုပရေၚ်တာဒၞါဂမၠိုၚ်ရ။
ကၠာဟွံဂွံကၠောန်ပေါဲရုဲမာဲဏံ ဗွဲကိုပ်ကၠာ ဒးကေတ်တၚ်တုပ်စိုတ်ပရေၚ်ၜိုဟ်လလမ် သီုညးဖအိုတ် မပါလုပ်မွဲဂှ်ဏောၚ်တုဲ ဒးဒေါအ်ဒေၚ်အာ ပရေၚ်ဗ္တိုက်သီုဖအိုတ်ဏောၚ်။ အရာတံဏံ ဍိုက်ပေၚ်မှဟေၚ် သွက်ပေါဲရုဲမာဲ မကၠောန်ဗဒှ်အာဂှ် အာဇြဳယာန် ဒးထံက်ပၚ်ရီုဗၚ်ကဵုအာ ကုညးမဆက်စပ်သီုဖအိုတ်ဂှ်ဏောၚ် သ္ဂးရ။
ပ္ဍဲအရာကၠောန်ဗဒှ်ပေါဲရုဲမာဲဂှ်လေဝ် ညးလ္ၚတ်နူဍုၚ်သ္အာၚ်ဂမၠိုၚ် မၚ်ရံၚ် ဗွဲမဗၠးၜးတုဲ ဒှ်ပေါဲရုဲမာဲကဆံၚ်အလုံဍုၚ် ဍာံပြတုဲ ပတှ်ေဖျေံစိုတ်ဂွံမှဟေၚ် ကၠောန်အာဂွံဏောၚ်ဂှ် SAC-M ထံက်ထ္ၜးလဝ်ရ။
မွဲလ္ပာ်ဂှ်ပၠန် ပ္ဍဲအရာချူခၞံပ္ညဳပ္ညပ် သၞောဝ်သ္ဇိုၚ်ဒက်ပ္တန် ဖေဝ်ဒရာဒဳမဝ်ကရေဇြဳ သွက်ဍုၚ်ဗၟာဂှ် အာဇြဳယာန် ဒးထံက်ပၚ်ရီုဗၚ်ကဵုဏောၚ်တုဲ သၞောဝ်ဏံဝွံ ဒုၚ်သ္ဇိုၚ်ကဵု ဆန္ဒညးဍုၚ်ကွာန် ကေုာံ ဒတုဲဖဵုညးတံတုဲ ဒးကိတ်ညဳကဵု တၚ်နၚ်ဗွိုၚ်ဂကောံအိုဿီု မတၞီလုပ်ဂှ်ဏောၚ်ဂှ် သ္ဂးရ။
သ္အာၚ်နူဂှ်ပၠန် ဒပ်ပၞာန်ဗၟာ နွံတန်တဴဒၟံၚ် နဗီုပြၚ်သာ်လဵုဒှ်ဒှ် ဒပ်ပၞာန်ဝွံ ဒးနွံသၟဝ်ကၠတ်ထဝ် ကေုာံ အလဵုအသဳကောန်အရာပ် မရုဲစှ်ပ္တိုန်လဝ်နနဲဒဳမဝ်ကရေဇြဳ ထာဝရဂှ်လေဝ် ဒှ်တၚ်နၚ်ပၟိက်ဇၞော်မွဲရောၚ် ထ္မံက်ထ္ၜးလဝ်ဂှ် ဂွံဆဵုကေတ်ရ။
ညးမပါလုပ် ပ္ဍဲပဋိပက္ခသီုဖအိုတ် ဂွံနွံကဵုပရေၚ်ကေတ်လျိုၚ် ဒုၚ်လျိုၚ် သွက်အမှုရာဇဝတ် မကလိလောန်လဝ် ပ္ဍဲဍုၚ်ဗၟာဂှ် နကဵုအာဇြဳယာန် ဒးထံက်ပၚ်ရီုဗၚ်ကဵုဏောၚ်တုဲ ဂွံဂွံဗဗွဲဓဝ်ဂှ် ဒးပံၚ်တောဲရေၚ်တၠုၚ်အာ ကုစက်ယန် ရုၚ်သၞောဝ်ဓဝ်အပ္ဍဲဍုၚ်ကေုာံ ဍုၚ်သ္အာၚ်တံဏောၚ်ဂှ် SAC-M ဟီုရ။
ပ္ဍဲအရာပံၚ်တောဲရေၚ်တၠုၚ်သာ်ဏံဂှ် ရုၚ်သၞောဝ်ဓဝ် မဒ္ဂေတ်လ္ၚတ်ဗက် အခေါၚ်စဳရေၚ်ဒုဟ်ဒဏ် လ္တူဂၠးတိ ဇၟာပ်ပ်ဒၞါဲဂှ်လေဝ် ပါလုပ်တုဲ နူကဵုဒုဟ်ဒဏ် မကလိလောန်လဝ် အမှုရာဇဝတ်ဍုၚ်သ္အာၚ်ဂမၠိုၚ်၊ ဒုဟ်ဒဏ်မဝးပ္ကဝ်လဝ် ဇၞော်ကဵုဇြဟတ်ဂမၠိုၚ် ကေုာံ သွက်ပြဝဟွံဗဗွဲကဵုသၞောဝ်တံဂှ် ကဵုအာအခေါၚ်ဗၠးနူဒုဟ် ဟွံဂွံပုဟ်ဂှ် ဖ္တိုက်ဖ္အောဝ်လဝ်ရ။
ပ္ဍဲကဵုကောံဓရီုအာဇြဳယာန် မကၠောန်ဗဒှ်အာ ပ္ဍဲဍုၚ်မလေဝ်ယှာ ဍုၚ်ဇၞော်ကွာလာလာမ်ပူ နူဂိတုမေ ၂၃ စဵုကဵုဂိတုမေ ၂၇ ဂှ် သွက်ဂွံသဳကၠဳအာပရေၚ်ဍုၚ်ဗၟာ နကဵုက္ဍိုပ်လိက် ညးဂမၠိုၚ်ဂွံပါလုပ်ဖအိုတ် ကေုာံ ပရေၚ်မတန်ကြန်အဓာန်ဇမၠိၚ်တံဂှ်လေဝ် နွံဒၟံၚ်ရ။
ကၠာကောံဓရီုအာဇြဳယာန်ဏံဂှ် သ္ကိုပ်ဝန်ဇၞော်မလေဝ်ယှာ အာန်ဝါ ဟီုလဝ် ကုအ္စာပရိုၚ်ဂမၠိုၚ် ပ္ဍဲဂိတုမေ ၂၁ တေံ ဒဒှ်ရအလဵုအသဳပၞာန်ဗၟာကဵု အလဵုအသဳ ဒးဒုၚ်ပလှ်ဖျေံလဝ်တံ စိုပ်အခိၚ်သွက်သ္ဂောံဆဵုဂဗသဳကၠဳညးသ္ကအ်ယျ မဒှ်ရ။
သ္ကိုပ်ဝန်ဇၞော် အာန်ဝါဂှ် အပ္ဍဲဂိတုဨပရဴတုဲကၠုၚ်တေံ ဒုၚ်တဲဆဵုဂဗလဝ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ပ္ဍဲဍုၚ်သေံ ဍုၚ်ၜၚ်ကံက်တုဲ ဂွံမွဲတ္ၚဲတုဲဂှ် ဆဵုဂဗသဳကၠဳလဝ် ကုအလဵုအသဳညဳသၟဟ်ဂကူ NUG နူကဵုလပှ်ကျာ ဗွဲမလုပ်သၞောဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−AFP