တၞၚ်သဳ၊ မေ ၂၄
အခိၚ်ကာလပၠန်ဂတး လအ်ကၠုၚ်ဗက် ပ္ဍဲပွိုၚ်ဍုၚ်ဂမၠိုၚ် မၞုံအပ္ဍဲရးတၞၚ်သဳ ဒၞါဲပရေၚ်ပၞာန်သ္ကာတ်မြဟ်ကၠုၚ်ဒၟံၚ်ဂှ် ကံၚ်ဇြဳပၞာန် သာတုဲရပ်စပ်ကၠုၚ် သၞောတ်ထပိုတ်ပန်ထပိုတ် ပါလုပ်သီုကဵု အခေါၚ်ဖ္ဍိုက်ယိုက်ကၠေၚ်စက် ကေုာံ ဗၞိက်စၞစသုၚ်သ္ဇိုၚ်ဂမၠိုၚ်ရောၚ် ဂွံတီကေတ် ဇရေၚ်ဂကောံသုတေသန FE5 Thanintharyi ရ။
မ္ၚးနူကဵုဍုၚ်ပဠဝ်ကဵုတၞၚ်သဳ ဒၞါဲမလလောၚ်တြးလဝ် ပရေၚ်အုပ်ဓုပ်ပၞာန်ဂှ် ပ္ဍဲသၞေဟ်ကၚ်စၟဳတ်ကံၚ်ဇြဳပၞာန် နူကဵုပွိုၚ်ဍုၚ် နွံအပ္ဍဲခရိုၚ်ထဝါဲတံဂှ် သာတုဲပတေၚ်ဂြတ်ကၠုၚ် အခေါၚ်ယိုက်ဖ္ဍိုက်ကၠေၚ်စက် ကေုာံ ဗၞိက်စၞစသုၚ်သ္ဇိုၚ်တံ နူကၠာတေံရ။
အပ္ဍဲခရိုၚ်ထဝါဲဂှ် ပါဲနူလ္တူဍုၚ်ထဝါဲတုဲ တုဲကၠုၚ် ပ္ဍဲဂိတုဨပရဴ သတ္တာဟလက္ကရဴအိုတ်တေံ ကံၚ်ဇြဳပၞာန် စၞောန်ကၠုၚ်လဝ် ကုညးမပလံၚ်ပ္တိုန်သွံတြးကၠေၚ်စက်ဂမၠိုၚ် ညံၚ်ဟွံဂွံသွံတြးကၠေၚ်စက် ပ္ဍဲပွိုၚ်ဍုၚ်ကေုာံကွာန်သှ်ေသၟေဟ်ဒၟံၚ်တံဂှ်ရောၚ် သ္ဂးရ။
ကၠာတေံမ္ဂး ပ္ဍဲရးတၞၚ်သဳဂှ် ပ္ဍဲကဵုဂကောံကွာန် နွံပ္ဍဲပွိုၚ်ဍုၚ်ပေါဲဗ္တိုက်ဒှ်ဒၟံၚ်သၟးရ ကံၚ်ဇြဳပၞာန် ကၠောန်ကၠုၚ်ဒၟံၚ်ထပိုတ်ပန်ထပိုတ်တုဲ အပ္ဍဲသၞာံဏံဂှ် သာတုဲပတေၚ်ဂြတ်ကၠုၚ်တုဲ နူကဵုဍုၚ်ထဝါဲဂှ် ကၠောန်သ္ပကၠုၚ် ပရေၚ်ကၟာတ်လဒဵု ဂၠိုၚ်ကၠုၚ်ဂှ် ညးတာလျိုၚ် FE5 Thanintharyi မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဟိုတ်နူကံၚ်ဇြဳပၞာန် သ္ပကၠုၚ်ထပိုတ်ပန်ထပိုတ် သာ်ဏံဂှ်တုဲ နကဵုညးဒေသဂမၠိုၚ် အခိၚ်သၞေဝ်ကေဝ်တိတ်မ္ဂး တိုန်ဍုၚ်တုဲ ဒးသွံတြးဒၟံၚ်ဂှ်ရ သာတုဲဒှ်ဒၟံၚ်အခက်အခုဲရောၚ် သ္ဂးရ။
သ္အာၚ်နူဂှ်ပၠန် ပ္ဍဲကဵုဒေသ ဒးဒုၚ်သ္ပလဝ်ထပိုတ်ပန်ထပိုတ်ဂှ် ပ္ဍဲအရာယိုက်ဖ္ဍိုက်ကၠေၚ်စက် ကေုာံ ဗၞိက်စၞစသုၚ်သ္ဇိုၚ်တံဂှ် ဒးအာဒၟံၚ် ဂၠံၚ်ဂြိုပ်သၟးရတုဲ ၚုဟ်ဗၞိက်ဂမၠိုၚ်ဝွံ သၠုၚ်တိုန်ကၠုၚ် နူကၠာတေံ ဗ္ဒါဲပိဆရောၚ် ဂွံတီကေတ်ရ။
ဂၠံၚ်ဂြိုပ်ဂှ်လေဝ် အခိၚ်ကညၚ်ရ ရပ်စပ်ဂွံတုဲ အခိၚ်ကာလဗြဲလၟုဟ်မ္ဂး ဟိုတ်နူဍာ်ဇၞော်ဍာ်ကလိုပ်တုဲ ဂွံအာကၠုၚ်ဂၠံၚ်ဂြိုပ်ဂှ် ဟွံပြေပြံၚ်တုဲ သာတုဲဒးဂဗဒၟံၚ်ကဵု အခက်အခုဲဂမၠိုၚ်ရောၚ် သ္ဂးရ။
ပ္ဍဲဂိတုဨပရဴတုဲကၠုၚ်တေံဂှ်လေဝ် ပ္ဍဲသၞေဟ်ကၚ်စၟဳတ်(ကြေးနန်းတိုၚ်) ပွိုၚ်ဍုၚ်ဗိက်ဂှ် ညးဗြဴမွဲတၠ မကေတ်နၚ်ကၠေၚ်စဂှ် ဟိုတ်နူကၠေၚ်ပဵုမံၚ်မွဲဗူတုဲ ကံၚ်ဇြဳပၞာန် ကဵုညးဗြဴဂှ်သုၚ်ထောံကၠေၚ်မွဲဗူ ဖအိုတ်ဂှ်တုဲ ညးဗြဴဝွံ လမျီုဒးအိုတ်အာလဝ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ