မတ်မလီု၊ မေ ၂၄
နကဵုသၟာဗ္ၚ အပ္ဍဲတွဵုရးဍုၚ်မန် မဂလေံကေတ်လဝ်သြန်ဂမၠိုၚ် လေဲပရေခတှ်သှ်ေဒၟံၚ်တံဂှ်တုဲမှ ပတိတ်ဂၠေံကဵုသြန်ဏောၚ် ဟိုတ်နူတၚ်စၞောန်ကံၚ်ဇြဳပၞာန်သာ်ဏံတုဲ ဂွံတဵုလွဳသြောံဂှ် ဒှ်ဒၟံၚ်အခက်အခုဲရောၚ် သၟာဗ္ၚဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တိုက်သြန်ဖောအ်ဗြေဝ်ဝါဗ္ၚဍုၚ်ဗၟာ သၟဝ်တဲကံၚ်ဇြဳပၞာန်ဂှ်တှ်ေ နကဵုသၟာဗ္ၚဂမၠိုၚ် ကလေၚ်လေဲပရေကၠေံ သီုအိက်သီုတမ် သြန်မဂၠေံကေတ်လဝ် ကၠာတေံဂှ်တုဲမှ ပ္တိတ်ဂၠေံကဵုအာ သြန်ခရိတ်တဵုလွဳကသီု သၞာံ ၂၀၂၅ ဏံဂှ်ဏောၚ်ဂှ် လလောၚ်ပ္တိတ်လဝ်ရ။
အခိၚ်ကာလလၟုဟ်ဝွံ ဒှ်အခိၚ်ကာလပလေဝ်ပလေတ်ဒၟံၚ် သ္ဂောံတဵုသြောံကသီုဂှ်တုဲ ယဝ်ဟွံဂွံသြန်ဂၠေံမ္ဂး ဂွံတဵုသြောံ ဗွဲမဂတာပ်အခိၚ် ဗီုကၠာတေံဂှ် အခက်အခုဲနွံမာန်တုဲ ဒၟါနူဟွံဂွံသြန်ဂၠေံတုဲ ဒးဂဗဒၟံၚ်ကဵု အကာဲအရာ ဒးဖအောန်တဵုသြောံရ။
သၟာဗ္ၚမွဲတၠဂှ်တှ်ေ ကလေၚ်လေဲကဵုသြန်မဂလေံလဝ် စဵုကဵုပြေဟွံမာန်ဂှ်ဝွံ ဒှ်ဟိုတ်နူဒးကျလဝ် ပ္ဍဲသြောံကညၚ်တုဲ ယဝ်ဟွံဂွံသြန်ဂၠေံမ္ဂး ဂွံတဵုလွဳသြောံဂှ် အခက်အခုဲနွံဒၟံၚ်ရောၚ် ဟီုရ။
“ သၟာဗ္ၚတံဂှ်တှ်ေ စဵုကဵုလၟုဟ် ဟွံဂွံလေဲပရေဏီပုဟ်ဟီုဂှ် သြောံကညၚ်တေံဂှ်လေဝ် ၚုဟ်စှ်ေဒၟံၚ် နူသၞာံတုဲတေံတုဲ သၟာဗ္ၚတံဂှ်လေဝ် တၟော်စဟွံကိတ် ကျတုဲ ဒးမၚ်ဒၟံၚ်ၚုဟ်သြောံ။ ဒှ်ဒၟံၚ်အရိုဟ်သၞာံရ။ သၟာဗ္ၚတအ် ခရိတ်တဵုလွဳဟွံမွဲတှ်ေ အခက်အခုဲဂှ် ဍေံနွံတွဵုရ” သာ်ဝွံ သ္ဂးရ။
သၟာဗ္ၚဂမၠိုၚ် ကျဗြံပ္ဍဲပရေၚ်တဵုလွဳသြောံတုဲ အခိၚ်ဒှ်ဒၟံၚ်ဒဒိုက်ဂှ် နကဵုကံၚ်ဇြဳပၞာန် ကၞာတ်ဂစိုတ်အခိၚ်ကာလမွဲမွဲတုဲ ထေက်ကဵုဒးဖအောန်ဖျေံကဵု အခိၚ်မ္ဒးကလေၚ်လေဲသြန်တံဂှ်တုဲ နကဵုသၟာဗ္ၚဂမၠိုၚ် ဂွံတဵုလွဳသြောံဂှ် ဂလေံသြန်နူမ္ၚးတုဲ ကၠောန်မ္ဂးလေဝ် ခရိတ်အိုတ် သာတုဲအိုတ်ဂၠိုၚ်ဏောၚ်ဂှ် ညးဆက်ဟီုရ။
သၟာဗ္ၚမွဲတၠပၠန်ဂှ်လေဝ် ပ္ဍဲအရာတဵုလွဳသြောံဂှ် ဟိုတ်နူဘဲသဘာဝတုဲ ကျဒၟံၚ်တုဲ ဂွံကလေၚ်လေဲသြန် မဂလေံလဝ်တံဂှ် အခက်အခုဲနွံတုဲ သွက်သြောံအခိၚ်ကသီုဏံဂှ်တှ်ေ ဟွံဂွံသြန်ဂလေံတုဲ တဵုချိုတ်တ်ပၠိုတ်တ် ဟွံမာန်ရတုဲ ၜိုတ်မဟရာတ်သၟးရ ဂွံတဵုဒၟံၚ်ဂှ် ဟီုရ။
“ဍာ်ဇၞော်မံၚ် ၜါသၞာံအဆက်က်တုဲ ဒးဆေၚ်ဒၟံၚ်မုက်ကဵု ပရေၚ်ကျဗြံတံဏံလေဝ် ပါ။ ပ္ဍဲအလဵုအသဳဂှ်တှ်ေ အိက်သြန်ဂှ် တန်ညိ။ မ္ၚးဏံဂှ် အိက်သြန်ဂှ် ဒှ်ဒၟံၚ် ၄/၅ ဒ္ကေဝ်တုဲ ပဟွံမာန်ပုဟ်။ အေ ဂှ်ရ ဗွဲကြဴဏံ ဗီုလဵုဒှ်ဒှ် ကၠောန်ဒၟံၚ်မဟရာတ်အိုတ်ရ။ ဟွံဂွံသြန်နူဗာန်တုဲ သၟာဗ္ၚဂမၠိုၚ် ဒှ်အာဒဒိုက် တၟာဂလိုၚ်ဏောၚ်” သာ်ဝွံ သ္ဂးရ။
သွက်ဂွံတဵုလွဳဂှ် ဟိုတ်နူဟွံဂွံသြန်ဓလေံတုဲ သွက်ခရိတ်အိုတ်နာနာ ပါလုပ်သီုကဵုကပေါတ်တမ်တံဂှ် ဒှ်အခက်အခုဲမာန်တုဲ ဗီုဒှ်ဂှ် ဒးတဵုလွဳဒၟံၚ်တုဲ အာဇီုကပိုက်ကဵု သီုဒမြိပ်သြောံတိတ် မအောန်စှ်ေကၠုၚ်ဏောၚ်ဂှ် ညးဆက်ဟီုရ။
ကံၚ်ဇြဳပၞာန်ဂှ်တှ်ေ စနူဂိတုမေ ၁၉ တုဲကၠုၚ်တေံတုဲ ပ္ဍဲတိုက်သြန်ဖောအ်ဗြေဝ်ဝါဗ္ၚဍုၚ်ဗၟာ သၟဝ်တဲကံၚ်ဇြဳပၞာန်တအ်ဂှ် ပ္တိတ်ဂလေံကဵုဒၟံၚ်သြန်သွက်ဂွံတဵုလွဳသြောံ အခိၚ်ကသီု မွဲဨကမ္ဂး မွဲကိုဋ်ဘာ်ဒ္ကေဝ် စဵုကဵု ၁၀ ဨကရောၚ် သ္ဂးရ။
သၟာဗ္ၚဂမၠိုၚ်ဝွံ အခိၚ်စတဵုလွဳသြောံကသီုဏံဂှ် ၚုဟ်ကပေါတ်တမ်ဂမၠိုၚ် ထပ်သၠုၚ်တိုန်ဒၟံၚ်ကီု၊ ခရိတ်အိုတ်နာနာ က္ဍၚ်တိုန်ဒၟံၚ်သၟးဟွံက ဟိုတ်နူသၞောဝ်ယိုက်လျိုၚ်ပၞာန်ကံၚ်ဇြဳပၞာန်တုဲ သီုကဵုဒးဆေၚ်ဒၟံၚ်မုက် ကုပြဒ္ဒညာဂၠါဲကမၠောန်ဝါတ်တံဂှ်ရ။
သ္အာၚ်နူဂှ်ပၠန် အခိၚ်တဵုလွဳသြောံကညၚ် တုဲကၠုၚ်တေံဂှ်လေဝ် ခရိတ်အိုတ်ဂမၠိုၚ် က္ဍၚ်ကၠုၚ်လဝ်တုဲ အခိၚ်သြောံတိတ်ဂှ် ဟွံဂွံၚုဟ်ခိုဟ်သၟးဟွံက ၚုဟ်ဂှ်လေဝ် ထ္ပက်စှ်ေကၠုၚ်တုဲ ကျဗြံအာလဝ်ဂှ်ရ အခိၚ်ကၠောန်သြောံကသီုလၟုဟ်ဏံဂှ် ဒးဆေၚ်ဒၟံၚ်မုက်ကဵု သီုအခက်အခုဲ ပရေၚ်သြန်ဓလေံတံရ။
ပ္ဍဲတွဵုရးဍုၚ်မန်ဂှ် လၟေၚ်သၞာံ တဵုလွဳဒၟံၚ်သြောံကသီု ဗ္ဒါဲ ၇ ကိုဋ်ဨကတုဲ သြောံတိတ်ဒၟံၚ် အပံၚ်ဖအိုတ် ၄၃၀ ကိုဋ်န ပြၚ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်− MOI