ကျံက်ကျဳ၊ မေ ၂၇
ဒပ်ကံၚ်ဇြဳပၞာန် ထောံဂြာတ်မခတိုဟ်ဗ္တိုက်လဝ် ပေါဲမ္ၚဵုထပ်တဲ ကွာန်ကျောန်ကျဳ ပွိုၚ်ဍုၚ်ကျံက်ကျဳ ရးဗဂေါ နကဵုပၞာန်ကျာဂှ်တုဲ ညးဒေသ ၁၂ တၠ ချိုတ်တုဲ ဗ္ဒါဲ ၄၀ တၠ ဇီုကပိုက်ကလိဂွံလဝ်ဝပ်ရောၚ် KNU ဗဟဵု လလောၚ်ပ္တိတ်လဝ် တ္ၚဲဏံရ။
ပ္ဍဲဂိတုမေ ၂၅ အခိၚ်နူဂယး ၜိုတ် ၉ နာဍဳဝိုက်ဂှ် က္ၜၚ်ကျာဗ္တိုက် ဂျက်ဖိုက်တာ နူဒပ်ကံၚ်ဇြဳပၞာန် မွဲဖ္ဍိုက် ကၠုၚ်ထောံဏာလဝ်မခတိုဟ်ၜါမ ပ္ဍဲဒၞါဲပေါဲမ္ၚဵုထပ်တဲဂှ်ရ။
ဟိုတ်နူပရေၚ်ထောံမခတိုဟ်ဂှ်တုဲ ကောန်ၚာ်သၟတ် အာယုက် ၅ သၞာံ ၜါတၠကဵု ညးဗြဴ မဒှ်လၟောဝ်သမ္ဘာ မပါလုပ်ဂှ် ၁၂ တၠ ချိုတ်အာလဝ်တုဲ ကောန်ၚာ်သၟတ်ဂမၠိုၚ်မပါလုပ် ၃၇ တၠ ဇီုကပိုက်ကလိဂွံလဝ်ဝပ်တုဲ သ္ၚိ ၁၁ မ လီုအာလဝ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြး KNU ဗဟဵုရ။
ကွာန်ကျောန်ကျဳ ဒးဒုၚ်ထောံလဝ်မခတိုဟ်ဂှ်ဝွံ ဒှ်ကွာန် နူကဵုတိဍာ်ထိၚ်ဒက် ခရိုၚ်ညံၚ်လေဝ်ပေန် ဒပ်မဟာ ၃ ဗော်သွးကောန်ဂကူကရေၚ် KNU ရ။
စပ်ကဵုပရေၚ်ထောံမခတိုဟ်ဏံဂှ်တုဲ လ္ပာ်ကံၚ်ဇြဳပၞာန် လလောၚ်ပ္တိတ်လဝ်ပရိုၚ် မမိက်ကဵုမွဲမွဲဂှ် ဟွံမွဲဏီရ။
ပရိုၚ်−သြၚ်လောန်တိုၚ်(မ်)
ဗီုရုပ်− KNU