မတ်မလီု၊ မေ ၂၅
နကဵုပရေၚ်အာက္ဍိုပ်ပံၚ်ကောံဂှ် ညံၚ်ဒပ်ရပ်လွဟ်မန်သီုဖအိုတ် ဂွံပါလုပ်ကၠုၚ် ပ္ဍဲဒပ်မန်ရာမည RMA ကောံကောံကလောံကလောံမာန်ဂှ် ပ္တိတ်အာဇြဟတ်ဏောၚ် ညးမၞုံအခေါၚ်ဟီုဂး ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP AD ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ပၞာန်ဗၠးၜးကောန်ဂကူမန် MNLA AD ကဵု ဒပ်ပၞာန်ဗၠးၜးဍုၚ်မန် MLA တံ ပံၚ်တောဲတုဲ ပ္ဍဲဂိတုမေ ၂၄ ဂှ် ဒက်ပ္တန်လဝ် ဒပ်မန်ရာမည RMA ရ။
နကဵုတၚ်ရန်တၟံ သွက်ဂွံဗ္တိုက်သရိုဟ်သၞောတ်တၠအဝဵုပၞာန်၊ ဍုၚ်မန်မဍိုက်ပေၚ်ကဵုအခေါၚ်တုပ်သၟဟ်ကေုာံ အခေါၚ်ကံကုသိုဟ်ဇကု ဇကုဖန်ဖက်ကေတ် ဂွံမံက်ဂတဝ်ကၠုၚ်ဂှ်တုဲ ပံၚ်ပကောံလဝ် ဒပ်ရပ်လွဟ်မန်ၜါဒပ် နဒဒှ်ဒပ်မန်ရာမည RMA ရ။
နာဲဂံၚ်သကာ ညးမၞုံအခေါၚ်ဟီုဂး ဗော်ဍုၚ်မန်တၟိ AD ဂှ်တှ်ေ ဒှ်သဘဴပံၚ်ကောံလဝ် ဂကောံဒှ်ဒၟံၚ်ဒတုဲၜါဂကောံဏံ ကၠာဂှ်ရ ပ္ဍဲဒပ်မန်ရာမညဏံ သီုညးဖအိုတ်ဂွံပါလုပ်ကၠုၚ်မာန်ဂှ် ဆက်ပ္တိတ်အာဇြဟတ်ဏောၚ် ဟီုရ။
“ပိုယ်တအ်လေဝ် ဂွံဒှ်ဗီုဏံ မွဲဂကောံ မွဲဒပ်ဂှ် ဆက်ပ္တိတ်အာဇြဟတ်ဏောၚ်။ ပြဟ်ဟ်ဏံ ဂကောံဒှ်ဒၟံၚ်ဒတုဲၜါဂကောံဏံဂှ် ပံၚ်ကောံထောံလဝ်ကၠာ ဒှ်သဘဴဏံရ၊ ဒက်ပ္တန်ထောံ နဒဒှ်မွဲဂကောံရ။ ဒပ်ပၠန်ဂတးရပ်လွဟ်မန်သှ်ေဒၟံၚ်တံကီု၊ PDF ဖျေံသ္ဇိုၚ်ဒေသမန်တၞဟ်ဟ်တံကီု သီုဖအိုတ်ဂွံပါလုပ်ကၠုၚ်မာန်ဂှ်လေဝ် ပိုယ်တံ ဆက်ပ္တိတ်အာဇြဟတ်ဏောၚ်” သာ်ဝွံ သ္ဂးရ။
ဒပ်မန်ရာမည RMA ဝွံ ပ္ဍဲတွဵုရးဍုၚ်မန်ကီု ပ္ဍဲဒေသမဆက်စပ် ဂကူမန်တအ် မတန်တဴနွံဂှ်လေဝ် ဂွံချဳဒရာၚ်အာပရေၚ်ပၞာန် နွံဒၟံၚ်တုဲ ဟိုတ်နူပရေၚ်ဂီုကၠီုတုဲ လၟိဟ်ဇြဟတ်ဒပ်ဂှ် ဟီုပ္တိတ်ကၠုၚ်လဝ် ဟွံမွဲရ။
ဒပ်ပၞာန်ဗၠးၜးကောန်ဂကူမန် MNLA AD ကဵု ဒပ်ပၞာန်ဗၠးၜးဍုၚ်မန် MLA တအ် ပံၚ်တောဲထောံအလုံအိုဿီုတုဲ က္ဍိုပ်သ္ကိုပ်လ္ပာ်ၜါဂကောံ ပါလုပ်တုဲ ဒက်ပ္တန်လဝ် ကမ္မတဳပရေၚ်ဍုၚ်ကွာန်ပရေၚ်ပၞာန် ဗော်ဍုၚ်မန်တၟိ AD နကဵုကောန်ဂကောံ ၂၆ တၠရ။
ပ္ဍဲကဵုဏံ ရုဲစှ်ခါန်ကၞက်ပ္တိုန် ၉ တၠတုဲ ဥက္ကဌ နာဲဇဲယ၊ ဒုဥက္ကဌ နာဲလျးဂကူ၊ ညးအုပ်ကာ နာဲဗညာလဴတံ ပါလုပ်တုဲ ဒက်ပ္တန်လဝ် ကမ္မတဳပရေၚ်ဍုၚ်ကွာန် ပရေၚ်ပၞာန် ဗော်ဍုၚ်မန်တၟိ AD တုဲ က္ဍိုက်အာက္ဍိုပ် ဒပ်မန်ရာမည RMA ဏောၚ်ဂှ် နာဲဂံၚ်သကာ သောၚ်ထ္ၜးလဝ်ရ။
“ က္ဍိုပ်သ္ကိုပ်သီုၜါလ္ပာ် မပါလုပ်ဂှ် ပိုယ်တံ ဒက်ပ္တန်လဝ်ရ။ ညအ်ဂှ် ပရေၚ်အာက္ဍိုပ်ပံၚ်ကောံလေဝ် ဟီုဂွံ။ ဂကောံက္ဍိုက်ပ်ပရေၚ်ဍုၚ်ကွာန်ဂှ် ပိုယ်တအ် ဆက်အာ နကဵုယၟု NMSP AD ရဏောၚ်” သာ်ဝွံ သ္ဂးရ။
သွက်ဂွံထ္မံက်ရုပ်ရဴ ကမၠောန်စပ်ကဵုပရေၚ်ပၞာန် ဒပ်မန်ရာမည RMA ဂှ် သၟဝ်ပၠတရဴပရေၚ်အာက္ဍိုပ် ကမ္မတဳပရေၚ်ဍုၚ်ကွာန် ပရေၚ်ပၞာန် ဗော်ဍုၚ်မန်တၟိ AD ဂှ် ဒက်ပ္တန်လဝ် ကမ္မတဳပၞာန် ၇ တၠရ။
နဒဒှ်ညးဂအုပ် က္ဍိုက်ပ်ဒပ်ပၞာန်ဂှ် ဒုသ္ကိုပ်ပၞာန်စၠန်ထဝ်၊ ဒုညးဂအုပ်က္ဍိုက်ပ်ဒပ်ပၞာန် (၁) သ္ကိုပ်ဗိုလ်ဇၞော်သဵုဝေန် ကေုာံ ဒုညးဂအုပ်က္ဍိုက်ပ် ဒပ်ပၞာန် (၂) သ္ကိုပ်ဗိုလ်ဇၞော်ကျဳဇြာန်တအ်ဂှ် ပအပ်ကဵုလဝ်တာလျိုၚ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြး ၜါဂကောံဂှ်ရ။
ပ္ဍဲကမ္မတဳပၞာန် ၇ တၠဂှ်လေဝ် က္ဍိုပ်သ္ကိုပ်ကေၚ်ကာပရေၚ်ပၞာန် နူကဵုဒပ်ပၞာန်ဗၠးၜးကောန်ဂကူမန် MNLA AD ကဵု ဒပ်ပၞာန်ဗၠးၜးဍုၚ်မန် MLA တအ် ပံၚ်တောဲပါလုပ်လဝ်ရ။
ဗညာမၚ်ကာန်စဳ ညးမၞုံအခေါၚ်ဟီုဂး MLA ဂှ် “အတိုၚ်တၚ်ရန်တၟံ ပိုယ်တံ မလလောၚ်ပ္တိတ်လဝ်ဂှ်ရ ပံၚ်တောဲအာဏောၚ်။ NMSP AD ဟီုဂှ် ဒှ်ဂကောံက္ဍိုက်ပ်ပရေၚ်ဍုၚ်ကွာန်ရ။ ဒပ် MNLA MLA ၜါဏံဝွံ ပြံၚ်လှာဲကၠေံ နဒဒှ်ဒပ်မန်ရာမညတုဲ ကၠောန်အာနကဵုသၞောတ်အာက္ဍိုပ်ပံၚ်တောဲဂှ်ဏောၚ်” သာ်ဝွံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဍုၚ်မန်မဍိုက်ပေၚ်ကဵု အခေါၚ်ကံကုသဵုဇကု ဇကုဖန်ဖက်ကေတ် သ္ဂောံမံက်တိုန်မာန်၊ သၞောတ်တၠအဝဵုပၞာန် သ္ဂောံဒတုံသရိုဟ်စှ်ေအာ ပြဟ်ဟ်မာန်ဂှ် ဗော်ဍုၚ်မန်တၟိ (ဗ္တိုက်သရိုဟ်တၠအဝဵုပၞာန်) AD ၊ ဒပ်မန်ရာမည (RMA) တအ် ပံၚ်တောဲကဵု ဂကောံမဟာမိတ်ပၠန်ဂတးကောန်ဍုၚ်အရၚ်ဘဝတုပ်ဂမၠိုၚ် ကေုာံဒပ်ပၠန်ဂတး စဵုဒၞါညးဍုၚ်ကွာန်ဂမၠိုၚ်တအ်တုဲ လုပ်အာပေါဲဗ္တိုက်ရောၚ် လလောၚ်တြးကဵုလဝ်သမ္တီရ။
ပ္ဍဲကဵုဒပ်ပၠန်ဂတးရပ်လွဟ် သ္ပသ္ဇိုၚ်ကဵုဂကူမန်ဂမၠိုၚ် လၟုဟ်ဂှ် ကရောၚ်ပၞာန်ပံၚ်တောဲရာမည မဒက်ပ္တန်လဝ် နကဵုဒပ်မန်ပန်ဒပ် ကဵု ဒပ်မန်ရာမညတံ နွံတုဲ ပရေၚ်ပၞာန်မစှ်ေကဵုဗျူဟာတအ်ဂှ် ဝေၚ်ကၠုၚ်ဟွံမာန်ဏီရ။
ပရိုၚ်−သြၚ်လောန်တိုၚ်(မ်)
ဗီုရုပ်− NMSP