တၞၚ်သဳ၊ မေ ၂၇
ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် ပ္ဍဲပွိုၚ်ဍုၚ်တၞၚ်သဳ ရးတၞၚ်သဳဂှ် အပ္ဍဲပွိုၚ်မွဲတ္ၚဲ ဒးဒုၚ်ကြတ်ဗ္တိုက်လဝ် ဟွံအောန်နူပန်ဝါတုဲ ကောန်ဒပ်ကံၚ်ဇြဳပၞာန် ဟွံအောန်နူ ၇ တၠ ချိုတ်အာလဝ်ရောၚ် ဂွံတီကေတ် ဇရေၚ်ခရိုၚ်ဗိက် တမ်ဒပ်လၟိဟ် ၂ ရ။
ဒပ်ကံၚ်ဇြဳပၞာန် ဇြဟတ်မၞုံဗ္ဒါဲ ၆၀ နူကွာန်(လယ်တောင်ယာ) ပွိုၚ်ဍုၚ်တၞၚ်သဳ မထ္ပက်ကၠုၚ်ကရောၚ်ပၞာန် လ္ပာ်ကွာန်(တမုတ်ချုံ) ဂှ် ပ္ဍဲဂိတုမေ ၂၃ အခိၚ်နူဂယး ၜိုတ် ၄ နာဍဳဝိုက်ဂှ် ဒပ်ပံၚ်ကောံစဵုဒၞါညးဍုၚ်ကွာန်တအ် ကြတ်ဗ္တိုက်လဝ်ရ။
ကြဴနူဂှ်တုဲ ကောန်ဒပ်ကံၚ်ဇြဳပၞာန် ထပ်ကၠုၚ်ကဵုပၞာန်အရီု ပွဳပွူ ၃၀ ဂှ်လေဝ် ပ္ဍဲကဵုတ္ၚဲဂှ် အခိၚ်နူဂယး၊ အခိၚ်လဒေါဝ်တ္ၚဲ၊ အခိၚ်ဇိုၚ်သဝ်တ္ၚဲတအ်ဂှ် ထပ်ဒးဒုၚ်ကြတ်ဗ္တိုက်လဝ်ရောၚ် သ္ဂးရ။
ဟိုတ်နူပရေၚ်ကြတ်ဗ္တိုက်ဂှ်တုဲ ပေါဲဗ္တိုက်ဆေၚ်မုက် က္တဵုဒှ်အာလဝ် လလအ်ပွိုၚ်မိနေတ်ညိညတုဲ ကောန်ဒပ်ကံၚ်ဇြဳပၞာန် ဟွံအောန်နူ ၇ တၠ ချိုတ်အာလဝ်တုဲ ဗွဲမဂၠိုၚ်ဂၠေၚ် ဇီုကပိုက်ကလိဂွံလဝ်ဝပ်ရောၚ် ညးဒုၚ်တာလျိုၚ် လလောၚ်ပရိုၚ် ခရိုၚ်ဗိက် တမ်ဒပ်လၟိဟ် ၂ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အခိၚ်လၟုဟ် ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်ဂှ်ဝွံ စိုပ်ဒၟံၚ်ပ္ဍဲကွာန်(တမုတ်ချုံ) တုဲ ဖျေံဒပ်မံၚ်ဒၟံၚ် အပ္ဍဲကွာန်ရောၚ် ဂွံတီကေတ် အတိုၚ်ဂလာန် ဂကောံဇြဟတ်ပၠန်ဂတးတံရ။
ဟိုတ်နူပေါဲဗ္တိုက်ဆေၚ်မုက်ကဵု ဒပ်ကံၚ်ဇြဳပၞာန်တံ ထ္ပက်ကရောၚ်ပၞာန်လုပ်စိုပ်ကၠုၚ်ဂှ်တုဲ ညးဒေသ နူကဵုကွာန် (လယ်တောင်ယာ) ကဵု ကွာန်(တမုတ်ချုံ) တအ်ဝွံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲရောၚ် ဂွံတီကေတ်ရ။
ပ္ဍဲဂိတုမာတ် ၈ တုဲကၠုၚ်တေံဂှ်လေဝ် ကွဳစက်ကံၚ်ဇြဳပၞာန် နူကွာန်တုၚ်ဃောန် ပွိုၚ်ဍုၚ်တၞၚ်သဳ ကၠုၚ်လ္ပာ်ကွာန်(ချောင်းနှစ်ပေါက်)ဂှ် ဒးဒုၚ်ပန်ဗ္တိုက်လဝ်တုဲ ပိတၠ ချိုတ်အာလဝ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−Myeik PDF