ထဝါဲ၊ ဂျောန် ၃
ဒပ်ကံၚ်ဇြဳပၞာန် ပန်ပှော်ကၠုၚ်ကဵုလွဟ်ဇၞော် ပ္ဍဲကွာန်(စော်ဝ) ပွိုၚ်ဍုၚ်ထဝါဲ ရးတၞၚ်သဳဂှ်တုဲ ကျာ်ဇၞော်ဂ္ဇအ်ဘာမွဲဇကု ဒးပဝ်အာရောၚ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုဂျောန် ၁ အခိၚ်ဗ္တံ ၜိုတ် ၃ နာဍဳဂှ် ဒပ်ကံၚ်ဇြဳပၞာန်ဖျေံသ္ဇိုၚ်ထဝါဲ ပန်ကၠုၚ်လွဟ်ဇၞော်တုဲ ဒတုံဗ္တိုဟ်ထ္ကးအာလဝ် အပ္ဍဲအရှာံဘာလကျာ် (သစ်ဆိမ့်ပင်) နွံလ္တူကွာန်(စော်ဝ) ဂှ်ရ။
ဟိုတ်နူလွဟ်ဇၞော် ဒတုံဗ္တိုဟ်ထ္ကးအာလဝ်တုဲ ကျာ်ဇၞော်အ္စာ ဘဒ္ဒန္တဣန္ဒောဘာသ အာယုက်မၞုံ ၆၆ သၞာံဂှ်ဝွံ ဒးအာကဝေက်လွဟ်ဇၞော် ပ္ဍဲက္ဍိုပ်တုဲ မ္ဒးပဝ်အာရ။
ပ္ဍဲတ္ၚဲဂှ်ရ ပ္ဍဲပွဳပွူ ဗ္ဒါဲဒဒန်ယှိုဲဂူ ပွိုၚ်ဍုၚ်ထဝါဲဂှ် ဒပ်ကံၚ်ဇြဳပၞာန် ပန်ပှော်နၚ်လွဟ်ဇၞော်တုဲ မၞိဟ်တြုံအာယုက် ၃၀ သၞာံမွဲတၠ ဒးလွဟ်ဇၞော်ချိုတ်အာလဝ်ရောၚ် ဂွံတီကေတ် အတိုၚ်ဂလာန် ညးဒေသတံရ။
အတိုၚ်ဂလာန်ညးဒေသတံဂှ်မ္ဂး ဟိုတ်ကံၚ်ဇြဳပၞာန်ဂွံပန်ကဵုလွဟ်ဇၞော်ဂှ်ဝွံ ဘိုၚ်ပန်လဝ်လွဟ်ဇၞော် ကုဒပ်ပၠန်ဂတး မလုပ်စိုပ်ဗ္တိုက်ကၠုၚ်လဝ် သၞေဟ်ကၚ်စၟဳတ်ဒဒန်ယှိုဲဂူဂှ်တုဲ ဘာလကျာ် မပါလုပ် ကောန်အရာပ်ဂမၠိုၚ် ဇီုကပိုက်ချိုတ်အာလဝ်ရ။
စပ်ကဵုပေါဲဗ္တိုက်ဒဒန်ယှိုဲဂူတုဲ ကံၚ်ဇြဳပၞာန်ကီု ဂကောံဇြဟတ်ပၠန်ဂတး ဒပ်ပံၚ်တောဲတံကီု ဒဵုကဵုအခိၚ်လၟုဟ် လလောၚ်ပ္တိတ်လဝ်ပရိုၚ်ဂှ် ဟွံမွဲဏီရ။
ပရိုၚ်−သြၚ်လောန်တိုၚ်(မ်)
ဗီုရုပ်− CJ