မတ်မလီု၊ ဂျောန် ၃
ဟိုတ်နူကံၚ်ဇြဳပၞာန် ရပ်ဒက်ကၠုၚ်ဒၟံၚ် ယာန်ဟၟဲကဵုလာၚ်ဇြေန် ပ္ဍဲတွဵုရးကရေၚ်ကဵု တွဵုရးဍုၚ်မန်ဂှ်တုဲ ဂကောံရီုဗၚ်ဟံၚ်ပြာ်မှာဇန် ဗွဲမဂၠိုၚ် ဟွံဂံၚ်ပလံၚ်မၞိဟ်ယဲရတုဲ ဒဒှ်ရဒးဒေါအ်ဇူ ဗွဲယာယဳဏောၚ် လလောၚ်ပ္တိတ်ကၠုၚ်နွံရ။
ပပ္တံနူဂိတုဂျောန် ၁ တုဲ ကံၚ်ဇြဳပၞာန်ဝွံ ဗက်ရပ်ဒက်ဒၟံၚ် ယာန်ဟၟဲကဵုလာၚ်ဇြေန် ပ္ဍဲတွဵုရးဍုၚ်မန်ကဵုတွဵုရးကရေၚ် နကဵုဇြဟတ်လၟိဟ်ဗွဲမဂၠိုၚ်ဂၠေၚ်တုဲ ကေတ်အရေဝ်သီကၠုၚ်ဒၟံၚ်တံ ကၠောန်ၜိုတ်ဒၟံၚ်ရ။
ပ္ဍဲတွဵုရးကရေၚ်ဂှ် ဟိုတ်နူရပ်ဒက်ဒၟံၚ် သီုကဵုကွဳစက်ဂကောံရီုဗၚ်ဟံၚ်ပြာ်မှာဇန် ဟၟဲကဵုလာၚ်ဇြေန်တအ်ဂှ်တုဲ ဂကောံရီုဗၚ်ပရေၚ်မၞိဟ် ဗွဲမဂၠိုၚ်ဝွံ ဟွံဂံၚ်ပလံၚ်မၞိဟ်ယဲ ပ္ဍဲဘာအၚ်ရတုဲ ပြဟ်ဟ်ဏံ ဒဒှ်ရဒးဒေါအ်ဇူလဝ်ဂှ် ကဵုလဝ်သမ္တီရ။
ဗွဲတၟေၚ် နူပွိုၚ်ဍုၚ်လိုၚ်ဗၠဲ ပ္ဍဲကွာန်ကြပ်သီုဖအိုတ် ကေုာံ ပွိုၚ်ဍုၚ်ဘာအၚ် ပ္ဍဲကဵုကွာန်ဂမၠိုၚ်ဂှ် ကွဳစက်ဂကောံရီုဗၚ်ပရေၚ်မၞိဟ် ဗွဲမဂၠိုၚ်ဝွံ ဟွံပလံၚ်မၞိဟ်ယဲရတုဲ ဒဒှ်ရဒေါအ်ဇူအာ ဗွဲယာယဳဂှ် ကဵုလဝ်သမ္တီရ။
ညးတာလျိုၚ်ဂကောံရီုဗၚ်ဟံၚ်ပြာ်မှာဇန် ဟွံမိက်ထ္မံက်ယၟုမွဲတၠဂှ်တှ်ေ ဟိုတ်နူကံၚ်ဇြဳပၞာန် ရပ်ဒက်ကၠုၚ်ယာန်ဟၟဲကဵုလာၚ်ဇြေန်တံဂှ်တုဲ အလုံကဏ္ဍမကဵုဒၟံၚ်ပရေၚ်ဒုၚ်ကာ ပရေၚ်ထတ်ယုက်မွဲ ဇီုကပိုက်ကၠုၚ်မာန်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ ညးဍုၚ်ကွာန်တအ် ဒှ်ဒဒိုက်ညးသ္ကအ်တၟာဂလိုၚ်ဏောၚ်။ အဏံဂှ် မၞိဟ်ယဲကာမံက်တိုန်ဂှ် နွံဒၟံၚ်လၟိုန်။ မၞိဟ်ယဲဂွံဝပ်တံဂှ် နွံဏောၚ်။ အခိၚ်ကသီုမ္ဂး မၞိဟ်အာယုက်ဇၞော်ဇၞော် မၞိဟ်ပရေၚ်ထတ်ယုက်ဟွံခိုဟ်တအ် အခိၚ်ရာသဳယဲဇွဟ်မ္ဂး ကောန်ၚာ်သၟတ်တအ်ဂှ်တှ်ေ ယဝ်ကွဳစက်ပရဟိတဟွံမွဲမ္ဂး ညးဍုၚ်ကွာန်တအ်ရဏောၚ် ဒးဒှ်ဒဒိုက်” သာ်ဝွံ သ္ဂးရ။
ဟိုတ်နူကံၚ်ဇြဳပၞာန်တွဵုရးကရေၚ် ရပ်ဒက်ကၠုၚ်ဒၟံၚ်ယာန်ဟၟဲကဵုလာၚ်ဇြေန်တံဂှ်တုဲ ကွဳစက်ဟံၚ်ပြာ်မှာဇန်ဂမၠိုၚ် ဟွံဂံၚ်ပလံၚ်မၞိဟ်ယဲရတုဲ ဒးဒေါအ်ဇူလဝ်ဂှ်ရ ဗွဲတၟေၚ် သွက်မၞိဟ်ယဲကာမံက်တိုန် နွံဒၟံၚ်ပ္ဍဲဒေသကွာန်ရး နူကဵုပွိုၚ်ဍုၚ်ဘာအၚ်ကဵု ပွိုၚ်ဍုၚ်လိုၚ်ဗၠဲတံဂှ် ပရေၚ်အာကၠုၚ် သာတုဲကြေပ်ဂြတ်ကၠုၚ်မာန်ရောၚ် ညးဒေသလ္တူဍုၚ်ဘာအၚ်ဂမၠိုၚ် ဟီုရ။
ညးတာလျိုၚ် ဂကောံရီုဗၚ်ဟံၚ်ပြာ်မှာဇန် ဟွံမိက်ထ္မံက်ယၟုမွဲတၠပၠန်ဂှ်လေဝ် ပ္ဍဲတွဵုရးဍုၚ်မန်ဂှ်လေဝ် ဟိုတ်နူကံၚ်ဇြဳပၞာန် ရပ်ဒက်ကၠုၚ်ဒၟံၚ် ယာန်ဟၟဲကဵုလာၚ်ဇြေန်တံဂှ်တုဲ ဂကောံရီုဗၚ်ဟံၚ်ပြာ်မှာဇန်ဗွဲမဂၠိုၚ် ဒေါအ်ဇူကၠုၚ်ကမၠောန်အိုတ်ဂှ် ဟီုရ။
“လၟုဟ်ဂှ် ရပ်သီဒၟံၚ် သီုကွဳစက်ပရဟိတ။ မၞိဟ်ဂှ်တှ်ေ ဍေံစောဲဂဗုတ် နကဵုသၞောဝ်ဗၞိက်ပၠောပ်ဗၞိက်ပ္တိတ်ရ။ ပိုယ်တအ် ဒှ်ဒဒိုက်မ္ဂး ညးဍုၚ်ကွာန်တအ် ဒှ်ဒဒိုက်ဏောၚ်။ ပ္ဍဲကဵု Page ဂကောံပိုယ်တံဂှ် လလောၚ်တြးလဝ်ရ၊ ဗွဲမဂၠိုၚ်ဂှ်တှ်ေ ပရူဒေါအ်ဇူယာယဳ၊ ဒဒိုက်ဂှ်တှ်ေ ဒှ်ကွေံကွေံဟဂှ်ရ” သာ်ဝွံ သ္ဂးရ။
နကဵုကံၚ်ဇြဳပၞာန် ပ္ဍဲအရာရပ်ဒက်ယာန်ဟၟဲကဵုလာၚ်ဇြေန်တအ်ဂှ် ကုကွဳစက်ဂကောံပရဟိတ မရီုဗၚ်ကဵုဒၟံၚ်လမျီုညးဍုၚ်ကွာန်တံဂှ် ထေက်ကဵုဒးဖဍိုန်ဖျေံ ပ္ဍဲအရာစၟဳတ်တံဂှ်တုဲ ယဝ်သ္ပကဵုဟွံမာန်မ္ဂး အတိုၚ်ဂကောံပရဟိတဂမၠိုၚ် မရီုဗၚ်ကဵုလဝ်ဂှ် ညံၚ်ဂွံရီုဗၚ်ညးဍုၚ်ကွာန်မာန် ဒးကၠောန်လဝ်ထေက်ရောၚ် ညးဆက်ဟီုရ။
ပ္ဍဲတွဵုရးဍုၚ်မန်ကဵု တွဵုရးကရေၚ်ဂှ် မ္ၚးနူဂကောံရပ်လွဟ်ဂမၠိုၚ်ဂှ် သ္ဇိုၚ်ဝန်သၟဝ်တဲကံၚ်ဇြဳပၞာန် ဗွဲမဂၠိုၚ်ဝွံ ဒးသ္ပပဓာန် ရပ်စပ်သုၚ်စောဲဒၟံၚ် ယာန်ဟၟဲကဵုလာၚ်ဇြေန်တံသၟးတုဲ ပ္ဍဲကဵုကဏ္ဍပရေၚ်ထတ်ယုက် ပရေၚ်ပညာ ပရေၚ်မၞိဟ် ပရေၚ်ပိုန်ဒြပ်တံ သီုဖအိုတ်ဂှ် စွံအဓိကတုဲ ဒးသုၚ်စောဲဒၟံၚ် ယာန်ဟၟဲကဵုလာၚ်ဇြေန်တအ်ရ။
ရပ်သီဒၟံၚ်ယာန်ဟၟဲကဵုလာၚ်ဇြေန်တံကီုလေဝ် ကွဳစက်ဟၟဲကဵုလာၚ်ဇြေန် နူဂကောံရပ်လွဟ်ကောန်ဍုၚ်အရၚ် BGF KNU/ KNLA PC DKBA တံဂှ်တှ်ေ ကံၚ်ဇြဳပၞာန် ဟွံရပ်မွဲသာ် ပမံၚ်ပၞညံၚ်ဟွံတီဂှ်ရ ပရေၚ်ဟီုဂးပါ်ပါဲဂမၠိုၚ်လေဝ် နွံရ။
ပရိုၚ်−သြၚ်လောန်တိုၚ်(မ်)
ဗီုရုပ်− Social Media