ပရေင်ကံင်ဇြဳပၞာန် မပပဵုပ္တိုန်လဝ်အာယုက်ကာလဒေါအ်ပန်ပှော်ဂှ် သွက်ပေါဲရုဲမာဲဂှ် ပရေၚ်ညိၚ်ဝတ်နွံမာန်ဟာ

နေဗျဳဒဝ်၊ ဂျောန် ၃

သွက်ဂွံကၠောန်ဗဒှ် ပေါဲရုဲမာဲ အပ္ဍဲသၞာံဏံဂှ် ပလေဝ်ပလေတ်ဒၟံၚ်တုဲ ဒေသညးကဵုညး ဂွံညိၚ်ဝတ်ဂှ် နွံပၟိက်တုဲ ပပဵုပ္တိုန်လဝ်အာယုက်ကာလဒေါအ်ပန်ပှော် စဵုကဵုဂိတုဂျောန်အိုတ်ရောၚ် ကံၚ်ဇြဳပၞာန် လလောၚ်ပ္တိတ်လဝ်ပရိုၚ်ရ။

ပ္ဍဲဍုၚ်ဗၟာ ကြဴနူတိချဳတုဲဂှ် ကံၚ်ဇြဳပၞာန် ရန်ကဵုပရေၚ်ညိၚ်ဝတ်တုဲ ထပ်ပပဵုပ္တိုန်လဝ် ကာလဒေါအ်ပန်ပှော် ဗွဲယာယဳ နဒဒှ်ပန်ဝါ နူဂိတုဂျောန် ၁ စဵုကဵုဂိတုဂျောန် ၃၀ ရ။

သွက်ဂွံဆက်ကၠောန် ပရေၚ်ကလေၚ်သိုၚ်ခၞံ ကေုာံ ကမၠောန်ကလေၚ်ဖျေံဒၞါဲဝါဲ ပ္ဍဲဒေသဒးဘဲတိချဳတံမာန်၊ သွက်ဂွံကၠောန်ဗဒှ်ပေါဲရုဲမာဲမာန်၊ သွက်ဂွံထ္မံက်ရုပ်ရဴ ဒတုဲဖဵုကၟိန်ဍုၚ်ကေုာံကောန်ဍုၚ်ကွာန်သီုဖအိုတ် ကေုာံ သွက်ဂွံထ္မံက်ရုပ်ရဴ ပရေၚ်ၜိုဟ်လလမ်မဍာံပြမာန်ဂှ် ထ္ၜးလဝ်ဟိုတ်ရ။

နကဵုကံၚ်ဇြဳပၞာန် မ္ဒးဆေၚ်ဒၟံၚ်မုက်ကဵု ပေါဲဗ္တိုက်ဒစဵုဒစးသၞောတ်တၠအဝဵုပၞာန်ဂှ် အခိၚ်ကၠောန်ဗဒှ်ပေါဲရုဲမာဲဂှ် ညးမကလိဂွံအခေါၚ်ကဵုမာဲဂွံအလုံဍုၚ်မွဲ သွက်ဂွံကဵုမာဲမာန်ဂှ် ဒေသဂမၠိုၚ် ဒးၜိုဟ်သြိုဟ်ညိၚ်ဝတ်ဏောၚ်ဂှ် သ္ဂးရ။

ဗိုလ်ဇၞော်ဇြေန်ယဝ် သ္ပလဝ်ဇြဳဒဳအာမ်ဂှ်တှ်ေ ဂွံကလေၚ်ကေတ် တိဍာ်မဒးဆောံလေၚ်လဝ်သီုဖအိုတ်ဂှ် အကာဲအရာဟွံကဵုဂှ်ရ ဆၜိုတ်လလောၚ်တြးဒေါအ်ပန်ပှော်ဓဝ်ဂှ် အလုံဍုၚ်မွဲ ပေါဲရုဲမာဲ သ္ဇက်ဂွံဒှ်ကၠုၚ်ဟွံမွဲပုဟ်ဂှ် သ္ၚဳဂၠိပ်လဝ်ရ။

“ပေါဲရုဲမာဲဍေံတံ ဟီုဒၟံၚ်ဂှ်လေဝ် ယဝ်ဒှ်ကၠောန်တှ်ေ ဒှ်ၜိုတ်ပေါဲရုဲမာဲထ္ၜးစရဏောၚ်။ တုဲတှ်ေ နကဵုညးတအ် ၜိုတ်ဒေါအ်ပန်ပှော်သၟးဂှ် ဟွံဂွံပုဟ်၊ အလုံဍုၚ်မွဲ ယဝ်ကလေၚ်စိုပ်အာ သၟဝ်တဲဒပ်ပၞာန်မ္ဂး ပေါဲရုဲမာဲဂှ် ဒှ်မာန်ဏောၚ်။ အလုံဍုၚ်မွဲ ဂွံကလေၚ်စိုပ်သၟဝ်တဲဒပ်ပၞာန်ဟီုဂှ် အပ္ဍဲပွိုၚ် ၅/၆ သၞာံဂတဏံ ဂ္စါန်မ္ဂးလေဝ် သွက်ကံၚ်ဇြဳပၞာန် ဂွံကလေၚ်ဗ္တိုက်ကေတ်တိဍာ် ဒးဆောံလေၚ်လဝ်တုဲတုဲဂှ် ဒှ်ဟွံမာန်ပုဟ်ဂှ် ဒးဟီုရ။ ဟိုတ်ဂှ်ရ ဆၜိုတ်ဒေါအ်ပန်ပှော်ဂှ်တှ်ေ ပေါဲရုဲမာဲ သ္ဇက်ဂွံဒှ်ကၠုၚ်ဟွံမွဲပုဟ်ဂှ် ဒးဟီုရ” သာ်ဝွံ သ္ဂးရ။

နူဂိတုဒဳဇြေမ်ဗာ သတ္တာဟတတိယ စဵုကဵုယးသၞာံ ဂိတုဂျာန္နဝါရဳ အပ္ဍဲသတ္တာဟဒုတိယဂှ် ကၠောန်ဗဒှ်ပေါဲရုဲမာဲဏောၚ် ကံၚ်ဇြဳပၞာန် လလောၚ်တြးလဝ်တုဲ တိဍာ်ဆန္ဒမာဲ မကၠောန်ဗဒှ်အာ အတိုၚ်အကာဲအရာပရေၚ်ဂီုကၠီုတံဂှ်တှ်ေ ဟွံဂွံဖျေံစၟတ်ဏီရ။

အတိုၚ်တၚ်နၚ် ဂကောံသုတေသနဗၠးၜးတံဂှ်မ္ဂး အလုံဍုၚ်မွဲ လၟိဟ်ပွိုၚ်ဍုၚ် ပဋိပက္ခပရေၚ်ပၞာန်ဟွံဂွံက္တဵုဒှ်ဏီတံဂှ်ဝွံ သှ်ေဒၟံၚ် ၜိုတ် ၉၀ ဓဝ်ရ။

ညးခါတ်အကာဲပရေၚ်ပၞာန်ဂမၠိုၚ်ဂှ်တှ်ေ ပ္ဍဲကဵုရးသေံသ္ကုတ်သၟဝ်ကျာ မ္ဒးဆောံလေၚ်လဝ် တိဍာ်ဗွဲမဂၠိုၚ်ဂှ် သွက်ဂွံကၠောန်ဗဒှ်ပေါဲရုဲမာဲမာန် ဓရတ်ကၠုၚ်ဂကောံရပ်လွဟ်ကောန်ဍုၚ်အရၚ်မဆေၚ်စပ်ဂမၠိုၚ် နူကဵုအလဵုအသဳကြုက်မွဲကဆံၚ်မာန်ရောၚ် သ္ဂးရ။

ဆ္ဂး ပ္ဍဲကဵုဒေသ ဂကောံရပ်လွဟ်ကောန်ဍုၚ်အရၚ် နူကဵုကချေၚ်၊ ချေၚ် ကေုာံ ကရေၚ်ဍာဲတံကဵု ဒပ်ပံၚ်ကောံဂမၠိုၚ် မထိၚ်ဒက်ဂွံလဝ်တံဂှ်တှ်ေ ကၠောန်ဗဒှ်ပေါဲရုဲမာဲမာန်ဟွံသေၚ်ပုဟ်ဂှ် ထံက်ထ္ၜးလဝ်ရ။

မွဲလ္ပာ်ဂှ်ပၠန် လ္ပာ်ရးမာန္တလေဝ်၊ ရးမဂွဵု ကေုာံ ရးသက်ကိုၚ်တံဂှ်တှ်ေ ၜိုတ်လ္တူဍုၚ်သၟးရ ကံၚ်ဇြဳပၞာန် အုပ်ဓလီုဂွံလဝ်တိဍာ်နွံမာန်ကီုလေဝ် ပ္ဍဲဒေသကွာန်ရးတံဂှ်တှ်ေ ပဋိပက္ခပရေၚ်ပၞာန် ဒှ်ဒၟံၚ်ရ။

ပ္ဍဲဒေသအညာဂှ်လေဝ် ကံၚ်ဇြဳပၞာန် ထ္ပက်ကၠုၚ်ဒၟံၚ်ကရောၚ်ပၞာန်  နွံဒၟံၚ် ဗွဲမဂၠိုၚ်ဂၠေၚ်တုဲ ကၠာဗြဲဟွံစှ်ေဂှ် ရေၚ်ယာန်ဇွောံမ အာကၠုၚ်ချဳဒရာၚ်ဒၟံၚ် ဟွံပိုတ်သ္ကုတ်ရောၚ် ညးခါတ်အကာဲဂမၠိုၚ် သ္ဂးရ။

ဗိုလ်ဇၞော် ကံၚ်သူဝေန် သ္ပလဝ်ဇြဳဒဳအာမ်ဂှ်တှ်ေ ၜိုန်ဒေါအ်ပန်ပှော်ကီုလေဝ် ပ္ဍဲဗလးတိဏံဂှ် ဖအောန်ဖျေံလဝ် ပရေၚ်ချဳဒရာၚ်စပ်ကဵုပရေၚ်ပၞာန် ဟွံမွဲဂှ်ရ ဒှ်ဒၟံၚ်အကာဲအရာ ကံၚ်ဇြဳပၞာန် ဆက်ထ္ကက်အာပၞာန်ဏောၚ်ဂှ် သ္ၚဳဂၠိပ်လဝ်ရ။

“ ပရေၚ်ဒေါအ်ပန်ပှော်ဟီုဂှ် ၜိုတ်လ္တူလိက်တၞးသၟးရဏောၚ်တုဲ ပ္ဍဲဗလးတိဏံဂှ်တှ်ေ ဝေၚ်ဒၟံၚ်ပၞာန်ထ္ပက် အတိုၚ်တြေံရ။ အလန်စတုတ္ထတုဲမ္ဂး ဗီုဏံ ထပ်ကၠုၚ်ပၠန်ယျဟီုတှ်ေ ပရေၚ်ဒေါအ်ပန်ပှော်ဟီုဂှ် ဒှ်ပရေၚ်ဒေါအ်ပန်ပှော် ပတှ်ေဖျေံစိုတ်ဟွံဂွံတုဲ ပ္ဍဲဗလးတိဏံ ဍေံတံ ဆက်တုဲဂွံထပ်ထ္ပက်အာပၞာန်ဂှ် နွံဒၟံၚ်လၟိုန်ဏောၚ်” သာ်ဝွံ သ္ဂးရ။

အတိုၚ်စရၚ် အလဵုအသဳညဳသၟဟ်ဂကူ NUG မ္ဂး အပ္ဍဲပွိုၚ်ကံၚ်ဇြဳပၞာန် မလလောၚ်တြးကၠုၚ် ဒေါအ်ပန်ပှော် ၜါဝါဂှ် အလုံဍုၚ်မွဲ ဟိုတ်နူပရေၚ်ဗ္တိုက်ကဵုပၞာန်ကျာတုဲ ကောန်အရာပ် ဗ္ဒါဲ ၃၀၀ ချိုတ်အာလဝ်တုဲ ၄၅၆ တၠ ဇီုကပိုက်ကလိဂွံလဝ်ဝပ်ရ။

အပ္ဍဲကာလဒေါအ်ပန်ပှော်ဏံ နကဵုဂကောံရပ်လွဟ်ဂမၠိုၚ် ပါလုပ်သီုကဵု EAO တအ် ယဝ်ဗ္တိုက်ကၠုၚ်ဌာန်ဂအုပ်ဒပ် ဗ္ဒိုပ်ဒပ်ဂမၠိုၚ်၊ ဗပေၚ်ဇြဟတ်၊ သၠဲကၠုၚ်တိဍာ်မ္ဂး ကလေၚ်ခၠေဝ်ပလန်အာ အရာမနွံပၟိက်တံဏောၚ်ဂှ် ကံၚ်ဇြဳပၞာန် ကဵုလဝ်သမ္တီရ။

ထ္ၜးဟိုတ်ကဵုပေါဲရုဲမာဲတုဲ ဂကောံမၚ်လ္ၚတ်နူဗွိုၚ်ဍုၚ်သ္အာၚ်ဂမၠိုၚ် ဂွံညာတ်ကၠးဂှ် ကံၚ်ဇြဳပၞာန် ဒေါအ်လဝ်ပန်ပှော် ၜိုတ်ပပၞသက်က်ရောၚ် ပါ်ပါဲလဝ်ရ။

ပြဟ်ဟ်ဏံ ဒပ်ပံၚ်ကောံ ကေုာံ KNLA ဗ္တိုက်သီဒၟံၚ် ဗ္ဒိုပ်ဒပ်ကံၚ်ဇြဳပၞာန် ပ္ဍဲပယျဵုသေံ−ဗၟာဂှ်တုဲ ပ္ဍဲရခေၚ်ဂှ်လေဝ် AA ထ္ပက်ဒၟံၚ်ပၞာန် ကုဗ္ဒိုပ်ဒပ်ဂမၠိုၚ် မၞုံအပ္ဍဲပွိုၚ်ဍုၚ်ကျံက်ဖျူရ။

က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ်ဂှ်တှ်ေ နကဵုဂကောံရပ်လွဟ်ကောန်ဍုၚ်အရၚ် ကေုာံ ညးမဆေၚ်စပ်ဂမၠိုၚ် စပ်ကဵုဒေါအ်လဝ်ပန်ပှော် ဗွဲယာယဳဂှ်တုဲ ကူချပ်ဗွဲမဇြိုဟ်နက်တုဲ သွက်ဂွံဒ္ဂေတ်ဗက်ကဵုအိုတ်ဂှ် ဖ္တိုက်ဖ္အောဝ်လဝ်ရ။

ပရိုၚ်−သြၚ်လောန်တိုၚ်(မ်)

ဗီုရုပ်− MOI/CJ