သဓီု၊ ဂျောန် ၅
မၞိဟ်တြုံဒေသမွဲတၠ ဒၟံၚ်ကွာန်ပုၚ်နေဝ်တဝ် ပွိုၚ်ဍုၚ်သဓီု တွဵုရးဍုၚ်မန်ဂှ် ကရောၚ်ပၞာန်ကံၚ်ဇြဳပၞာန် ရပ်ဒက်ပြိုက်ဂစိုတ်လဝ်ရောၚ် ပဒိုဝ်သဝ်အေနာၚ် ညးအုပ်ကာ ခရိုၚ်သဓီု ဗော်သွးကောန်ဂကူကရေၚ် KNU ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ်ဂိတုဂျောန် ၃ တေံ ဂွံကလေၚ်ဆဵုကေတ်လဝ် ဇွရုပ် သဝ်လာထု အာယုက် ၅၂ သၞာံ မဒှ်ကောန်ကွာန်ပုၚ်နေဝ်တဝ် နူကဵုကရောၚ်ပၞာန်ကံၚ်ဇြဳပၞာန် မရပ်ဒက်ဏာလဝ်ဂှ် ပ္ဍဲကဵုဂြိုပ် အကြာကွာန် (ပုရစ်ခို) ကဵုကွာန်အေန်ယဲ ပွိုၚ်ဍုၚ်သဓီုရ။
အခိၚ်ဂွံကလေၚ်ဆဵုဇွဂှ် ဒဒှ်ရချိုတ်ဒၟံၚ် နကဵုဝပ် မဒးဒုၚ်ၜုၚ်တက်ပျဲပျာံလဝ်ဂှ် ပဒိုဝ်သဝ်အေနာၚ် သ္ဂးရ။
ပ္ဍဲဂိတုမေ ၃၀ တေံ နူသ္ၚိ အခိၚ်ညး အာဂၠါဲပတိုဟ်မ ပ္ဍဲဂြိုပ်ဂှ် ဂဗဒး ကရောၚ်ပၞာန် ဇြဟတ်မၞုံ ၜိုတ် ၁၀၀ နူဗ္ဒိုပ်ဒပ်ပုၚ်နေဝ်တဝ် အာဗ္ဒိုပ်ဝေန်တာပါန်ဂှ်တုဲ ဒးဒုၚ်ရပ်ဒက်လဝ်ရ။
ကြဴနူဂှ်တုဲ သဝ်လာထုဝွံ ဟွံကလေၚ်စိုပ်ကၠုၚ်သ္ၚိမွဲသာ် ကၠေံအာတုဲ ညးမအာဗာ်အှော်၊ ဂၠါဲၜၚ်တအ် ဂွံဆဵုကေတ် ဇွညးပ္ဍဲဂြိုပ်ဂှ် ဂွံတီကေတ်ရ။
ကရောၚ်ပၞာန် မရပ်ဒက်ဏာလဝ် သဝ်လာထုဂှ်ဝွံ နူဂိတုမေ သတ္တာဟဒုတိယဂှ်ရ စိုပ်ဒၟံၚ်ဗ္ဒိုပ်ဒပ်ပုၚ်နေဝ်တဝ်တုဲ ဒှ်ဂကောံအာစိုပ်ဗပေၚ်ဇြဟတ် ပ္ဍဲဗ္ဒိုပ်ဒပ်ဝေန်တာပါန်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်− Social Media