နခါမ်၊ ဂျောန် ၁၁
အခိၚ်ကာလပၠန်ဂတးဏံ နဒဒှ်ဂကောံအဝဵုပရေၚ်ဍုၚ်ကွာန်သၠုၚ်အိုတ်ဂှ် ဒက်ပ္တန်လဝ် ကံၚ်ဇြဳရးတအာၚ် TLC နကဵုဂကောံပိဂကောံရောၚ် ကမ္မတဳကဵုကသပ်ဂၞန်ပရေၚ်ဍုၚ်ကွာန်တအာၚ် TPCC လလောၚ်ပ္တိတ်လဝ် ပ္ဍဲဂိတုဂျောန် ၉ တေံရ။
ပ္ဍဲကံၚ်ဇြဳရးတအာၚ်ဂှ် သ္ကိုပ်ဗိုလ်ဇၞော် တာအိုက်ဖုၚ် မဒှ်က္ဍိုပ်သ္ကိုပ် TNLA မွဲတၠဂှ် ကေတ်အာလျိုၚ် နဒဒှ်ဥက္ကဌဏောၚ်တုဲ ဒုဥက္ကဌၜါတၠ မပါလုပ် ကောန်ဂကောံပန်တၠ ကေုာံ ဖက်ဆောညးအုပ်ကာ မွဲတၠ အပံၚ်ဖအိုတ် ညးစၞးဒ္စိတ်တၠ ပါလုပ်ရ။
ပ္ဍဲကဵုဂကောံပိဂကောံဂှ် ကမ္မတဳကဵုကသပ်ပရေၚ်ဍုၚ်ကွာန်တအာၚ် TPCC နူကဵုဂကောံမှာဇန်တအာၚ်တံ မပါလုပ်ဂှ်ကီု၊ ဗော်ကောန်ဂကူတအာၚ် TNP ကေုာံ ဒပ်ပၠတရဴဗၠးၜးတွဵုရးပလံၚ် PSLF/TNLA ပါလုပ်ရ။
ကောံဓရီုပရေၚ်ဍုၚ်ကွာန် ဂကောံပိဂကောံဏံဂှ် နူဂိတုဂျောန် ၁ စဵုကဵုဂိတုဂျောန် ၃ ဂှ် ကၠောန်ဗဒှ်လဝ် ပ္ဍဲရးတအာၚ် မွဲဒၞါဲတုဲ သီုက္ဍိုပ်သ္ကိုပ်ကဆံၚ်လ္တူဂမၠိုၚ် မပါလုပ် ညးစၞး ၈၃ တၠ တိုန်စိုပ်လဝ်အိုတ်ရ။
အပ္ဍဲကောံဓရီုကဆံၚ်လ္တူဂှ် သ္ပဒတန် အစဳဇန်အလဵုအသဳအခိၚ်ကာလပၠန်ဂတးရးတအာၚ် နူကဵုကမ္မတဳချူခၞံသၞောဝ်သ္ဇိုၚ်ဒက်ပ္တန် တွဵုရးတအာၚ် TSCDC မချူခၞံလဝ်ဂှ်တုဲ သွက်ဂွံဒက်ပ္တန်ကံၚ်ဇြဳရးတအာၚ်ဂှ် သ္ဂုတ်သွာတ်လဝ် ဗွဲမညဳသၟဟ်ရောၚ် သ္ဂးရ။
အတိုၚ်အစဳဇန်ဂှ်မ္ဂး သွာၚ်ပရေၚ်အုပ်ဓုပ်၊ သွာၚ်ပရေၚ်ခၞံသၞောဝ်၊ သွာၚ်ပရေၚ်စဳရေၚ်ဂဗုတ် မဒှ်သွာၚ်အဓိက အလဵုအသဳရးတအာၚ် မသ္ဂောံဆက်ဒက်ပ္တန်အာဂှ် သွက်ဂွံကောပ်ကာဲအာက္ဍိုပ်မာန် ရန်သာ်ဏံတုဲ ပြံၚ်လှာဲဒက်ပ္တန်လဝ် ကမ္မတဳကဵုကသပ်ပရေၚ်ဍုၚ်ကွာန်တအာၚ်ရ။
ကံၚ်ဇြဳရးတအာၚ်ဝွံ ဒုၚ်သ္ဇိုၚ်ကဵုတိဍာ် TNLA ကေုာံ မဟာမိတ်ဂမၠိုၚ် မသီကေတ်လဝ် အပ္ဍဲပရေၚ်ပၞာန် ၁၀၂၇ ဂှ်တုဲ အပ္ဍဲသၞာံဏံ ဆက်ဒက်ပ္တန်အာ အလဵုအသဳညးဍုၚ်ကွာန်တအာၚ်အခိၚ်ကာလပၠန်ဂတး နကဵုညးစၞးဂကောံပိဂကောံဂှ်ကဵု ညးစၞးမဒးရးဂမၠိုၚ်ရောၚ် ကဵုလဝ်သမ္တီရ။
အခိၚ်လၟုဟ် ကံၚ်ဇြဳပၞာန် ထ္ပက်ဒၟံၚ်ပၞာန် သွက်ဂွံကလေၚ်ကေတ်ဍုၚ်နံၚ်ချဵု နူကဵုတိဍာ် TNLA မထိၚ်ဒက်လဝ်ဂှ်တုဲ မွဲလ္ပာ်ဂှ်ပၠန် ဟိုတ်နူအလဵုအသဳကြုက် ကရေပ်ဓရတ်ကၠုၚ်တုဲ TNLA ဝွံ ဒးဆေၚ်ဒၟံၚ်မုက်ကဵု အကြေပ်အဂြတ်ဂမၠိုၚ်ရ။
ပ္ဍဲအကာဲအရာသာ်ဏံဂှ် ဒက်ပ္တန်ကံၚ်ဇြဳရးတအာၚ်တုဲ နူဏံမွဲကဆံၚ် သ္ဂောံဒက်ပ္တန်အာ အလဵုအသဳညးဍုၚ်ကွာန်တအာၚ် အခိၚ်ကာလပၠန်ဂတးမွဲဏောၚ် စပ်ကဵုပရေၚ်ဏံတုဲ နကဵုသြၚ်လောန်တိုၚ်(မ်) ဆက်စၠောံလဝ် ဇရေၚ်ညးမၞုံအခေါၚ်ဟီုဂးကီုလေဝ် ဟွံကလေၚ်လဝ်ပရိုၚ်ရ။
နကဵု TNLA နူကဵုပရေၚ်ပၞာန် ၁၀၂၇ ဂှ် ထိၚ်ဂွံလဝ် နာမ္မတူ၊ ကောတ်ခိုၚ်၊ မာန်တုၚ်၊ မိုဝ်မုက်၊ မိုၚ်လုၚ်၊ မိုၚ်ၚအ်၊ နံၚ်ချဵု၊ ကျံက်မေဝ်၊ တဳပဝ်၊ နသာန် ကေုာံ နခါမ် နူကဵုရးသေံသ္ကုတ်သၟဝ်ကျာဂှ်ကဵု ဍုၚ်မိုဝ်ကုတ် နူရးမာန္တလေဝ်ရ။
TPCC ဂှ်တှ်ေ သွက်ဂွံဒက်ပ္တန်ကၟိန်ဍုၚ်ပံၚ်ကောံဖေဝ်ဒရာဂှ် ပံၚ်တောဲရေၚ်တၠုၚ်အာ ကုဂကောံဇြဟတ်ပၠန်ဂတး ပ္ဍဲဍုၚ်ဗၟာဏောၚ်ဂှ် လလောၚ်ပ္တိတ်လဝ်လစွံစိုတ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−Social Media