မတ်မလီု၊ ဂျောန် ၁၁
ပ္ဍဲတွဵုရးဍုၚ်မန် စနူဂိတုဂျောန်ဏံတုဲ အသိၚ်ဒှ်ကၠုၚ်ယဲပုၚ် သၠုၚ်တိုန်ကၠုၚ်တီတီဂှ်တုဲ နကဵုညးဍုၚ်ကွာန်ဂမၠိုၚ် သွက်ဂွံစွံသတိအိုတ်ဂှ် အ္စာဂဥုဲဂမၠိုၚ် ဖ္တိုက်ဖ္အောဝ်လဝ်ရ။
ယဲပုၚ်ဝွံ ဍေံက္တဵုဒှ်ကၠိုဟ်သၞာံလေပ်ကီုလေဝ် အခိၚ်လၟုဟ် မဒှ်ကာလရာသဳဗြဲစဏံဂှ် သာတုဲဒှ်ဂၠိုၚ်ကၠုၚ်တုဲ မွဲတ္ၚဲမ္ဂး အောန်အိုတ် ဟွံအောန်နူ ၆၅ တၠ ဒးဒုၚ်ကၠောံထၞာန်ဒၟံၚ်ရ။
အတိုၚ်တၚ်နၚ် နူကဵုဌာနက္ဍိုက်ပ်ပရေၚ်ထတ်ယုက် တွဵုရးဍုၚ်မန်ဂှ်မ္ဂး တုဲကၠုၚ်နူဂိတုမေတေံ စဵုကဵုဂိတုဂျောန် အပ္ဍဲသတ္တာဟဒုတိယဂှ် ညးဒးဒုၚ်ကၠောံထၞာန်ယဲဂှ် နွံကၠုၚ် စဵုကဵု ၁၀၀၀ ပြၚ်ရောၚ် ဂွံတီကေတ်ရ။
အပ္ဍဲဒေသဂှ် ဂွံဆဵုကေတ်ကောန်ၚာ်ဂမၠိုၚ် က္တဵုဒှ်ယဲပုၚ်ဂၠိုၚ်တုဲ ပ္ဍဲသၟတ်တအ်ကဵု မၞိဟ်အဝဲလဒေါဝ်တအ်လေဝ် ကၠောံထၞာန်ကၠုၚ်ယဲ နွံကၠုၚ်ကီုရ။
အ္စာဂဥုဲမွဲတၠဂှ်တှ်ေ အခိၚ်ကာလဒှ်ယဲပုၚ်ဂၠိုၚ်ဒၟံၚ်ဏံဂှ် တၟေၚ်မွဲဂှ်တှ်ေ ကၠာတေံ ပ္ဍဲကဵုမၞိဟ်ဇၞော်ဇၞော် ဒှ်စယဲပုၚ်အောန်ဂှ် က္တဵုဒှ်ကၠုၚ်ဒၟံၚ်ယဲပုၚ် နွံဒၟံၚ်ကီုရောၚ် ဟီုရ။
“စပ်ကဵုယဲပုၚ်ဂှ်တုဲ ဇၟာပ်ဒှ်ဂှ်တှ်ေ အာထ္ၜးကဵုအ္စာဂဥုဲလွဳကောန်ၚာ်ဂှ်ရ ဂၠိုၚ်။ ဗွဲကြဴဏံ တၟေၚ်မွဲဂှ်တှ်ေ ပ္ဍဲကဵုမၞိဟ်ဇၞော်ဇၞော်တအ်ဂှ်လေဝ် ဇကုဂမ္တဴတုဲ ဂမ္တဴဂှ်ဟွံစှ်ေပုဟ်။ ပ္ဍဲကဵုမၞိဟ်ဇၞော်ဇၞော် အာယုက် ၃၀/၄၀ တအ်ဂှ်တှ်ေ ယဝ်စမ်ရံၚ်ဆီမ္ဂးလေဝ် ဒှ်ဒၟံၚ်ယဲပုၚ်ဂှ် ဂွံဆဵုကေတ်ရ” သာ်ဝွံ သ္ဂးရ။
သ္အာၚ်နူဂှ်ပၠန် အခိၚ်ကာလလၟုဟ်ဝွံ ဒှ်ကာလက္တဵုဒှ်ယဲပုၚ်ဂၠိုၚ်ဂှ်တုဲ ဇကုဂမ္တဴတုဲ မံၚ်ပရေံမ္ဂး သီုကောန်ၚာ်၊ သီုမၞိဟ်ဇၞော် ဒးထ္ၜးပ္ဍဲရုၚ်ဂဥုဲ၊ ဗ္ဒမ်ဂဥုဲ မကြပ်တံဂှ်ဏောၚ်တုဲ ယဝ်ဟွံထ္ၜးမ္ဂး ဒးဒုၚ်စသိုၚ်ဘဲယဲက္ဍၚ်မာန်ဏောၚ်ဂှ် ညးဆက်ဟီုရ။
ယဲပုၚ်ဝွံ ဟိုတ်နူက္တဵုဒှ် နူကဵုဇၟိတ်အေဒိသ် မက္ဍတ်ပါ်ကၠုၚ်နူကဵုဍာ်သ္အးဇ္ၚးတံ ကိတ်တုဲ ဒှ်ဂှ်ရ ကောန်ၚာ်သၟတ်အ်ကီု မၞိဟ်ဇၞော်တအ်ကီု သွက်ဂွံမံၚ်စံၚ် ညံၚ်ဟွံဂွံဒးဒုၚ်ကိတ်ကဵုဇၟိတ်ဂှ် နွံပၟိက်တုဲ သွက်ဂွံဂဒဵု၊ ကိုဟ်ဆာဲ၊ ပြံၚ်လှာဲ၊ စၟဳတ် လၟိုန်ဂှ်လေဝ် နွံပၟိက်ရောၚ် အ္စာဂဥုဲဂမၠိုၚ် ဖ္တိုက်ဖ္အောဝ်လဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ