ဗော်ဍုင်မန်တၟိ ‌‌AD လုပ်ဗ္တိုက် ဗ္ဒိုပ်ဒပ်ပၞာန် ပ္ဍဲမုဟ်ဍုၚ်မွဲ

မုဟ်ဍုၚ်၊ ဂျောန် ၁၂

ပ္ဍဲတွဵုရးဍုၚ်မန် ပွိုၚ်ဍုၚ်မုဟ်ဍုၚ် အကြာကွာန်နှေဟ်ဗဒဝ်ကဵု ကွာန်ယံၚ်ဒံၚ်ဂှ် ဗော်ဍုၚ်မန်တၟိ NMSP AD လုပ်စိုပ်ဗ္တိုက်လဝ် ဗ္ဒိုပ်ဒပ်ကံၚ်ဇြဳပၞာန် မဖျေံလဝ်ဒပ် ပ္ဍဲကဵုသ္ကုတ်ဂၠံၚ်မုဟ်ဍုၚ်−ဇြပ်ဗုဂှ် ဂွံတီကေတ် ဇရေၚ်တမ်ရိုဟ်ပရိုၚ်ဗလးတိရ။

ပ္ဍဲဂိတုဂျောန် ၁၁ အခိၚ်နူဂယး ၅ နာဍဳဝိုက်ဂှ် ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP AD လုပ်စိုပ်ဗ္တိုက်လဝ် ဒပ်ကံၚ်ဇြဳပၞာန် ဇြဟတ် ၃၀ ပြၚ် မဖျေံလဝ်ဒပ် ပ္ဍဲသ္ကဲဂၠံၚ်ကွဳစက် ဗ္ဒါဲကွာန်ယံၚ်ဒံၚ်ဂှ်ရ။

ဟိုတ်နူပရေၚ်ဗ္တိုက်ဏံတုဲ ပေါဲဗ္တိုက်ၜါလ္ပာ် က္တဵုဒှ်လဝ် လလအ်ပွိုၚ်မွဲနာဍဳပြၚ်တုဲ ဒပ်အမၠံက်ဖျေံသ္ဇိုၚ်မုဟ်ဍုၚ် စၟတ် ၃၁၈ ဂှ်လေဝ် ဘိုၚ်ပန်ကဵုလဝ်လွဟ်ဇၞော် ဟွံပိုတ်သ္ကုတ်ရောၚ် တမ်ရိုဟ်ပရိုၚ်ဗလးတိဂမၠိုၚ် ဟီုရ။

အပ္ဍဲပေါဲဗ္တိုက်ဂှ် ၜါလ္ပာ်ဇီုကပိုက်ချိုတ်တံ နွံဒၟံၚ်ရောၚ် ဂွံတီကေတ်ကီုလေဝ် လၟိဟ်ချိုတ်တ်ပၠိုတ်တ်ဂှ်တှ်ေ နကဵုသြၚ်လောန်တိုၚ်(မ်) ဆက်ဂၠိုက်ဂၠါဲဒၟံၚ်ဖိုဟ်ရ။

စပ်ကဵုပရူပရာပေါဲဗ္တိုက်ဂှ်တုဲ နူကဵုသြၚ်လောန်တိုၚ်(မ်) ဆက်စၠောံသၟာန်သၟုက်လဝ် ဇရေၚ်ညးမၞုံအခေါၚ်ဟီုဂး ဗော်ဍုၚ်မန်တၟိ NMSP AD နာဲဂံၚ်သကာကီုလေဝ် ဟွံဂွံတီကေတ်အကာဲအရာဏီပုဟ်ဂှ် ကလေၚ်သှ်လဝ်ကဵုရ။

အခိၚ်ပေါဲဗ္တိုက်ဒှ်ဂှ် ပ္ဍဲဂၠံၚ်မုဟ်ဍုၚ်−ဇြပ်ဗုဂှ် ကွဳစက်အာတရဴဂၠိုၚ်ကဵုကၠံ အာကၠုၚ်ဟွံဂွံဆိုအ်ဗဒၟံၚ် ပွိုၚ်မွဲနာဍဳပြၚ်တုဲ အခိၚ်နူဂယး ၜိုတ် ၈ နာဍဳဂှ် ကွဳစက်ဂမၠိုၚ် ကလေၚ်အာကၠုၚ်ဒၟံၚ် အတိုၚ်သၞောတ်တြေံရ။

သၞာံတုဲကၠုၚ် ဂိတုမေ ၂၀ တေံဂှ်လေဝ် ဗ္ဒိုပ်ဒပ်ကံၚ်ဇြဳပၞာန်မွဲ နွံဗ္ဒါဲကွာန်ယံၚ်ဒံၚ် ဒးဒုၚ်ဗ္တိုက်လဝ်တုဲ ကောန်ဒပ်ကံၚ်ဇြဳပၞာန်မွဲတၠ ချိုတ်အာလဝ်တုဲ မသုန်တၠ ဇီုကပိုက်ကလိဂွံလဝ်ဝပ်ရောၚ် NMSP AD လလောၚ်ပ္တိတ်လဝ်ပရိုၚ်ရ။

ပရိုၚ်−သြၚ်လောန်တိုၚ်(မ်)

ဗီုရုပ်− NMSP AD