မတ်မလီု၊ ဂျောန် ၂၂
တၞဟ်နသ္ဂောံကဵုမာဲ အပ္ဍဲပေါဲရုဲမာဲ ကံၚ်ဇြဳပၞာန် မကၠောန်ဗဒှ်အာဏံဂှ်တုဲ ပ္ဍဲတွဵုရးဍုၚ်မန်ဂှ် ဆက်ကၠောန်ကဵုဒၟံၚ် တၞးကာဒ်ကောန်ဍုၚ် နကဵုအစဳဇန်ကၠအ်ပ္ကဴ (ပန်းခင်းစီမံချက်) ကဆံၚ် (၃) ဂှ်ရောၚ် ထ္မံက်ထ္ၜးလဝ် ပ္ဍဲလိက်ပရိုၚ်တြးဝါဒ ကံၚ်ဇြဳပၞာန်တအ်ရ။
ဇၟာပ်ကောန်ဍုၚ် မကလိဂွံအခေါၚ်ကဵုမာဲတအ် ရပ်ကေတ်တၞးကာဒ်မွဲမွဲဂကူတုဲ သွက်ဂွံကဵုမာဲမာန် ညံၚ်လၟိဟ်မရန်လဝ်ဂွံပေၚ်ဂှ် ပ္ဍဲတွဵုရးဍုၚ်မန်ဏံ ရေၚ်တၠုၚ်ကဵုဒၟံၚ် နကဵုအစဳဇန်ကၠအ်ပ္ကဴဂှ်ရောၚ် ဥူမျေတ်ကျိုၚ် မဒှ်ဝန်ဇၞော်ကၟိန်ဍုၚ် ဌာနဝန်ဇၞော်ကောပ်ကာဲပရေၚ်မၞိဟ်လုပ် ကံၚ်ဇြဳပၞာန်မပတိုန်လဝ်ဂှ် ဟီုကၠုၚ်လဝ်ရ။
ပ္ဍဲဂိတုဂျောန် ၁၉ တုဲကၠုၚ်တေံ ညးဟီုကၠုၚ်လဝ် ကုဌာနမဆေၚ်စပ်သၟဝ်တဲညးဂမၠိုၚ် ပ္ဍဲကဵုကောံဓရီုဆဵုဂဗ ကုကမ္မတဳကောပ်ကာဲ သ္ဂောံကံက်စရၚ်ပ္ဍဲဗလးတိ ကဆံၚ်တွဵုရး၊ ကဆံၚ်ခရိုၚ် ကေုာံ ကဆံၚ်ပွိုၚ်ဍုၚ် မကၠောန်ဗဒှ်လဝ် ပ္ဍဲရုၚ်အလဵုအသဳတွဵုရးဍုၚ်မန် လ္တူဍုၚ်မတ်မလီုရ။
သ္အာၚ်နူဂှ်ပၠန် စဵုကဵုဂိတုအံက်တဝ်ဗာ (၃၁) တေံ သွက်ဂွံကၠောန်ပ္တိတ်ကဵုအာ တၞးကာဒ်ကောန်ဍုၚ် လၟိဟ် ၁၉၀၀၀ ပြၚ် သွက်ညးအာယုက်ပေၚ် ၁၈ တုဲဂမၠိုၚ် နကဵုအစဳဇန်ကၠအ်ပ္ကဴ ကဆံၚ် (၃) ဂှ်လေဝ် ရေၚ်တၠုၚ်ဒၟံၚ်နွံရောၚ် သ္ဂးရ။
ညးဒေသတွဵုရးဍုၚ်မန် ဟွံမိက်ထ္မံက်ယၟုမွဲတၠဂှ်တှ်ေ ကံၚ်ဇြဳပၞာန် ပတိတ်ကဵုဒၟံၚ်ညးဍုၚ်ကွာန်တအ် တၞးကာဒ်ကောန်ဍုၚ်ဂှ်ဝွံ ဟိုတ်နူစေတနာနွံလ္တူညးဍုၚ်ကွာန်တံတုဲ ကၠောန်ကဵုဒၟံၚ်ဟွံသေၚ် ရန်ကဵုတၞဟ်နသ္ဂောံကဵုမာဲ ကုညးတအ်တုဲ ကၠောန်ဒၟံၚ်ရောၚ် ပါ်ပါဲလဝ်ရ။
“ညအ်ဂှ် သောၚ်ဒၟံၚ်ရ။ ပ္ဍဲလက်ထက်ဥူတုၚ်ဇြုၚ်တေံလေဝ် ဗီုဏံရဏောၚ်။ မၞိဟ်အာယုက်ပေၚ် ၁၈ တုဲ ဂွံကဵုမာဲဂှ် ဟိုတ်နူတၞးကာဒ်ကောန်ဍုၚ်ဟွံမွဲဂှ်ရ ပတိတ်ကဵုလဝ်သမာတ်ကာတ်ဂှ်နွံ။ ညအ်ဂှ်လေဝ် ကၠောန်ဒၟံၚ် ညံၚ်ညးတအ် ဂွံဂွံမာဲရဏောၚ်၊ စေတနာနွံတုဲ ကောန်ကဵုဒၟံၚ်ဟွံသေၚ်ပုဟ်။ ညအ်ဂှ်လေဝ် အဓိကဂှ်တှ်ေ မၞိဟ်အာယုက် ၁၈ ပေၚ်တုဲတအ်ဂှ် ပတိတ်ကဵုကာတ်ဏံတုဲ စုတ်မာဲကဵုကာတ်ဏံ။ အဓိကဂှ်တှ်ေ ကၠောန်ဒၟံၚ်သွက်ညးတအ်သၟးရဏောၚ်” သာ်ဝွံ သ္ဂးရ။
သ္အာၚ်နူဂှ်ပၠန် ပ္ဍဲအရာကံၚ်ဇြဳပၞာန် ကၠောန်ပ္တိတ်ကဵုတၞးကာဒ်ကောန်ဍုၚ်ဂှ်တှ်ေ ညးမထံက်ဂလာန်လ္ပာ်ကံၚ်ဇြဳပၞာန်၊ ကောန်ဗော်ပရေၚ်ဍုၚ်ကွာန် ဒတူလိုၚ်လ္ပာ်ကံၚ်ဇြဳပၞာန်တအ်ကဵု ညးမစုက်လုက်ကဵုအုပ်ဓုပ်ကွာန်အရာပ်တအ်ဂှ်ရ သ္ပအဓိက ကၠောန်ကဵုဒၟံၚ်ရောၚ် ညးဆက်ဟီုရ။
ညးဒေသတွဵုရးဍုၚ်မန် ဟွံမိက်ထ္မံက်ယၟုမွဲတၠပၠန်ဂှ်လေဝ် ပ္ဍဲအရာကၠောန်ကဵုတၞးကာဒ်ကောန်ဍုၚ်ဂှ် ကဵုက္ဍိုပ်ကၠောန်ကဵုဒၟံၚ် ညးမကဵုမာဲကုညးတအ်သၟးဂှ်တုဲ ကုညးမရှ်ေသှ်ေဘာသာတၞဟ်ဟ်တအ်ကဵု ညးဆီနှဴဂကူတၞဟ်ဟ်တံဂှ်တှ်ေ ဒးကဵုသြန်ဂၠိုၚ်ကဵုဆတုဲဟေၚ် ကၠောန်ကဵုဒၟံၚ်ရောၚ် ဟီုရ။
“တၞးကာဒ်ကောန်ဍုၚ်ဂှ်တှ်ေ ကၠောန်ကဵုမံၚ်ရ။ ဆ္ဂး မၞိဟ်ဆီနှဴတအ်ဂှ်ဟွံပါပုဟ်။ ကဵုက္ဍိုပ်ကဵုမၞိဟ်လ္ပာ်ညးတအ်တုဲ မၞိဟ်ကဵုမာဲကုညးတအ်မာန်ဂှ်ရ စွံအဓိက ကၠောန်ကဵုမံၚ်ဂှ်ဂၠိုၚ်။ ရံၚ်ကေတ်တှ်ေ ဇၟာပ်ကောန်ဍုၚ်မံၚ်ဒၟံၚ်ပ္ဍဲဍုၚ်ဏံဖအိုတ်ဂှ် ဒးကလိဂွံအခေါၚ်ရပ်တၞးကာတ်ကောန်ဍုၚ်ဂှ်ဏောၚ်လေဝ်။ လၟုဟ်ဂှ် ၜိုတ်မၞိဟ်ဍေံတံနွံပၟိက်ဂှ်ရ ကဵုက္ဍိုပ် ကဵုကၠောန်ဒၟံၚ်တုဲ မၞိဟ်ရှ်ေသှ်ေဘာသာတၞဟ်သ္အာၚ်၊ မၞိဟ်ဆီနှဴတအ်ဂှ်တှ်ေ ကၠောန်ဂှ် ကၠောန်ကဵုမံၚ်ရ။ ဆ္ဂး ဒးကဵုသြန် ပိကိုဋ်ဘာ် ပန်ကိုဋ်ဏောၚ်။ ကဵုတုဲ အပ္ဍဲၜါပိတ္ၚဲဂှ် ဂွံဟဂှ်ရ” သာ်ဝွံ သ္ဂးရ။
ကံၚ်ဇြဳပၞာန် ပ္ဍဲအရာမပတိတ်ကဵုတၞးကာဒ်ကောန်ဍုၚ်ဂှ် ပတိတ်လဝ်ကဵုတၞးကာဒ်ကောန်ဍုၚ်တုဲဒှ်ဂှ်ရ စန်ဒက်ဟီုဂးကၠုၚ် ဟွံဒေါအ်ဟွံဂွံ သွက်သ္ဂောံကဵုမာဲ အပ္ဍဲပေါဲရုဲမာဲဏံဂှ်လေဝ် နွံဏောၚ်ဂှ် ညးဆက်ဟီုရ။
ညးတၞးကာဒ်ကောန်ဍုၚ်ဟွံမွဲ ကေုာံ ညးမအာတ်ပ္တိုန်လဝ်သွက်ဂွံလှာဲတအ်ဂှ်တှ်ေ ကံၚ်ဇြဳပၞာန် ကၠောန်ကဵုဒၟံၚ် နကဵုအစဳဇန်ကၠအ်ပ္ကဴ ကဆံၚ် (၃) ဂှ်တုဲ ညးတၞးကာဒ်ကောန်ဍုၚ်နွံတုဲတုဲတံဂှ်တှ်ေ ကံက်ကေတ်ဒၟံၚ် တၚ်နၚ်ပူဂဵု၊ တၚ်နၚ်မဆေၚ်စပ်ကဵုပူဂဵု ဗွဲခမၞန် နကဵုသၞောတ် e-ID တုဲ ပတိတ်ကဵုဒၟံၚ်ဂၞန် (Unique ID) ဂၞန် ၁၀ မ ပါဂှ်ရောၚ် သ္ဂးရ။
ကံၚ်ဇြဳပၞာန်ဝွံ ကၠောန်အာပေါဲရုဲမာဲ ပ္ဍဲကၞောတ်သၞာံဏံကဵု သၞာံတၟိမံက်တေံဏောၚ်ဂှ် ဟီုလဝ်တုဲ ဂွံဇၞးကေတ်မာဲပ္ဍဲပေါဲရုဲမာဲဂှ် သၠုၚ်ပတိုန်အသိၚ် ပတိတ်ကဵုကၠုၚ်ဒၟံၚ် တၞးကာဒ်ကောန်ဍုၚ်ရ။
ပ္ဍဲတွဵုရးဍုၚ်မန်ဂှ်တှ်ေ စပ်ကဵုပေါဲရုဲမာဲဟွံဗဗွဲဓဝ် ကံၚ်ဇြဳပၞာန်သီအဝဵု မကၠောန်ဗဒှ်အာဂှ်တုဲ နကဵုညးဍုၚ်ကွာန်ဂမၠိုၚ် လ္ပပံၚ်တောဲရေၚ်တၠုၚ်အိုတ်ညိဂှ် ဂကောံဇြဟတ်ပၠန်ဂတးဂမၠိုၚ် ဖတိုက်ဖ္အောဝ်လဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−MOI