မတ်မလီု၊ ဂျောန် ၂၄
ကံၚ်ဇြဳပၞာန် ကဵုလဝ်တၠကမၠောန်မွဲတၠ အခေါၚ်ကၠောန်ပ္ဍဲတိ မၞုံ Ocean Super Center အပ္ဍဲကၠအ်ပ္ကဴသၚ်လောန် လ္တူဍုၚ်မတ်မလီု တွဵုရးဍုၚ်မန်ဂှ် ဂွံတီကေတ် ဇရေၚ်ညးမစုက်လုက်ကဵုကံၚ်ဇြဳပၞာန်ရ။
သွက်ဂွံသိုၚ်ခၞံဒၞါဲဝေၚ်ဂတာပ်ခေတ် ပ္ဍဲကဵုတိဏံ မၞုံၜိုတ် ၂ ဨကဂှ်တုဲ ကံၚ်ဇြဳပၞာန် ကဵုလဝ်အခေါၚ်ကၠောန်ရောၚ် ဂၠိုက်ဂၠါဲဂွံတီကေတ်ရ။
နူကဵုဂကောံရေၚ်တၠုၚ်ပရေၚ်သ္အးဇ္ၚးတဴတက်တွဵုရးဍုၚ်မန်တအ် ကော်ကၠုၚ်တေန်ဒါ သွက်ဂွံသိုၚ်ခၞံဒၞါဲဝေၚ်ဂတာပ်ခေတ် ပ္ဍဲဒၞါဲတိဏံတုဲ တၠကမၠောန်မအာတ်ပ္တိုန်လဝ်မွဲတၠဂှ် ဖျေံကဵုလဝ်ညးအခေါၚ်ကၠောန်ရ။
ဆ္ဂး တၚ်နၚ်မဆက်စပ်ကဵု သၞာံအပိုၚ်အခြာ လိၚ်ကဵုလဝ်တိ၊ တၚ်နၚ်မပါလုပ်ပ္ဍဲလိက်ကသုက် ကေုာံ တၚ်နၚ်မဆက်စပ်ကဵုတၠကမၠောန်ပရေၚ်ပိုန်ဒြပ် မကလိဂွံအခေါၚ်ကၠောန်တံဂှ် နူကဵုသြၚ်လောန်တိုၚ်(မ်) ဆက်ဂၠိုက်ဂၠါဲဒၟံၚ်ဖိုဟ်ရ။
ပ္ဍဲကဵုဒၞါဲတိ အပ္ဍဲကၠအ်ပ္ကဴသၚ်လောန်ဏံဂှ် ကၠာတေံ ကေၚ်ကၠောန်ဗဒှ်လဝ်အသေအဟာန်ဂမၠိုၚ် မဆက်စပ်ကဵုတွဵုရး မပ္တံကဵု အသေအဟာန်တ္ၚဲတွဵုရးဍုၚ်မန်၊ အသေအဟာန်တ္ၚဲတွဵုကောန်ဂကူကရေၚ်တအ်ရ။
စပ်ကဵုပရေၚ်ကဵုလဝ်တၠကမၠောန်မွဲတၠ အခေါၚ်ကၠောန်ၜိုတ် ပ္ဍဲကဵုဒၞါဲတိ မၞုံၜိုတ် ၂ ဨကပြၚ် အပ္ဍဲကၠအ်ပ္ကဴသၚ်လောန်ဍုၚ်မတ်မလီုဂှ်တုဲ နူကဵုသၚ်လောန်တိုၚ်(မ်) ကေတ်အဆက်သၟာန်သၟုက်လဝ် ဇရေၚ်ဒံက်တာအံၚ်မျာတ်ကျဝ်ဇြုၚ် ညးမၞုံအခေါၚ်ဟီုဂး ကံၚ်ဇြဳပၞာန် တွဵုရးဍုၚ်မန်ကီုလေဝ် ဒုၚ်တဲသှ်ကဵုလဝ်ဂှ် ဟွံမွဲရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ