မတ်မလီု၊ ဂျောန် ၂၉
ပ္ဍဲတွဵုရးဍုၚ်မန် သွက်ဂွံကဵုမာဲ နကဵုစက်ကဵုမာဲအဳလက်ထရဝ်နေတ်ဗၟာ MEVM မာန် အပ္ဍဲပေါဲရုဲမာဲ ကံၚ်ဇြဳပၞာန် ကၠောန်ဗဒှ်အာဏံဂှ်ဂးတုဲ ကဝ်မယှေန်ပေါဲရုဲမာဲကၟိန်ဍုၚ် ကံၚ်ဇြဳပၞာန်ခါန်ကၞက်ပ္တိုန်လဝ်ဂှ် စမ်ၜတ်ကၠုၚ်နတဲရ။
ပ္ဍဲဂိတုဂျောန် ၂၇ တေံ ကၠောန်ဗဒှ်လဝ် အသေအဟာန်စမ်ၜတ်ကဵုမာဲနတဲ နကဵုစက်ကဵုမာဲ MEVM ပ္ဍဲၝောံခန်ပအပ်ဇိုန်ကဵုတဆိပ်ကြာ တက္ကသိုလ်နဲကွတ်ပညာမတ်မလီု လ္တူဍုၚ်မတ်မလီုဂှ်ရောၚ် ထ္မံက်ထ္ၜးလဝ် ပ္ဍဲလိက်ပရိုၚ်တြးဝါဒ ကံၚ်ဇြဳပၞာန်ရ။
ပ္ဍဲကဵုအသေအဟာန်စမ်ၜတ်ကဵုမာဲ နကဵုစက် MEVM ဂှ် ဥူဂိုဝ်ဝ်လွေန် ကောန်ဂကောံကဝ်မယှေန်ပေါဲရုဲမာဲကၟိန်ဍုၚ် ကံၚ်ဇြဳပၞာန် မခါန်ကၞက်ပ္တိုန်လဝ်ဂှ် တိုန်စိုပ်လဝ်တုဲ ထ္ၜးပျးလဝ် ကုညးတာလျိုၚ် ကဝ်မယှေန်ပေါဲရုဲမာဲတွဵုရးဍုၚ်မန်တအ်၊ အ္စာ အ္စာဗြဴ တက္ကသိုလ်နဲကွတ်ပညာမတ်မလီု သီုကဵုကွးဘာဂမၠိုၚ်ရ။
သၟတ်ဒေသတွဵုရးဍုၚ်မန် ဟွံမိက်ထ္မံက်ယၟုမွဲတၠဂှ်တှ်ေ လ္တူပေါဲရုဲမာဲကံၚ်ဇြဳပၞာန် မကၠောန်ဗဒှ်အာဂှ် ဓဝ်ပတှ်ေဟွံမွဲတုဲ ဟိုတ်နူပေါဲရုဲမာဲတုဲ ပဋိပက္ခဇၞော်ကၠုၚ်မာန်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ပိုယ် ဓဝ်ပတှ်ေဟွံမွဲပုဟ်။ ပေါဲရုဲမာဲဏံဟီုဂှ် ဒှ်ပၞော်တိတ်ဍေံတံရဏောၚ်။ ဟိုတ်ဂှ်ရ ဟွံဒှ်ညံၚ်ဂွံဒှ် ဍေံတံကၠောန်ဏောၚ်။ မွဲလ္ပာ်ဂှ်ပၠန်လေဝ် ယဝ်တာဒၞါကၠေံမ္ဂး ပဋိပက္ခဂှ် ဇၞော်ကၠုၚ်ဏောၚ်။ ဒှ်ကၠုၚ်ပရေံပရေံဖအိုတ်ရဏောၚ် ထေၚ်ကေတ်ရ။ တၟံကၠံပေၚ်ၚ် အံၚ်ဇၞးဏောၚ်ဂှ် ဟွံထေၚ်ပုဟ်” သာ်ဝွံ သ္ဂးရ။
သ္အာၚ်နူဂှ်ပၠန် ပေါဲရုဲမာဲကံၚ်ဇြဳပၞာန် မကၠောန်ဗဒှ်အာဂှ်ဝွံ ဂွံဂွံဆန္ဒမာဲညးဍုၚ်ကွာန်အလုံအိုဿီု ဒှ်ဟွံမာန်တုဲ အလဵုအသဳ ကေုာံ ကၠတ်ထဝ် မမံက်ကၠုၚ်ဂှ်လေဝ် သ္ပစၞးညးဍုၚ်ကွာန်ဟွံသေၚ်ဂှ်ရ ၜိုန်ကၠောန်ပေါဲရုဲမာဲကီုလေဝ် မုမွဲမှတၟေၚ်ကၠုၚ်ဟွံသေၚ်ပုဟ်ဂှ် ညးဆက်ဟီုရ။
က္ဍိုပ်သ္ကိုပ်ပၞာန်သီအဝဵုဂှ်တှ်ေ ဟီုလဝ် ကၠောန်အာပေါဲရုဲမာဲ ကၞောတ်သၞာံဏံကဵု သၞာံတၟိမံက်တေံဏောၚ်တုဲ ပ္ဍဲကဵုဒေသညးတံမထိၚ်ဒက်လဝ်ဂှ် ကံၚ်ဇြဳပၞာန် ပလေဝ်ပလေတ်ကၠုၚ်ဒၟံၚ်အဆက်က် သွက်ဂွံကၠောန်ပေါဲရုဲမာဲရ။
ပ္ဍဲတွဵုရးဍုၚ်မန်ဂှ် ၜိုန်ရကံၚ်ဇြဳပၞာန် ကၠောန်ဒၟံၚ်ပေါဲရုဲမာဲကီုလေဝ် ပ္ဍဲကဵုဒေသဂကောံဇြဟတ်ပၠန်ဂတး အပ္ဍဲဒေသတအ် ထိၚ်ဒက်ဂွံလဝ် ပ္ဍဲပွိုၚ်ဍုၚ်ကျာ်ထဝ်၊ ပွိုၚ်ဍုၚ်ၜဳကလေၚ်၊ ပွိုၚ်ဍုၚ်သဓီု၊ ပွိုၚ်ဍုၚ်ကျာ်မြဟ်၊ ပွိုၚ်ဍုၚ်ဇြပ်ဗု ကေုာံ ပွိုၚ်ဍုၚ်ေရဝ်တံဂှ်တှ်ေ ကၠောန်ဗဒှ်ပေါဲရုဲမာဲပေၚ်ၚ်မာန်ဟွံသေၚ်ရ။
လ္ပာ်ဂကောံဇြဟတ်ပၠန်ဂတးတအ်ဂှ်တှ်ေ နကဵုညးဍုၚ်ကွာန်ဂမၠိုၚ် လ္ပပံၚ်တောဲပါလုပ် ပ္ဍဲပေါဲရုဲမာဲကံၚ်ဇြဳပၞာန် မဟွံမွဲကဵုဗဗွဲဓဝ်ဂှ်ညိဂှ် ဖတိုက်ဖ္အောဝ်လဝ် နွံရ။
ပရိုၚ်−သြၚ်လောန်တိုၚ်(မ်)
ဗီုရုပ်−MOI