ဍာ်ဗု၊ ဂျောန် ၂၄
ဒပ်ကံၚ်ဇြဳပၞာန် ဗက်ထ္ပက်ဒၟံၚ်ကရောၚ်ပၞာန် ပ္ဍဲကဵုကွာန်ဂမၠိုၚ် မၞုံအပ္ဍဲပွိုၚ်ဍုၚ်ဍာ်ဗု ရးတၞၚ်သဳဂှ်တုဲ ညးဒေသဒးပါဲဘဲပၞာန် ၃၀၀၀ ပြၚ် ဟွံဂံၚ်ကလေၚ်စဴဌာန်ဒၟံၚ်ဏီပုဟ်ဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကရောၚ်ပၞာန်ကံၚ်ဇြဳပၞာန် ဇြဟတ်မၞုံ ဗ္ဒါဲ ၁၅၀ ဂှ်ဝွံ ပပ္တံနူဂိတုဂျောန် ၁၈ တုဲ နူဒေသသၞေဟ်ဍာ်ဒမျိုဟ်ထဝါဲဂှ် ဂေတ်ကၠုၚ်လ္ပာ်ကွာန် မၞုံအပ္ဍဲပွိုၚ်ဍုၚ်ဍာ်ဗုတံဂှ်တုဲ ထ္ပက်ဒၟံၚ်ကရောၚ်ပၞာန်ရ။
ဟိုတ်နူဒပ်ကံၚ်ဇြဳပၞာန် ထ္ပက်ဒၟံၚ်ကရောၚ်ပၞာန်တုဲ ညးဒေသ ၃၀၀၀ ပြၚ် နူကဵုကွာန် (စခန်းကြီး၊ ဖွားဘုတ်ပြင်၊ ဘူချိုင်း၊ ပိန်းရှောင်၊ သစ်တိုထောက်၊ ရလိုင်၊ ကျောက်ဝပ်ကုန်း၊ ဝက်ချောင်း၊ ခမောက်ချောင်း၊ ဧကနိ) ဒးဂြိပ်ဒဴဒၟံၚ်ရ။
ညးဍုၚ်ကွာန်ပါဲဘဲပၞာန်ဂမၠိုၚ်ဝွံ ဒးပါဲဒလေတ်မံၚ်တန်တဴဒၟံၚ် ပ္ဍဲကဵုကွာန်ဗၠးဘဲဂမၠိုၚ်၊ ပ္ဍဲကဵုကၠအ်ဂူ ကေုာံ ပ္ဍဲအကြာဒဵုတံဂှ်တုဲ နွံပၟိက်ဒၟံၚ်ကဵု အရီုဗၚ်ပရေၚ်ဗ္စာရဏာမၞိဟ်ရောၚ် သ္ဂးရ။
သ္အာၚ်နူဂှ်ပၠန် အပ္ဍဲတ္ၚဲအကြာတအ်ဏံ ဟိုတ်နူဗြဲဂူဆက်ဒၟံၚ်တုဲ ညးဍုၚ်ကွာန်ပါဲဘဲပၞာန်လ္ၚဵု ဒးဗြဲတုဲ ဒှ်ဒၟံၚ်ယဲဇွဟ်ကဵု ယဲဇွဟ်ဂစေံတံလေဝ် နွံရောၚ် ဂွံတီကေတ်ရ။
ကရောၚ်ပၞာန်ကံၚ်ဇြဳပၞာန်ဝွံ ပ္ဍဲဂိတုဂျောန် ၂၃ ဂှ် ဆက်နွံဒၟံၚ် ဗ္ဒါဲပွဳပွူကွာန်ရလိုၚ်တုဲ ဒဵုအခိၚ်လၟုဟ် ဒှ်ကၠုၚ်ပေါဲဗ္တိုက် ကုဒပ်ပံၚ်ကောံပၠန်ဂတးတအ်ဂှ် ဟွံမွဲဏီရ။
အတိုၚ်လိက်ဒုၚ်စဳရေၚ် ဂကောံသုတေသနဖျေံသ္ဇိုၚ်ဒေသ FE5 Thanintharyi ဂှ်မ္ဂး ပ္ဍဲရးတၞၚ်သဳဂှ် ဟိုတ်နူပေါဲဗတိုက် ကေုာံ ဟိုတ်နူကံၚ်ဇြဳပၞာန် ပန်ပှော်ကဵုလွဟ်ဇၞော်တံဂှ်တုဲ လၟိဟ်ညးဒးပါဲဘဲပၞာန် နွံကၠုၚ် စဵုကဵု ၈၀၀၀၀ ပြၚ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ