ကအ်ကြိက်၊ ဂျောန် ၂၉
ဒပ်ကံၚ်ဇြဳပၞာန် ကဵု ဒပ်ပံၚ်ကောံပၠန်ဂတးတအ် ဒှ်ဒၟံၚ်ပေါဲဗ္တိုက် လ္တူဂၠံၚ်ဇၞော်အာယှ ကေုာံ လ္တူဂၠံၚ်ကြုၚ်ဒဵု−ကအ်ကြိက် တွဵုရးကရေၚ် ကြပ်အရိုဟ်တ္ၚဲရောၚ် တမ်ရိုဟ်ပရိုၚ်ပရေၚ်ပၞာန်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အကြာဒပ်ပံၚ်ကောံပၠန်ဂတးမဟာမိတ် သၟဝ်သ္ကိုပ်သ္က KNLA ကဵု ကရောၚ်ပၞာန်ဒပ်ကံၚ်ဇြဳပၞာန် သၟဝ်တဲၝောံဒပ် (၄၄) ၊ ၝောံဒပ် (၅၅) ဂှ် တုဲကၠုၚ်ဂိတုဂျောန် စၟတ်တ္ၚဲ ၁၉ တေံ ကလေၚ်ဒှ်လဝ်ပေါဲဗ္တိုက် လ္တူဂၠံၚ်ကြုၚ်ဒဵု−ကအ်ကြိက် ပ္ဍဲတွဵုရးကရေၚ်ရ။
အပ္ဍဲပေါဲဗတိုက်ဆေၚ်မုက်ဂှ် လ္ပာ်ဒပ်ကံၚ်ဇြဳပၞာန် ဟွံအောန်နူ ၃၀ တၠ ချိုတ်အာလဝ်တုဲ သီုသ္ကိုပ်တမ်ဒပ်မွဲတၠ မပါလုပ် ဗၞတ် ၁၀ တၠ ကလိဂွံလဝ်ဝပ်တုဲ ဒပ်ပံၚ်ကောံပၠန်ဂတးတအ် သီဂွံလဝ် မကမ်လွဟ်လက်နက်ဗွဲမဂၠိုၚ်ရ။
သွက်သ္ဂောံကလေၚ်ထိၚ်ဒက် မွဲဒမြိပ်ဂၠံၚ်ကွဳစက် ကြုၚ်ဒဵု−ကအ်ကြိက် နူဒပ်ပံၚ်ကောံပၠန်ဂတးတအ် မအုပ်ဓလီုဂွံလဝ်ဂှ်တုဲ ဒပ်ကံၚ်ဇြဳပၞာန် ထ္ပက်ကၠုၚ်ဒၟံၚ်ကရောၚ်ပၞာန် နူကဵုဍုၚ်ကအ်ကြိက်မွဲကဆံၚ်တုဲ နူဍုၚ်ကြုၚ်ဒဵုဂှ်လေဝ် ထ္ပက်ကၠုၚ်ဒၟံၚ်ကရောၚ်ပၞာန်ရောၚ် တမ်ရိုဟ်ပရိုၚ်ပရေၚ်ပၞာန်ဂမၠိုၚ် သ္ဂးရ။
ကရောၚ်ပၞာန်ဒပ်ကံၚ်ဇြဳပၞာန် မထ္ပက်ကၠုၚ်ကရောၚ်ပၞာန် နူကဵုဍုၚ်ကအ်ကြိက်ဂှ်ဝွံ ဒှ်ဒပ်သၟဝ်တဲကရောၚ်ပၞာန်အံၚ်ဇေယျတုဲ ကရောၚ်ပၞာန်ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် နူကြုၚ်ဒဵုဂှ်တှ်ေ ဒှ်ဒၟံၚ်ကရောၚ်ပၞာန် ၝောံဒပ် (၄၄) ၊ ၝောံဒပ် (၅၅) တံပါလုပ်ရောၚ် ဂွံတီကေတ်ရ။
ကောန်ဒပ်ကံၚ်ဇြဳပၞာန် ၂ တၠ နူဒပ်သၟဝ်တဲကရောၚ်ပၞာန်အံၚ်ဇေယျ မထ္ပက်ကၠုၚ်ကရောၚ်ပၞာန် ပတဝ်ကၠုၚ်က္ဍိုပ် လ္ပာ်ဍုၚ်ကြုၚ်ဒဵု မကၠုၚ်နူကဵုကအ်ကြိက်ဂှ်ဝွံ လုပ်စိုပ်ဖျေံလဝ်လွဟ် ဇရေၚ်ကရောၚ်ပၞာန် Lion Battalion Commando သၟဝ်က္ဍိုက်ပ် ဗိုလ်အေဝ်သေဝါဂှ် ဂွံတီကေတ် အတိုၚ်တၚ်လလောၚ်တြးပရိုၚ် ကရောၚ်ပၞာန် Lion Battalion Commando ရ။
ပ္ဍဲကဵုလၟိဟ်ကောန်ဒပ်ကံၚ်ဇြဳပၞာန် လုပ်စိုပ်ဖျေံကၠုၚ်လွဟ် ဇရေၚ်ကရောၚ်ပၞာန် Lion Battalion Commando ဂှ် အပံၚ်ဖအိုတ် ၂၀ ပြၚ် နွံယျတုဲ ဒဒှ်ရဗိုလ်အေဝ်သေဝါ ဟီုလဝ် နကဵုသၟတ်ကောန်ဒပ်ကံၚ်ဇြဳပၞာန်သှ်ေဒၟံၚ်ဂမၠိုၚ် ဂွံလုပ်စိုပ်ဖျေံလွဟ်ဂှ် ထ္မံက်ထ္ၜးလဝ် ပ္ဍဲကဵုပရိုၚ်ရုပ်ရမျာၚ် ကရောၚ်ပၞာန် Lion Battalion Commando ရ။
သ္အာၚ်နူဂှ်ပၠန် အကြာကရောၚ်ပၞာန်အံၚ်ဇေယျ ဒပ်ကံၚ်ဇြဳပၞာန် မစိုပ်ဒၟံၚ်ဂၠံၚ်ဇၞော်အာယှ ဗြဝတဳ−ကအ်ကြိက်ဂှ်ကဵု ဒပ်ပံၚ်ကောံပၠန်ဂတး KNLA တအ်ဂှ် ဒှ်ဒၟံၚ်ပေါဲဗတိုက် ကြပ်အရိုဟ်ဒဒှ်တ္ၚဲတုဲ ကောန်ဒပ်ကံၚ်ဇြဳပၞာန်တအ် အာကၠုၚ်ဟွံဂွံဒှ်ဒၟံၚ်ရောၚ် ဂွံတီကေတ် အတိုၚ်ဂလာန်ပရိုၚ်ပရေၚ်ပၞာန်တအ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ