နေဗျဳဒဝ်၊ ဂျောန် ၂၄
ကမ္ပဏဳတရဴကျာဇၞော်အိုတ်ယူရောပ် AIRBUS ဒေါအ်ကၠေံပရေၚ်ပံၚ်တောဲ ကုကမ္ပဏဳနဲကွတ်ပညာပရေၚ်ပၞာန် ကေုာံ ပရေၚ်ကၠောန်ပ္တိတ်က္ၜၚ်ကျာ ဒပ်ပၞာန်အလဵုအသဳကြုက်ပိုၚ် AviChina ဂှ်ဝွံ ဇီုကပိုက်ကၠုၚ် ကုဂကောံပၞာန်မာန်ရောၚ် ဂကောံချဳဒရာၚ်ပရေၚ်ထပိုတ်သြန်ဆီဍေက် Blood Money Campaign ကဵုလဝ်သမ္တီရ။
ပ္ဍဲဂိတုဨပရဴ ၁ တေံ AIRBUS စဒေါအ်လဝ် ပရေၚ်ပံၚ်တောဲ ဓလိုက်တမ်ရိုဟ် ကုကမ္ပဏဳ AviChina Industry & Technology Company Limited မဒှ်ကမၠောန်လစှ်ေ ကမ္ပဏဳ AVIC ဒပ်ပၞာန်အလဵုအသဳကြုက်ပိုၚ် မထံက်ပၚ်ကဵုဒၟံၚ်ဂကောံပၞာန်ဗၟာတအ် က္ၜၚ်ကျာ၊ လွဟ်လက်နက်ပၞာန် ကေုာံ နဲကွတ်ပညာတံဂှ်ရ။
ပွမဒေါအ်ကၠေံပရေၚ်ပံၚ်တောဲ မဆေၚ်စပ်ကဵုပရေၚ်ဓလိုက်တမ်ရိုဟ် သာ်ဏံဂှ်ဝွံ နဒဒှ်ပရေၚ်ဍုၚ်ကွာန်ဂှ် အာဇီုကပိုက်ကဵု ဂကောံပၞာန်ဗမာတအ် ဇၞော်ကဵုဇြဟတ်ဏောၚ်တုဲ သွက်ကမ္ပဏဳအလဵုအသဳကြုက် AVIC ဂှ်လေဝ် ဒှ်သ္ဇက်အရာမဒးဂွမွဲရောၚ်ဂှ် Blood Money Campaign သ္ဂးရ။
သ္အာၚ်နူဂှ်ပၠန် ပရေၚ်ဇီုကပိုက်ဇၞော်ကဵုဇြဟတ် လ္တူပရေၚ်ပံၚ်တောဲ အကြာ AIRBUS ကဵု AVIC ဂှ်လေဝ် နွံကၠုၚ်ဏောၚ်တုဲ အရာဏံဝွံ ဗွိုၚ်မၞိဟ်မၞုံကဵုဂုန်သိက္ခာတအ် ဒဒှ်ရဟွံဒုၚ်တဲ အမှုရာဇဝတ် ဂကောံပၞာန်တအ် မကလိလောန်ဒၟံၚ်ဂှ် ထ္ၜးပျးဒၟံၚ်ရ။
အတိုၚ်တၚ်နၚ် Justice For Myanmar ဂှ်မ္ဂး ဗၞိက်ပ္တိတ်နူ AviChina တံဂှ်ဝွံ က္ၜၚ်ကျာပကတ်ပ္ကေၚ် K-8 / က္ၜၚ်ကျာဗတိုက်သာသာတံကဵု က္ၜၚ်ကျာ Y-12 တအ် ပါလုပ်တုဲ သီုၜါဂကူဏံဂှ် ဒပ်ပၞာန်ဗၟာ ရပ်စပ်စကာဒၟံၚ် ပ္ဍဲအရာဗ္တိုက်ပၞာန်ကျာ မစွံကၠုၚ်ပွန် လ္တူညးဍုၚ်ကွာန်ကောန်အရာပ်အလုံဍုၚ်မွဲရ။
AIRBUS ဝွံ ဒှ်တၠယှေဝ်ယျာဍုၚ်သ္အာၚ်ဇၞော်အိုတ်မွဲ မပိုၚ်ပြဳလဝ်ယှေဝ်ယျာ ပ္ဍဲကဵု AviChina ၅ ဒဿမ ၀၃ တၟံကၠံတုဲ အတိုၚ်စရၚ်စဵုကဵုသၞာံ ၂၀၂၄ ဂိတုဂျောန်ဂှ်မ္ဂး ၚုဟ်မးဓလိုက်တမ်ရိုဟ်ဂှ် သြန်အမေရိကာန် ၁၄၀ ပြကောဋိကိုဋ်ဒဝ်ဠာနွံရ။
အခိၚ်လၟုဟ် AIRBUS ဝွံ ဆက်ပံၚ်တောဲကၠောန်ဒၟံၚ် ပ္ဍဲကမၠောန်ပရေၚ်ပိုန်ဒြပ် မဆက်စပ်ဒၟံၚ်ကဵု AVIC အပ္ဍဲဍုၚ်ကြုက်ဂှ် နွံဒၟံၚ်ဏီဂှ်တုဲ စကာအသိၚ်သြဇာညးတအ်တုဲ ညံၚ် AVIC ဂွံဒေါအ်အာ ဒဒှ်မကၠောန်ဒၟံၚ်ကမၠောန်ပရေၚ်ပိုန်ဒြပ် ကုဂကောံပၞာန်ဗၟာဂှ် ဆက်တုဲဒးကဵုဇြဟတ်ဓရိုဟ်ဏောၚ်ဂှ် ထံက်ထ္ၜးလဝ်ရ။
ကုဂကောံပၞာန်ဗၟာ မကလိလောန်ဒၟံၚ်အမှုရာဇဝတ်ပၞာန်တအ်ဂှ် နကဵုကမ္ပဏဳဍုၚ်သ္အာၚ်တၞဟ်ဟ်တံ ဒဒှ်မထံက်ပၚ်ကဵုဒၟံၚ်တိုက်ရိုက်ကီု တိုက်ရိုက်ဟွံသေၚ်ကီုဂှ် ဒးဒေါအ်ဒေၚ်လွာဲဂှ်ဏောၚ် Justice For Myanmar ကေုာံ Blood Money Campaign ဖတိုက်ဖ္အောဝ်လဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−MOI/ Social Media