လ္ဂုၚ်၊ ဂျောန် ၂၄
အပ္ဍဲကၟိန်ဍုၚ် ကဵုပၟတ်ဓာတ်လလဳ ဗွဲလၟေၚ်ၚ်ဟွံမာန်ဏီတုဲ သွက်ဂွံရပ်စပ်စကာအာတၞးသဵုလာ ဇြဟတ်ပၟတ်တ္ၚဲ ပပ္တံနူကဵုသွက်ကမၠောန်သ္ၚိ စဵုကဵုရုၚ်စက်၊ ရုၚ်ကလောန်တအ် ဂေတ်ဂြိပ်မာန်ဂှ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ဟီုကၠုၚ်ရ။
တုဲကၠုၚ်ဂိတုဂျောန် ၂၁ တေံ အခိၚ်အာစိုပ်ဗဵုရံၚ် အကာဲအရာရုၚ်စက်၊ ရုၚ်ကလောန် ပ္ဍဲရးဒေသလ္ဂုၚ် မပ္တိတ်ဒၟံၚ်ဗၞိက်တံဂှ် ဟီုကၠုၚ်လဝ် ကုညးတာလျိုၚ် နူကဵုရုၚ်စက် ရုၚ်ကလောန် ကေုာံ ညးတာလျိုၚ်နူကဵုဌာနမဆေၚ်စပ် သၟဝ်တဲညးဂှ်ရ။
သွက်သ္ဂောံဂွံဇြဟတ်ဓာတ်လလဳဂှ် နကဵုကၟိန်ဍုၚ် ဒးပၠောပ်ကေတ်ဒၟံၚ်ကၠေၚ် နူကဵုဍုၚ်သ္အာၚ်ဂှ်ရ ညံၚ်ဂွံဂွံဓာတ်လလဳ နူကဵုဇြဟတ်မအိုတ်ဟွံလေပ် မၞုံအပ္ဍဲကၟိန်ဍုၚ်တံဂှ် ဒးရေၚ်တၠုၚ်ဏောၚ်တုဲ စၞောန်ကၠုၚ် သွက်ဂွံရပ်စပ်သဵုလာ မကဵုဓာတ်လလဳ ဇြဟတ်ပၟတ်တ္ၚဲမာန်ဂှ်ရ။
တၠကမၠောန်ပရေၚ်ပိုန်ဒြပ်မွဲတၠဂှ်တှ်ေ ညံၚ်ဂွံဂွံပၟတ်ဓာတ်လလဳဂှ် ၜိုန်ရက္ဍိုပ်သ္ကိုပ်ပၞာန် ကဵုစကာကၠုၚ်သဵုလာကီုလေဝ် ပွမစုတ်ဗဂပ်သဵုလာဂှ်ဝွံ ဒးပတိတ်တမ်ဂၠိုၚ်တုဲ လ္ပာ်ပရေၚ်ပိုန်ဒြပ် တၟော်ဟွံကိတ်ဒှ်မာန်ရောၚ် ဟီုရ။
“သဵုလာဂှ်တှ်ေ ခိုဟ်ကီုလေဝ် ဒးပတိတ်တမ်ဂှ် အိုတ်ဂၠိုၚ်ကွေံကွေံ သဵုလာဏံဂှ်တှ်ေ ဒးဖျေံတမ်ရိုဟ်ဏောၚ်။ ဂွံရုမ်ဂပ် ပ္ဍဲကဵုကမၠောန်ဂှ်တှ်ေ ဒးပတိတ်ဟွံအောန်တုဲ တၠကမၠောန်တအ် လျိုၚ်ဇြိုၚ်ကွေံကွေံဏောၚ်။ သြန်ဓလိုက်တမ်ရိုဟ်ဂှ် ဂၠိုၚ်အာမ္ဂး လ္ပာ်ပရေၚ်ပိုန်ဒြပ် တၟော်စဟွံကိတ်တအ် မုတအ် ဒှ်ကၠုၚ်ဏောၚ်” သာ်ဝွံ ဟီုရ။
သ္အာၚ်နူဂှ်ပၠန် ပ္ဍဲကဵုရုၚ်စက် ရုၚ်ကလောန်တအ်ဂှ် ယဝ်စုတ်ကၠုၚ်သဵုလာမ္ဂး ဒးဓလိုက်တမ်ရိုဟ်ဂၠိုၚ်တုဲ အခိၚ်ကာလတမ်ဂွံပြဂှ်ေလေဝ် လအ်မာန်ဂှ်ရ သွက်တၠကမၠောန် အဇာဍောတ်၊ အဇာလဒေါဝ်ဂမၠိုၚ် သာ်လဵုမှပြေပြံၚ်ဟွံသေၚ်တုဲ ၜိုတ်တၠကမၠောန်မဓလိုက်လဝ်တမ်ရိုဟ် ဇၞော်ဇၞော်တအ်ရဟေၚ် ပြေပြံၚ်မာန်ရောၚ် ညးဆက်ဟီုရ။
မွဲလ္ပာ်ဂှ်ပၠန် က္ဍိုပ်သ္ကိုပ်ပၞာန်ဂှ်တှ်ေ အပ္ဍဲကၟိန်ဍုၚ်ဏံ ဂွံမံၚ်လျးတ္ၚဲ ပ္ဍဲပွိုၚ်မွဲသၞာံ ၃၀၀ တ္ၚဲပြၚ်ဂှ်တုဲ ပ္ဍဲရုၚ်စက်၊ ရုၚ်ကလောန်တအ်ဂှ် ယဝ်စကာသဵုလာတုဲ ကၠောန်ပ္တိတ်ဗၞိက်မ္ဂး ဖအောန်ဖျေံခရိတ်ကၠောန်ပ္တိတ်ဗၞိက် တၟာဂလိုၚ်မာန်တုဲ ကလိဂွံပရဲပရာဂၠိုၚ်ဏောၚ်ဂှ် သ္ဂးရ။
သ္အာၚ်နူဂှ်ပၠန် တၠကမၠောန်ဇၞော်ဇၞော်ဂမၠိုၚ် သွက်ဂွံကဵုဇြဟတ် ဓလိုက်တမ်ရိုဟ် ပ္ဍဲသဵုလာဂွံပၟတ်တ္ၚဲဏံဂှ်ကီု၊ သွက်ဂွံကဵုကၠုၚ်မက်ဂၠက် ကုညးမကၠောန်ကမၠောန်ဂမၠိုၚ်ကီု ဌာနဝန်ဇၞော်ဂမၠိုၚ်လေဝ် ပ္ဍဲသ္ၚိကီု ပ္ဍဲရုၚ်စက်ကီုဂှ် စကာသဵုလာတုဲ သွက်ဂွံပတိတ်ဓာတ်လလဳဂှ် စၞောန်ကၠုၚ်လဝ်ရ။
ပ္ဍဲဍုၚ်ဗၟာ ကြဴနူသီအဝဵုတုဲဂှ် ရုၚ်စက် ကေုာံ ကမၠောန်ဗွဲမဂၠိုၚ်ဝွံ ဟွံဂွံပၟတ်ဓာတ်လလဳ မှာန်န်တုဲ သ္ပအဓိက ဒးသုၚ်စောဲဒၟံၚ်စက်ပၟတ်ဇၞော်ဇၞော်တံသၟးဂှ်တုဲ နကဵုသဵုလာမ္ဂးလေဝ် ဟိုတ်နူၚုဟ်အိုတ်ဂၠိုၚ်ဂှ်ရ ၜိုတ်ရုၚ်စက် ကေုာံ ကမၠောန်ညိညရ ရပ်စပ်မာန်ဏောၚ်ဂှ် တၠကမၠောန်ဂမၠိုၚ် ဟီုအိုတ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်− MOI