ကျာ်ထဝ်၊ ဂျောန် ၂၅
ညးပါဲဘဲပၞာန်ဒးဂြိပ်ဒဴပါဲဒလေတ်ဒၟံၚ် ဟိုတ်နူပေါဲဗ္တိုက် ပ္ဍဲပွိုၚ်ဍုၚ်ကျာ်ထဝ် တွဵုရးဍုၚ်မန်တအ်ဂှ် ယဲခၞော်ကၠောံဒၟံၚ်တုဲ နွံပၟိက်ဒၟံၚ်ကဵု အရီုဗၚ်ဂဥုဲဇဗ ကာတၟေၚ်ရောၚ် ဂွံတီကေတ် ဇရေၚ်ခရိုၚ်သဓီု KNU ရ။
ညးဍုၚ်ကွာန်ပါဲဘဲပၞာန်ဂမၠိုၚ်ဝွံ အခိၚ်ကာလဗြဲဏံ ဟိုတ်နူဒးရပ်ဒၟံၚ်ဍာ်ကြုၚ်ဟွံသ္အးဇ္ၚးကီု၊ အကြာဒဵုအကြာဂြိုပ်ဂှ် ဇၟိတ်၊ ပၠာ စၟစၟန်တအ်ဏံကိတ်ကီု၊ ဟိုတ်နူစၟဗက်တဳရဳယျာ စၟပ္တိုဟ်တံဂှ်တုဲ ယဲဘဲကၠောံထၞာန်ဒၟံၚ်အိုတ်ရ။
ပြဟ်ဟ်ဏံ ယဲကၠောံဒးအာလဝ် ညးဍုၚ်ကွာန်ပါဲဘဲပၞာန် သီုကောန်ၚာ်၊ သီုမၞိဟ်ဇၞော်ဇၞော် ၁၀၀ ပြၚ်တုဲ ဗွဲမဂၠိုၚ်ဂှ် ဒှ်ဒၟံၚ်ယဲခၞော် ကသံက်၊ စော်တအ်ရ။
ကုညးမဒှ်ဒၟံၚ်ယဲခၞော် ယဲမကၠောံလဝ်တံဂှ် ဂကောံဂဥုဲ ဒပ်မဟာ ၁ KNU ရီုဗၚ်ကဵုမံၚ်ကီုလေဝ် အရာမနွံပၟိက်ကဵုဂဥုဲဇဗ နွံဒၟံၚ်ဂှ် ပဒိုဝ်သဝ်အေနာၚ် ညးမၞုံအခေါၚ်ဟီုဂး ခရိုၚ်သဓီု ဗော်သွးကောန်ဂကူကရေၚ် KNU ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
နကဵုညးမမိက်ကဵုဒါန်ဂဥုဲဇဗ သွက်ညးပါဲဘဲပၞာန် မၞုံပၟိက်ဒၟံၚ်ကဵု အရီုဗၚ်ဂဥုဲဇဗကာတၟေၚ်တအ်ဂှ် ကေတ်အဆက်ကဵုဒါန် ဇရေၚ်ညးတာလျိုၚ်ခရိုၚ်သဓီု KNU မာန်ရောၚ် သ္ဂးရ။
ပ္ဍဲပွိုၚ်ဍုၚ်ကျာ်ထဝ်ဂှ် တုဲကၠုၚ်ဂိတုမေတေံ ဟိုတ်နူပေါဲဗ္တိုက်ၜါလ္ပာ်တုဲ ညးဍုၚ်ကွာန်ဒေသ ၁၇၀၀၀ ပြၚ် ထောံလသာဌာန်ဒၟံၚ် ဒးဂြိပ်ဒဴဒၟံၚ်တုဲ အခိၚ်လၟုဟ် ညးပါဲဘဲပၞာန် ၁၀၀၀ ပြၚ်ဝွံ ဟွံဂံၚ်စဴဌာန်ဒၟံၚ်ဏီရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ