လံၚ်လုၚ်၊ ဂျောန် ၂၅
ပ္ဍဲရးတၞၚ်သဳ လ္တူဍုၚ်လံၚ်လုၚ်ဂှ် စနူဂိတုဂျောန် ၂၄ တုဲ အကြာဒပ်ကံၚ်ဇြဳပၞာန်ကဵု ဒပ်ပၠန်ဂတးတအ် ဒှ်လဝ်ပေါဲဗ္တိုက်ၜါလ္ပာ် သ္ကာတ်မြဟ်ဂှ် ညးဒေသလ္တူဍုၚ်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ပၠန်ဂတးတအ် လုပ်စိုပ်ဗ္တိုက် ဒပ်ကံၚ်ဇြဳပၞာန် မဖျေံလဝ်ဒပ် ပ္ဍဲရုၚ်ဒပ်ဂီုကၠီုကေၚ်ကာလ္ပာ်ပၞာန်၊ ရုၚ်အခေါန်ဖလှာ ကေုာံ ရုၚ်ဌာနက္ဍိုက်ပ်အုပ်ဓုပ်ကာနာနာပွိုၚ်ဍုၚ် လ္တူဍုၚ်လံၚ်လုၚ်ဂှ်တုဲ ပေါဲဗ္တိုက်ၜါလ္ပာ် သ္ကာတ်မြဟ်ဒၟံၚ်ရ။
ပေါဲဗ္တိုက်ဏံဝွံ ဆက်သ္ကာတ်မြဟ်ဒၟံၚ် စဵုကဵုတ္ၚဲစေၚ် ၃ နာဍဳဂှ်တုဲ ဂွံမိၚ်ကေတ်ဒၟံၚ်ဗြုရမျာၚ်လွဟ်ဇၞော်၊ လွဟ်ဍောတ် ဟွံပိုတ်သ္ကုတ်ရောၚ် ညးဒေသလ္တူဍုၚ်ဂမၠိုၚ် ဟီုရ။
ဟိုတ်နူပေါဲဗ္တိုက်ၜါလ္ပာ်တုဲ ညးဍုၚ်ကွာန်ဒေသ ဗွဲမဂၠိုၚ် အာကၠုၚ်ဟွံဂွံ သှ်ေဒၟံၚ်အပ္ဍဲဍုၚ်ဂှ်တုဲ ညးဍုၚ်ကွာန်ဒေသလ္ၚဵုတံဂှ်တှ်ေ ဂြိပ်ဒဴပါဲဒေလေတ်ဒၟံၚ် ဒၞါဲဗၠးဘဲတံရောၚ်ဂှ် ဂွံတီကေတ်ရ။
စပ်ကဵုပေါဲဗ္တိုက် လ္တူဍုၚ်လံၚ်လုၚ်ဂှ်တုဲ ဒပ်ကံၚ်ဇြဳပၞာန်ကီု ဒပ်ပံၚ်ကောံပၠန်ဂတးတအ်ကီု ဒဵုကဵုအခိၚ်လၟုဟ် လလောၚ်ပ္တိတ်လဝ်ပရိုၚ် မမိက်ကဵုမွဲမွဲဂှ် ဟွံဂွံဆဵုကေတ်ဏီရ။
အပ္ဍဲကာလသီအဝဵုဏံ ဒပ်ပံၚ်ကောံပၠန်ဂတးတအ် ဝေၚ်ကၠုၚ်မံၚ်ပေါဲဗ္တိုက် လ္တူဍုၚ်လံၚ်လုၚ် ဟွံအောန်နူကဵု ၅ ဝါရ။
ပရိုၚ်−သြၚ်လောန်တိုၚ်(မ်)
ဗီုရုပ်−Social Media