ကောန်ဒပ်ကံၚ်ဇြဳပၞာန် မဂြိပ်တိတ်အာနူဗ္ဒိုပ်ထဳကဗလာ ဗက်ဒးဒုၚ်ဗ္တိုက်ဒၟံၚ်

ဗြဝတဳ၊ ဂျောန် ၂၅

ဒပ်ပံၚ်ကောံ KNLA KNDO တအ် ဗက်ၚးတးပသောၚ်ဒၟံၚ် ကောန်ဒပ်ကံၚ်ဇြဳပၞာန် မဂြိပ်တိတ်အာ အပ္ဍဲပေါဲဗ္တိုက်သီဗ္ဒိုပ်ထဳကဗလာ ခရိုၚ်ဗြဝတဳ တွဵုရးကရေၚ်ဂှ် ဂွံတီကေတ် ဇရေၚ်တမ်ရိုဟ်ပရိုၚ်ပရေၚ်ပၞာန်ရ။

ပ္ဍဲဂိတုဂျောန် ၂၂ ဂှ် KNLA KNDO ဍိုက်ဍိုပ်တုဲ ဒပ်ပံၚ်ကောံပၠန်ဂတးဂမၠိုၚ် ပါလုပ်သီုကဵုဒပ်ပံၚ်ကောံ PDF တအ် သီဂွံလဝ်ဗ္ဒိုပ်ထဳကဗလာ မဒှ်ဗ္ဒိုပ်ဒပ်ကံၚ်ဇြဳပၞာန် နွံဒၟံၚ်ဗ္ဒါဲပယျဵုသေံဂှ် အလုံမွဲတုဲ အပ္ဍဲပေါဲဗ္တိုက်သီဗ္ဒိုပ်ဂှ် ကောန်ဒပ်ကံၚ်ဇြဳပၞာန်ဂမၠိုၚ် ထောံလသာဗ္ဒိုပ် ဂြိပ်တိတ်အာလဝ်ရ။

ကောန်ဒပ်ကံၚ်ဇြဳပၞာန် ဂြိပ်တိတ်အာ နူကဵုဗ္ဒိုပ်ထဳကဗလာဂှ် ဒပ်ပံၚ်ကောံ KNLA KNDO တအ် ဗက်ဗ္တိုက်ပသောၚ်လဝ်တုဲ နူကဵုဏံဂှ် ပေါဗ္တိုက်ၜါလ္ပာ် ဒှ်ဒၟံၚ်ရ။

အပ္ဍဲပေါဲဗ္တိုက်ဏံဂှ် ရပ်ဂွံလဝ် ကောန်ဒပ်ကံၚ်ဇြဳပၞာန်လ္ၚဵု နွံတုဲ သီဂွံလဝ် သီုလွဟ်ဇၞော်၊ လွဟ်ဍောတ်၊ မကမ်လွဟ်လက်နက်ပၞာန်တံဂှ်ရောၚ် တမ်ရိုဟ်ပရိုၚ်ပရေၚ်ပၞာန်ဂမၠိုၚ် သ္ဂးရ။

ဗ္ဒိုပ်ထဳကဗလာဝွံ ဒှ်ဗ္ဒိုပ်နွံဒၟံၚ်ဗ္ဒါဲပယျဵုသေံ သ္ၚောဲနူကဵုခရိုၚ်ဗြဝတဳ ဍုၚ်ဝဝ်လေ သ္ကုတ်သၠုၚ်ကျာ ဗၞတ် ၁၀ မိုၚ်တုဲ စနူဂိတုဂျောန် ၈ တေံတုဲ ဒပ်ပံၚ်ကောံ KNLA KNDO တအ် စဗ္တိုက်လဝ်တုဲ ပ္ဍဲဂိတုဂျောန် ၂၂ ဂှ် သီဂွံလဝ်ဖအိုတ်ရ။

ဗော်သွးကောန်ဂကူကရေၚ် KNU ဝွံ ကြဴနူဒးဆုတ်အာနူ မာနေဝ်ပဠဝ်တုဲ ပ္ဍဲသၞာံ ၁၉၉၅ ဂိတုမေဂှ် ပြံၚ်လှာဲဒက်ပ္တန်လဝ် ဗ္ဒိုပ်ထဳကဗလာ နဒဒှ်ဌာန်ဂအုပ်တၟိကီုလေဝ် ပ္ဍဲသၞာံ ၁၉၉၇ ဂိတုဖေဖဝ်ဝါရဳဂှ် ထပ်ဒးဒုၚ်ဗ္တိုက်သီလဝ် ကုဒပ်ပၞာန်ဗၟာရ။

ဒပ်ပံၚ်ကောံ KNLA KNDO ဗတိုက်သီဂွံဒၟံၚ် ဗ္ဒိုပ်ဒပ်ကံၚ်ဇြဳပၞာန်ဂမၠိုၚ် မၞုံအပ္ဍဲဒေသဝဝ်လေ တွဵုရးကရေၚ်ဂှ် မွဲတုဲမွဲတုဲ အခိၚ်လၟုဟ် သှ်ေဒၟံၚ် ၃ ဗ္ဒိုပ်ရတုဲ ဗ္ဒိုပ်ဝဝ်လေဗျူဟာကဵု ဗ္ဒိုပ်ဥကယျေတ်ထ ပါလုပ်ဂှ် ဂွံတီကေတ် ဇရေၚ်တမ်ရိုဟ်ပရိုၚ်အပ္ဍဲဒေသတအ်ရ။

ပရိုၚ်−သြၚ်လောန်တိုၚ်(မ်) 

ဗီုရုပ်−KNU