မတ်မလီု၊ ဂျောန် ၂၅
အခါကံင်ဇြဳဖေဝ်ဒရာဍုၚ်မန် MSFC ထ္မံက်ရုပ်ရဴ လၟေၚ်ကမၠောန်အဓာန်ဂတ မလးဖျေံလဝ် နူကဵုသ္ဘၚ်သဳကၠဳအလန်တတိယဂှ်မ္ဂး ဒးဆေၚ်အာမုက် ကုတၚ်ကော်ဆဴဂမၠိုၚ်မာန်ရောၚ် ဌာန်ကွတ်ပရေၚ်ဍုၚ်ကွာန်ရးမည RICE သ္ၚဳဂၠိပ်လဝ်ရ။
ဂကောံ RICE မၚ်လ္ၚတ်ဒၟံၚ် အပြံၚ်အလှာဲပရေၚ်ဍုၚ်ကွာန်ဍုၚ်ဗၟာ ကေုာံ ပရေၚ်ဍုၚ်ကွာန်မန်ဂှ်တှ်ေ သ္ၚဳဂၠိပ်လဝ် တၚ်လလောၚ်တြး နူကဵုသဘၚ်သဳကၠဳကံၚ်ဇြဳပၞာန်ဖေဝ်ဒရာဍုၚ်မန် အလန်တတိယဂှ်တုဲ ပ္ဍဲဂိတုဂျောန် ၂၁ ဂှ် လလောၚ်ပ္တိတ်ကၠုၚ် တၚ်ကော်ဆဴကံၚ်ဇြဳဏံ မ္ဒးဂဗအာအဓာန်ဂတမာန်ရ။
အတိုၚ် RICE သ္ၚဳဂၠိပ်လဝ်ဂှ်မ္ဂး ထ္မံက်ထ္ၜးလဝ် တၚ်ကော်ဆဴပိသာ် နကဵုကံၚ်ဇြဳဖေဝ်ဒရာဍုၚ်မန် မ္ဒးစွံသတိဗွဲတၟေၚ်ဂှ်တုဲ ပ္ဍဲကဵုဏံ ပရေၚ်အုပ်ဓလီုတိဍာ်၊ ပရေၚ်ညးဍုၚ်ကွာန်ကေုာံ ဍုၚ်သ္အာၚ် သ္ပစၟတ်သမ္တီ၊ ဓဝ်ညဳသာအကြာဂကောံဇြဟတ်မန်တအ် ပါလုပ်ဂှ် ဂွံဆဵုကေတ်ရ။
ပကောံကၠေံဇြဟတ်ပၠန်ဂတး ဘဝတုပ် သ္ပသ္ဇိုၚ်ကဵုတွဵုရးဍုၚ်မန် ၁၀ ပွိုၚ်ဍုၚ်ဂှ်တုဲ ညံၚ်ဖေဝ်ဒရာယူနေတ်ဍုၚ်မန်မွဲ ဂွံမံက်ဂတဝ်ကၠုၚ်မာန် ချူအာချာတာလိက်ကသုက်ဍုၚ်မန် အခိၚ်ပၠန်ဂတး မွဲကၞပ်ဏောၚ်ဂှ် နူကဵုသ္ဘၚ်သဳကၠဳဂှ် ဖျေံစၟတ်လဝ်ရ။
ပွမချူခၞံချာတာလိက်ကသုက်ဍုၚ်မန် အခိၚ်ပၠန်ဂတးဂှ်ဝွံ သွက်ဂွံဒက်ပ္တန် အလဵုအသဳအုပ်ဓုပ်တွဵုရး ဟီုမွဲနဲပၠန်မ္ဂး သွက်ဂွံဒက်ပ္တန် အလဵုအသဳပၠန်ဂတးတွဵုရးဍုၚ်မန်မွဲမာန်ဂှ် ဒှ်လဂါံဇိုၚ်ကၠာရောၚ် ကၠိုဟ်ကေတ်ရ။
ပွမအုပ်ဓလီုဂွံလဝ်တိဍာ် နကဵုဇြဟတ်ပၞာန် ဟွံသေၚ်မ္ဂး စန်ဒက်တုဲ အုပ်ဓလီုဂွံလဝ်တိဍာ် ဟွံမွဲဒၟံၚ်ဂှ်ဝွံ သ္ဂောံဒက်ပ္တန်အာ အလဵုအသဳဍုၚ်မန် အခိၚ်ကာလအကြာဏံဂှ် ဒှ်ကၠုၚ်တၚ်ဆိုအ်ဗ သွက် MSFC မာန်ရောၚ် RICE ထံက်ထ္ၜးလဝ်ရ။
ပ္ဍဲကဵုပွိုၚ်ဍုၚ်ကျာ်ထဝ်၊ ၜဳကလေၚ်၊ သဓီု၊ ရေဝ် ကေုာံ ရးတၞၚ်သဳ ပ္ဍဲကဵုဒေသဍာ်ဗု သ္ကုတ်သၟဝ်ကျာဂှ် MSFC စရေၚ်တၠုၚ်ကဵုလဝ် ပရေၚ်ပညာ၊ ပရေၚ်ထတ်ယုက်တံမာန်ကီုလေဝ် အုပ်ဓလီုဂွံလဝ် အလုံတွဵုရးဍုၚ်မန်မွဲ ဟွံသေၚ်ဏီပုဟ်ဂှ် သ္ဂးရ။
ဟိုတ်ဍေံဂှ်တှ်ေ တွဵုရးဍုၚ်မန်ဝွံ နွံဒၟံၚ်သၟဝ်တဲကံၚ်ဇြဳပၞာန်ဖိုဟ်တုဲ ပ္ဍဲကဵုဒေသလ္ၚဵုဂှ်ပၠန်လေဝ် ဒှ်ဒၟံၚ်သၟဝ်တဲ တိဍာ်အုပ်ဓုပ် ဗော်သွးကောန်ဂကူကရေၚ် KNU ကဵု ဗော်ဍုၚ်မန်တၟိ NMSP ရ။
သ္အာၚ်နူဂှ်ပၠန် ဟိုတ်နူပရေၚ်ကံၚ်ဇြဳပၞာန် မဘပဠကၠုၚ်ဒၟံၚ်တံဂှ်တုဲ အပ္ဍဲတွဵုရးဍုၚ်မန်ဂှ် ကဆံၚ်ညးဍုၚ်ကွာန်တအ် စိုတ်လုပ်စလ္တူပရေၚ်ဍုၚ်ကွာန် ဒှ်ဒၟံၚ်ကဆံၚ်သဝ်အိုတ် မဟီုစဂွံတုဲ သွက်ဂွံကလေၚ်စၟဳတ် ဒဒှ်မညးဍုၚ်ကွာန် ကေုာံ ဍုၚ်သ္အာၚ်တအ် သ္ပစၟတ်သမ္တီ ကုကံၚ်ဇြဳဖေဝ်ဒရာဍုၚ်မန် MSFC နွံ၊ ဟွံမွဲဂှ်လေဝ် ပၟိက်ဇၞော်ဗွဲမလောန်ရောၚ် RICE သ္ဂးရ။
တၚ်ကော်ဆဴဇၞော်အိုတ် သွက် MSFC မွဲဂှ်တှ်ေ ကြဴနူပၞာန်သီအဝဵုတုဲ အကြာဂကောံပၠန်ဂတးရပ်လွဟ် မဒုၚ်သ္ဇိုၚ်ကဵုဂကူမန်တအ်ဂှ် ဓဝ်ညဳသာပရေၚ်ပံၚ်တောဲ လ္ပာ်ပရေၚ်ပၞာန်၊ ပရေၚ်ဍုၚ်ကွာန်တအ် ညံၚ်သ္ဂောံနွံ ဒဒှ်ရကဵုလဝ်ကသပ်ဂှ် ဂွံဆဵုကေတ်ရ။
အကြာဂကောံမန်ဂမၠိုၚ် နွံပၟိက်ဒးပါလုပ် ပ္ဍဲပရေၚ်ပံၚ်တောဲ ပရေၚ်ဍုၚ်ကွာန်ဂှ်ဏောၚ်တုဲ ယဝ်ဟွံညဳသာ ပရေၚ်ပံၚ်တောဲဟွံမွဲမ္ဂး ပၠန်ဂတးမန်ကဵုဒှ် ပရေၚ်ဍုၚ်ကွာန်မန်ကဵုဒှ် ဍိုန်လျစှ်ေကၠုၚ်မာန်ဂှ်ရ နကဵုညးဍုၚ်ကွာန်တအ်လေဝ် သ္ၚောဲကၠုၚ်ကဵုပရေၚ်ဍုၚ်ကွာန်မာန်ရောၚ် RICE ထံက်ထ္ၜးလဝ်ရ။
ဟိုတ်ဂှ်ရ နကဵု MSFC ဒးဂဗအာကဵု တၚ်ကော်ဆဴပိသာ်ဏံ အဓိကမာန်တုဲ ဂွံစိုပ်ကဆံၚ်အုပ်ဓုပ်စၟဳစလဝ်ဂှ် ဗွဲမအံၚ်ဇၞးမာန် ပရေၚ်ပံၚ်တောဲအပ္ဍဲတွဵုရး ခိုၚ်ၚ်ဗိုန်န်ကီု ပရေၚ်ဆက်ဆောံ ကုညးဍုၚ်ကွာန် ကေုာံ ဍုၚ်သ္အာၚ်တအ်ဂှ် ဒးရေၚ်တၠုၚ်အာရောၚ်။
သ္အာၚ်နူဂှ်ပၠန် ဓဝ်ညဳသာ အကြာဂကောံဇြဟတ်ပၠန်ဂတး ပ္ဍဲတွဵုရးဍုၚ်မန်တအ်ဂှ်လေဝ် ဒှ်သ္ဇိုၚ်ပရေၚ်အံၚ်ဇၞးပၠန်ဂတးမန်တံဂှ်ရ ပရေၚ်ညဳသာလေဝ် နွံပၟိက်ရောၚ် ကဵုလဝ်ကသပ် ပ္ဍဲကဵုတၚ်သ္ၚဳဂၠိပ် RICE ဂှ် ဂွံဆဵုကေတ်ရ။
စပ်ကဵုတၚ်ကော်ဆဴဂမၠိုၚ်တုဲ နာဲမန်သာၚ် ညးမၞုံအခေါၚ်ဟီုဂး MSFC ဂှ်တှ်ေ ညံၚ်အလဵုအသဳပၠန်ဂတးဍုၚ်မန်မွဲ ဂွံမံက်ကၠုၚ်ဂှ် အပ္ဍဲတွဵုရးဍုၚ်မန်ဏံ ဒးကၠောန်အာမံၚ်ပရေၚ်ပံၚ်တောဲ လ္ပာ်ပရေၚ်ဍုၚ်ကွာန် ပရေၚ်ပၞာန်တအ်ဂှ် တၟာဂလိုၚ်ဏီဏောၚ်တုဲ လးဖျေံဒၟံၚ် လၟေၚ်ကမၠောန်ဖိုဟ်ဂှ် ကလေၚ်လဝ်ပရိုၚ် ကုဌာန်ပရိုၚ်သြၚ်လောန်တိုၚ်(မ်) ရ။
ကံၚ်ဇြဳဖေဝ်ဒရာဍုၚ်မန်ဏံဂှ် သၞာံ ၂၀၂၁ အပ္ဍဲဂိတုဨပရဴတေံ စဒက်ပ္တန်လဝ် နဒဒှ်ကမ္မတဳပံၚ်တောဲရေၚ်တၠုၚ် ကေၚ်ကာဍုၚ်မန် MSICC တုဲ ပ္ဍဲသၞာံ ၂၀၂၃ ဂိတုဂျာန္နဝါရဳဂှ် ပြံၚ်လှာဲလဝ် နဒဒှ်ဖေဝ်ဒရာယူနေတ်တွဵုရးမွဲရ။
ဌာနဂမၠိုၚ် ပ္ဍဲ MSFC ဂှ် ဌာနကာစဵုဒၞါ၊ ဌာနပရေၚ်အုပ်ဓုပ်၊ ဌာနစဳရေၚ်သၞောဝ်ဓဝ်၊ ဌာနကာအပ္ဍဲဍုၚ်၊ ဌာနပရေၚ်ပညာ၊ ပရေၚ်ထတ်ယုက်၊ ပရေၚ်ရီုဗၚ်ဟံၚ်ပြာ်မှာဇန်၊ ဌာနညးဗြဴ ကေုာံ ကောန်ၚာ်သၟတ် ကေုာံ ဌာနတၞဟ်ဟ်ဂမၠိုၚ် ပါလုပ်ရ။
အခိၚ်လၟုဟ် သၟဝ်ပရေၚ်ကောပ်ကာဲဌာနကာစဵုဒၞါဂှ် ဒပ်ပၠန်ဂတးဍုၚ်မန် MSRF နွံတုဲ ပံၚ်တောဲချဳဒရာၚ်ဒၟံၚ်ပရေၚ်ပၞာန် ကုဒပ်မန်ဂမၠိုၚ် ကေုာံ ကုဂကောံဇြဟတ်ပၠန်ဂတးတၞဟ်ဟ်တံလေဝ် နွံရ။
ပရိုၚ်−သြၚ်လောန်တိုၚ်(မ်)
ဗီုရုပ်−MSFC