သဵု(လ) ၊ ဂျောန် ၂၅
ပရေၚ်အာတ်မိက် သွက်ဂွံရေၚ်တၠုၚ် ညံၚ်အစောံကောပ်ကာဲဒပ်ပၞာန် ဇြဟတ်ဂွံခိုဟ်ဂှ် ဂၠိုၚ်ကၠုၚ်တုဲ ပ္ဍဲဂိတုဂျောန် ၂၄ တေံ အလဵုအသဳကိုဝ်ရဳယျာသၠုၚ်ကျာ ခါန်ကၞက်ပ္တိုန်လဝ်ကောန်အရာပ်မွဲတၠ နဒဒှ်ဝန်ဇၞော်ကာစဵုဒၞါ အပ္ဍဲပွိုၚ် ၆၀ သၞာံပြၚ်ဏံ အလန်ကၠာအိုတ်ရ။
သၞာံတုဲကၠုၚ် အပ္ဍဲဂိတုဒဳဇြေမ်ဗာတေံ သမ္မတတြေံ ယောန်သက်ယော ပ္တိတ်ကၠုၚ်ဇြဟတ် လလောၚ်တြး သၞောဝ်အုပ်ဓုပ်ပၞာန်တုဲ ဟွံအံၚ်ဇၞး ဒးဒုၚ်ပတိတ်လဝ်နူကဵုကဆံၚ်သမ္မတတုဲဂှ် သွက်ကဆံၚ်ဒၞါဲဝန်ဇၞော်ကာစဵုဒၞါဂှ် ခါန်ကၞက်ပ္တိုန်ကၠုၚ် ကောန်အရာပ်မွဲတၠ အလန်ကၠာအိုတ်ရ။
အာန်ဂူဗာတ် မဒှ်အမာတ်ကၠတ်ထဝ်ဝှ်ကြံၚ်ဂှ်ဝွံ ဒှ်ကောန်အရာပ် မအာက္ဍိုပ်ဌာနဝန်ဇၞော်ကာစဵုဒၞါ အပ္ဍဲပွိုၚ် ၆၄ ဏံ အလန်ကၠာအိုတ်ရောၚ် ဝန်ဇၞော်ရုၚ်သမ္မတ ခါန်ဟံၚ်သေတ် ဟီုဏာလဝ် ပ္ဍဲပေါဲသောၚ်ကလးလိက်ပရိုၚ် မကၠောန်ဗဒှ်လဝ် ပ္ဍဲဂိတုဂျောန် ၂၃ တေံရ။
နဒဒှ်ဝန်ဇၞော်ကာစဵုဒၞါမွဲတၠ ကၠောန်အာအပြံၚ်အလှာဲဒပ်ပၞာန် ပါလုပ်သီုကဵု ကိစ္စမပါလုပ်ဆက်စပ် ပ္ဍဲကဵုလလောၚ်တြးသၞောဝ်အုပ်ဓုပ်ပၞာန်တံဂှ်ဏောၚ်ဂှ် ရုၚ်သမ္မတ ဟီုရ။
သမ္မတလဳဂျေမျံၚ်ဂှ်တှ်ေ အခိၚ်ကာလညးစန်ဒက်လဝ်မာဲတေံ ကဵုလဝ်ကတိပါၚ် ဒဒှ်ရခါန်ကၞက်အာကောန်အရာပ် ပ္ဍဲကဆံၚ်ဒၞါဲဝန်ဇၞော်ကာစဵုဒၞါဂှ်ရ။
ကေန်ဟံၚ်ယောန် ညးမကေတ်လဝ်လျိုၚ် နဒဒှ်ဝန်ဇၞော်ကာစဵုဒၞါ ပ္ဍဲလက်ထက်သမ္မတတြေံ ယောန်တေံဂှ် ဟိုတ်နူဆက်စပ်ကဵုပရေၚ်လလောၚ်တြး သၞောဝ်အုပ်ဓုပ်ပၞာန်ဂှ်တုဲ ဒးဒုၚ်ရပ်လဝ် နူဂိတုဒဳဇြေမ်ဗာတေံရ။
အလဵုအသဳလေဝ်ဗရဴကၠာတေံဂမၠိုၚ် ၜိုန်ပတိတ်ကၠုၚ်ဇြဟတ် သွက်ဂွံခါန်ကၞက်ပ္တိုန်ကောန်အရာပ် ပ္ဍဲကဵုဒၞါဲကဆံၚ်ဝန်ဇၞော်ကာစဵုဒၞါဂှ်ကီုလေဝ် သ္ပဟိုတ်ကဵုအန္တရာယ် ကိုဝ်ရဳယျသၟဝ်ကျာတုဲ ဂွံခါန်ကၞက်ပ္တိုန်ကောန်အရာပ် ဒၞါဲဏံဂှ် ဟွံအံၚ်ဇၞး ဒှ်ကၠုၚ်လဝ်ရ။
Ref: AFP