နယူဒေဠဳ- အဝ်ဂတ် ၁၀
နူအမေရိကာန် အစဳဇန်သွက်ဂွံရာန်လွဟ်ကဵု ၜင်ကျာတံဂှ် အလဵုအသဳ အေန္ဒိယ ဒေါအ်လဝ်ရ သာ်ဝွံ ညးတာလျိုင် အေန္ဒိယ ၃ တၠ ကြပ်ကဵုကိစ္စဏံ ဟီုရ။
လ္တူကပေါတ်ဗၞိက် အေန္ဒိယတံ ပလံင်ပၠုပ်ဂှ် ဟပဵုကံက်အာ အခေါန်ရောင် သမ္မတအမေရိကာန် ဒဝ်နေဝ်ထရ လလောင်ဏာတုဲ ပရေင်ဆက်ဆောံၜါဍုင်ဂှ် အပ္ဍဲကဵုစှ်ဗွဝ်သၞာံတံဏံ စိုပ်အာအကာဲအရာသဝ်စှ်ေအိုတ်ရဂှ် လကျှ်န် ပရေင်ဟွံပေင်စိုတ်အေန္ဒိယ ထမံက်ပတိတ်ဏာ အလန်ပထမကိုပ်ကၠာအိုတ်ရ။
သွက်လလောင်တြး ပရေင်ဂွံရာန်လွဟ်တၟိတံကဵု ၜင်ကျာတံဂှ် ဝန်ဇၞော်ပရေင်စဵုဒၞာ အေန္ဒိယ ရာ့သ်နက်ခ် ဆင်းချ် သတ္တဟဂတတံဏံမ္ဂး သွက်ဂွံအာစိုပ်ဝါယှေန်တန်လဝ် စဳဇန်လဝ်တုဲတုဲရ။
ဆဂး စဳဇန်လဝ်လၟေင်တရဴဏံ ပလီုကၠေံလဝ်ယျဂှ် နူရိုဟ်ကၞက်ပရိုင်ၜါဒၞာဲ ဟီုရ။
ဟိုတ်နူ ရာန်မံင်ကၠေင်ဍေင် နူရတ်ယှာဂှ် နကဵုဗီုပြင်ကဵုဒုဟ် လ္တူကပေါတ်ဗၞိက် အေန္ဒိယတံ ပလံင်ဏာဂှ် အမေရိကာန် ထပ်ဟပဵုကံက်အခေါန် ၂၅% ရောင် သမ္မတအမေရိကာန် ဒဝ်နေဝ်ထရ ပ္ဍဲအဝ်ဂတ် ၆ လလောင်တြးလဝ်ရ။
ရာန်မံင်ကၠေင်ဍေင် နူရတ်ယှာဂှ် သွက်ဂွံဗတိုက်ယူခရုင် ညံင်ရဴကဵုမံင်သြန်ကု ရတ်ယှာရဏောင် သမ္မတထရ ဟီုရ။
ဟိုတ်နူထပ်ဟပဵုကံက်ဏာအခေါန် လ္တူအေန္ဒိယ သာ်ဏံဂှ် အခေါန်သီုဖအိုတ် ဒဵုကဵု ၅၀% ဒှ်အာတုဲ အမေရိကာန်ကဵု အကြာဍုင်ကူသာန်သွံရာန်မံင်တံမ္ဂး ပရေင်ကံက်အခေါန်ဂၠိုင်အိုတ်မွဲ ဒှ်မံင်ရ။
သမ္မတအမေရိကာန်ဝွံ အခေါန်ညးတေံခၞံလဝ်ကေတ်တ်တံဂှ် အခိုက််ရာဇဝင်ညးတေံ ဟတးဟတန်ပြံင်သၠာဲထောံ ဗွဲမပြဟ်ပြေဟ်လေပ်တုဲ နူကဵုအေန္ဒိယ ပညဳမံင်ကဵု ဝါယှေန်တန်ဖိုဟ်ဏီ ဟီုလဝ်ရ။
ယဝ်ရ စပ်ကဵုပြဿနာအခေါန်ဏံ ပြေပြံင်အာမ္ဂး အစဳဇန် သွက်ဂွံရာန်အာလွဟ် နူအမေရိကာန် လမျီုကလေင်လုပ်ကၠုင်မာန်ကီုလေဝ် ပြဟ်ဟ်ဏံ ဘိုအ်ဂွံဒှ်မာန် ဟၟဲဏီရောင် သာ်ဝွံ ရိုက်ကၞက်ပရိုင်မွဲဒၞာဲဂှ် ဟီုရ။
ပရေင်ဒေါအ်လဝ် ကိစ္စရာန်လွဟ်ကပေါတ်ပရေင်စဵုဒၞာ နူအမေရိကာန်ဂှ် နကဵုလိက်စၞောန် ချူပညုင်လဝ်ဟၟဲဏီတုဲ နကဵုနယူဒေဠဳ လ္တူသ္ဂုတ်သွာတ်ဏံ ဂတးပြံင်သၠာဲမာန်ကီုလေဝ် ပြဟ်ဟ်ဏံ ဘိုအ်ဂွံရာန် ဒှ်ဟွံမာန်ဏီ ညးတာလျိုင်အေန္ဒိယ တၞဟ်မွဲပၠန် ဟီုရ။
ပရေင်ရိုဟ်ကၞက်ပရိုင်တံ ဟီုဂးလဝ်တံဂှ် အလဵုအသဳ အေန္ဒိယ မွဲသာ်မှလေဝ် ကလေင်သှ်ခၠေဝ်လဝ်ဟၟဲဏီတုဲ အကာဲအရာ ပရေင်ရာန်လွဟ်အမေရိကာန် ပရေင်တောတက် ဒှ်ကၠုင်မာန် သ္ဂးရ။
အကြာအကြာဏံ သ္ကိုပ်ဝန်ဇၞော်အေန္ဒိယ မိုဒဳကဵု သမ္မတရတ်ယှာ ပူတေန်တံ အကာဲအရာ ယူခရုင် ကေင်သဳကၠဳလဝ်ညးသ္ကံနွံတုဲ သွက်ဂွံသၠုင်ပတိုန် ပရေင်ဆက်ဆောံတံလေဝ်နွံမံင် ပ္ဍဲကဵုမဳဒဳယာပရေင်မၞိဟ်တံ ချူထမံက်ပတိတ်လဝ် ပ္ဍဲအဝ်ဂတ် ၈ ဂှ်ရ။
Ref:Reuters