ဝါယှေန်တန်၊ အဝ်ဂတ် ၁၃
ပ္ဍဲကဵုအဝ်ဂတ် ၁၅ အခိင်ဆဵုဂဗကဵု သမ္မတရတ်ယှာ ဗလာဒဳမာ ပူတေန်မ္ဂး ဒၞာဲတိဍာ်ယူခရုင်လ္ရဵု ညံင်ကလေင်ဂွံမာန် အာတ်မိက်ကဵုဏောင် သမ္မတအမေရိကာန် ဒဝ်နေဝ်ထရ ဟီုရ။
ရတ်ယှာ သီဂွံလဝ် တိဍာ်ယူခရုင် ဒၞာဲဗွဲမဂၠိုင်နွံမံင်၊ ဒၞာဲအဓိကတံဂှ် ဍေံတံသီဂွံလဝ်၊ သွက်ယူခရုင် ဒၞာဲတိဍာ်လ္ရဵု ညံင်သ္ဂောံကလေင်ဂွံမာန် အဲဂစာန်အာဏောင် ပ္ဍဲပေါဲသောင်ကလးလိက်ပရိုင် သ္ရိစၠတ်ဗုဂှ် ထရး ဟီုဂးလဝ်ရ။
ညးတေံကဵု သမ္မတရတ်ယှာတံ ပ္ဍဲအလက်သကာ သွက်ဂွံဆဵုဂဗသဳကၠဳအာ စဳဇန်လဝ်နွံတုဲ အခိင်မဆဵုဂဗသဳကၠဳကဵု ပူတေန် ဆၜိုတ်ပွိုင်ၜါမိနေတ် အခိင်မွဲဍောတ်ဂှ် အကာဲအရာတဴတက်မာန်၊ ဟွံမာန် တီမာန်ဏောင် ဟီုရ။
ပ္ဍဲတ္ရဲသိုက် အဝ်ဂတ် ၁၅ ဏံ ပ္ဍဲကဵုဆဵုဂဗကဵု သမ္မတပူတေန်ဂှ် ပွမသဳကၠဳပရေင်ဇီုဟဗတ်တံဒှ်တုဲ သွက်ပေါဲပၞာန်ဂွံတုဲဒှ်အာ ဘိုအ်ဂွံဖတိုက်ဖအောဝ်ဟီုဂးအာ ရန်တၟံလဝ်ရောင် ထရဟီုရ။
အကြာရတ်ယှာကဵု ယူခရုင် တိဍာ်သီဂွံလဝ်တံ သွက်ဂွံကလေင်သၠာဲညးသ္ကံမာန် ထရ ပၠုပ်လဝ်ဂလာန် နွံရ။
ဂလာန်ကလေင်သၠာဲ တိဍာ်ဂှ် ၜိုန်ရ ထရဟီုလဝ်ကၠာလဝ် တိဍာ်ဒေသဒၞာဲလဵု နကဵုရတ်ယှာ ကလေင်ကဵုယူခရုင်ဂှ် ကၠးကၠးမးမး ဟွံတီလဝ်ဏီ။
အပ္ဍဲပရေင်သဳကၠဳဏံ နကဵုပူတေန် တုပ်စိုတ်ကဵု မွဲမွဲသာ်နွံမ္ဂး နကဵုသ္ပအဲပရဲ ကဵုအာသမ္တီကု သမ္မတယူခရုင် ဗိုလိုဒီမာ ဇဳလန်စကဳ ဗွဲကိုပ်ကၠာအိုတ်တုဲ ကုက္ဍိုပ်သ္ကိုပ်ယူရောပ်တံဂှ်လေဝ် ကဵုအာသမ္တီကီုရောင် ထရဟီုရ။
ပ္ဍဲပရေင်သဳကၠဳအနာဂတ်တေံမ္ဂး နကဵု ဆေင်မုက်ပိလပါ် ဇဳလန်စကဳ လေဝ် ပါလုပ်ကီုဏောင် ထရ ဟီုရ။
နကဵုထရ သွက်ဂွံပိုင်ခြာတိဍာ် ဗက်ဂၠံင်တြေံ ဟီုဂးတုဲ ဂစာန်ပတဴမံင် သြဇာညးတေံ ဗီုပြင်ဏံမံက်မံင်ရောင် ဒုဥက္ကဌ ကဝ်မယှေန် ယူရောပ် ကာဂျာ ကောလက်စ် ဟီုရ။
နကဵုပရေင်တင်တုပ်စိုတ်ယူခရုင် မွဲမွဲသာ် ဟွံပါကၠုင်မ္ဂး မုတင်လေဝ် ဒုင်တဲဟွံမာန်ရောင် ဂကောံ ယူရောပ် ဟီုဂးလဝ် နွံရ။
Ref:BBC