မဝ်သကိုဝ်-အဝ်ဂတ် ၁၄
သမ္မတ အမေရိကာန်ကဵု ရတ်ယှာတံ သွက်ဂွံဆဵုဂဗညးသ္ကံ အခိင်ပလေဝ်စမံင်ဏံ ယူခရုင် သွက်ဂွံဗလးထောံကၠေံတိဍာ် နကဵုဗီုပြင်ကဵုအာ ဇြဟတ်ဟရိုဟ် ပ္ဍဲကဵုဒေသဗၟံက်ယူခရုင် ဒၞာဲခါဲမါင်တၟံဆးဂမၠိုင်မၞုံမံင် ကရပ်ဍုင် ဒိုဘရိုပီလီယာတေံ ဒပ်ပၞာန်ရတ်ယှာတံ မွဲသက်ခဏဂှ် ထပက်ပၞာန် ဗတိုက်ကၠုင်ရ။
သွက်ဂွံထိင်ကြာပ်အာ ဒၞာဲဒေသဒွန်နက်စ် ယူခရုင်ဏံ ပ္ဍဲကဵုဒေသၜါဒၞာဲဂှ် ဒပ်ရတ်ယှာတံ ဒဵုကဵုစိုပ် ၆ တိုင် ဗီုပြင်မွဲသကုတ်မွဲသကူဂစာန် ဖံက်တိတ်တုဲဗတိုက်ကၠုင်မံင်နွံ ပ္ဍဲကဵုဗီုတိ ထၜးအကာဲအရာ ပေါဲပၞာန်ယူခရုင် အဝ်ဂတ် ၁၂ ဂှ် ပတိုန်ထၜးလဝ်ရ။
သွက်ဂွံကၟောန်ကေတ်လဝ်ဒၞာဲဏံ နကဵုဒပ်ရတ်ယှာတံ ဇြဟတ်အောန်န် ဖံက်ဗတိုက်လဝ်ဒၞာဲဏံတုဲ ဟိုတ်နူယူခရုင်တံ ကလေင်ပၠန်ဗတိုက်ဂှ်ရ ဒပ်ရတ်ယှာတံ အပ္ဍဲကဵုဒၞာဲတံဏံ ဆက်တုဲ ဖျေံလဝ်ဒပ် နွံဟာဟၟဲဟာဂှ် သောင်င်ကၠးကၠး ဟွံဂွံတီဏီ သာ်ဝွံ ညးလ္ရတ်ပရေင်ပၞာန်တံ ဟီုရ။
အကာဲအရာ ဇြဟတ်ပၞာန်ယူခရုင်တံ အောန်မံင်ဂှ် ကေတ်အခေါင်ခိုဟ်တုဲ ဒပ်ရတ်ယှာတံ ဂစာန်ဂေတ်ဗိုင်ကၟာတ်မံင် ဇရေင်ကွာန်ပိကွာန် မဆက်စပ်မံင်ကဵု ဍုင်ပိုကရော့ဗ်ကဵု ကော့စ်ယန်တီနီကာတံဂှ် ဒပ်ရတ်ယှာတံ ဖံက်ဗတိုက်မံင်ရောင် သာ်ဝွံ ညးတာလျိုင်ယူခရုင်တံ ဟီုရ။
အကာဲအရာတံဏံ ဒှ်အာကြာန်န် မာန်မံင်။ တင်ယုတ်ဒေက် ဒၞာဲပၞော်ပၞာန်ဒုင်ဂှ် သၞတံဂၠိုက်ဂၠာဲတီအာလဝ်တုဲ ဖံက်လုပ်ကၠုင်မံင် ဇြိုဟ်ဟ်ရဂှ် ဗွဲမပြဟ် ညံင်ဂွံကလေင်ပၠန်ဗတိုက်ပတိတ်မာန် ဂစာန်မံင်ဖိုဟ်ရောင် ညးတာလျိုင်ယူခရုင်တံ ဟီုလဝ်ရ။
အဝ်ဂတ် ၁၅ ဏံ ပ္ဍဲအလက်သကာ သမ္မတအမေရိကာန် ဒဝ်နေဝ်ထရကဵု သမ္မတရတ်ယှာ ဗလာဒဳမာ ပူတေန်တံ သွက်ဂွံဆဵုဂဗ စဳဇန်လဝ်တုဲ သွက်ဂွံဒေါအ်သရောအ်ကၠေံ ပေါဲပၞာန်ယူခရုင် တင်တုပ်စိုတ် ၜိုတ်ဒှ်မာန် သွက်သ္ဂောံဂွံအာ သဳကၠဳအာရောင် စၟဳစလဝ်ရ။
ဒေသဒွန်နက်စ် ရတ်ယှာ ထိင်ဟွံမာန်လဝ်ဏီဂှ် ယူခရုင်တံ ညံင်ဂွံသၠောဲပအပ်ကဵု ရတ်ယှာ ပူတေန် အာတ်မိက်လဝ် ထရ နွံမံင် သာ်ဝွံ ပရိုင်သ္ပဒတန်ဟွံမာန်ဏီတံ ချူလဝ်ရ။
ဒပ်ရတ်ယှာတံ ပ္ဍဲကဵုဒၞာဲလ္ရဵု ဒဵုကဵုစိုပ်ၜိုတ် ၁၀ ကဳလဵုမဳတာ ဖံက်လုပ်စိုပ်ကၠုင်လဝ်နွံမံင်ရောင် သမ္မတယူခရုင် ဗိုလိုဒီမာ ဇီလန်သကဳ သ္ပဒတန် ဟီုလဝ်နွံရ။
ဒပ်ရတ်ယှာတံ အပ္ဍဲကဵုပွိုင်ပိတ္ရဲဂှ် ပ္ဍဲကဵုယူခရုင် ဒဵုကဵု ၁၇ ကဳလဵုမဳတာ ဖံက်တုဲလုပ်စိုပ်ကၠုင်မာန်မံင်ရောင် ညးလ္ရတ်ပရေင်ပၞာန် နူဖေန်လာန် ပါစီ ပါရိုင်နင် ဟီုလဝ်ရ။
Ref:Reuters