မတ်မလီု၊ မေ (၈)
အပ္ဍဲကာလယဲကပ်ကိုဝ်ဝေဒ် ကေုာံ ပၞာန်သီအဝဵုပွိုၚ်မွဲသၞာံပြၚ် မွဲကရောံကမၠောန်ပရေၚ်ပိုန်ဒြပ်ဂမၠိုၚ် ဒေါအ်ဇူကၠုၚ်ဂှ် ဟိုတ်နူဒးဒုၚ်ပတိတ်ထောံနူကမၠောန်တုဲ ညးဟွံခိုၚ်ကၠိုက် ဗဒါဲဖအိုတ် ကမၠောန်ကၟိတ်ဟွံမွဲ ဒှ်အာရဂှ် ညးမရေၚ်တၠုၚ်ရီုဗၚ်ကဵုဒၟံၚ် ညးဟွံခိုၚ်ကၠိုက်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အတိုၚ်လိက်သုတေသနတံမ္ဂး ပ္ဍဲကဵုညးဟွံခိုၚ်ကၠိုက်ကၟိန်ဍုၚ် (၁၅) တၟံကၠံဂှ်ဝွံ လုပ်စိုပ်ကၠောန်ဒၟံၚ်ကမၠောန် ပ္ဍဲသွာၚ်မဆေၚ်စပ်နာနာတံအိုတ်ရ။
ဆ္ဂး အပ္ဍဲကာလယဲကပ်ကိုဝ်ဝေဒ် ကေုာံ ပၞာန်သီအဝဵုပွိုၚ်မွဲသၞာံပြၚ် ဟိုတ်နူကမၠောန် ပရေၚ်ပိုန်ဒြပ်တံ ဒးဒေါအ်ဇူကၠုၚ်ဂှ်ရ ညးဟွံခိုၚ်ကၠိုက် ဗဒါဲဖအိုတ် ဒှ်အာ ကမၠောန်ကၟိတ်ဟွံမွဲအိုတ်ရ။
ညးဟွံခိုၚ်ကၠိုက် ဒးဒုၚ်ဗဒေါအ်လဝ်ကမၠောန်တံဝွံ အခါလၟုဟ် ဟိုတ်နူသြန်လုပ်လၟေၚ်ၚ် ဟွံမွဲဂှ်ရ သွက်ဂွံမံၚ်စံၚ်ဒတူလိုၚ်အာဂှ် ဒးဂဗဒၟံၚ် ဒဒိုက်ဗွဲမဇၞော်ကဵုဇြဟတ်ရဂှ် ညးမရီုဗၚ်ရေၚ်တၠုၚ်ကဵုဒၟံၚ် ညးဟွံခိုၚ်ကၠိုက်မွဲတၠ ဟီုလဝ် သာ်ဏံရ။
“ ဒးကပ်ပရေၚ်ပိုန်ဒြပ်တုဲ ကာလဒးဖအောန်ဖျေံကမၠောန်တံတှ်ေ ညးဟွံခိုၚ်ကၠိုက်တံဂှ် ဒးဒုၚ်ပလှ်ပတိတ်နူကမၠောန် ကၠာအိုတ်ရ၊ တော်ကဵုမၞိဟ်တြုံတံမ္ဂး မၞိဟ်ဗြဴညးဟွံခိုၚ်ကၠိုက်တံဂှ် ဒးဒုၚ်ဗဒေါအ်ဇူထောံ နူကမၠောန် ဗွဲမလောဲသွာရ၊ သြန်လုပ်ဟွံမွဲတှ်ေ ပရေၚ်ဇီုကပိုက် စပ်ကဵုပရေၚ်ပိုန်ဒြပ်၊ ပရေၚ်မၞိဟ်တံ နွံအာတၟာဂလိုၚ်ရ၊ မံၚ်စဟွံခိုဟ်မ္ဂး လွဳလွတ်ဂဥုဲဟွံမာန်ပုဟ်၊ လွဳလွတ်ဟွံမာန်တှ်ေ ကၠောန်ကမၠောန် ဟွံမာန်ပုဟ်၊ ဗီုဏံရ ဂေတ်ဒၟံၚ်” သာ်ဝွံ သ္ဂးရ။
အခိၚ်လၟုဟ်ဂှ် ညးဟွံခိုၚ်ကၠိုက် ဒှ်အာကမၠောန်ကၟိတ်ဟွံမွဲတံဝွံ သွက်ပရေၚ်စသုၚ်မံၚ်စံၚ် သ္ၚိကၟိန်တံဂှ် သာတုဲ ကြေပ်ဂြတ်ကၠုၚ်ဂှ်ရ နွံပၟိက်ဒၟံၚ် ကုအရီုဗၚ်ဂမၠိုၚ်ရ။
ညးဟွံခိုၚ်ကၠိုက်တံဝွံ ဟိုတ်နူတၚ်ဝါတ်ဂါတ် အခေါၚ်အရာကမၠောန်ကၟိတ်တံတုဲ ပြသၞာပရေၚ်ထတ်ယုက် ကေုာံ ပြသၞာစပ်ကဵုစိုတ်တံဂှ် သာတုဲ ဒးဂဗကၠုၚ်ဂှ်ကီု နကဵုဂကောံမဆေၚ်စပ်တံအိုဿီု သွက်ဂွံရေၚ်တၠုၚ်ရီုဗၚ်ကဵု ဗွဲမပြဟ် နွံပၟိက်ဒၟံၚ်ရဂှ် ညးမရီုဗၚ်ကဵုဒၟံၚ် ညးဟွံခိုၚ်ကၠိုက်တံ သ္ဂးအိုတ်ရ။
အတိုၚ်စရၚ်လၟိဟ်မၞိဟ်အကြာ သၞာံ (၂၀၁၉) ဂှ်မ္ဂး လၟိဟ်မၞိဟ်ကၟိန်ဍုၚ် ၁၂ ဒဿမ ၈ တၟံကၠံဝွံ ဒှ်ညးဟွံခိုၚ်ကၠိုက်တံရ။
ပရိုၚ်−သြၚ်လောန်တိုၚ်(မ်)