ဂကောံဒေါအ်ပန်ပှော် (၅) ဂကောံ အာစိုပ်ဆဵုဂဗကဵု က္ဍိုပ်သ္ကိုပ်ပၞာန်သီအဝဵုရောၚ်

မတ်မလီု၊ မေ (၈)

ပေါဲသဳကၠဳ ပရေၚ်ၜိုဟ်လလမ် က္ဍိုပ်သ္ကိုပ်ပၞာန်သီအဝဵု သ္ကိပ်ပၞာန်ဇၞော် မေန်အံၚ်လှာၚ် မကော်ဘိက်လဝ်ဂှ် ဂကောံရပ်လွဟ်ကောန်ဍုၚ်အရၚ် ထ္ပက်လဝ်စၟတ်တဲ ပ္ဍဲလိက်ကသုက်ဒေါအ်ပန်ပှော် NCA (၅) ဂကောံ အာစိုပ်ဆဵုဂဗအာရောၚ် ညးမၞုံအခေါၚ်ဟီုဂး ဂကောံသ္ကိုပ်သ္က လၟေၚ်ကမၠောန် ပရေၚ်ၜိုဟ်လလမ် ဒေါအ်ပန်ပှော် PPST သ္ကိုပ်ဗိုလ်ဇၞော် သဝ်ကျဝ်ညောအ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

သွက်ဂွံဆဵုဂဗကဵု က္ဍိုပ်သ္ကိုပ်ပၞာန်ဂှ် ဂကောံသ္ကိုပ်သ္က လၟေၚ်ကမၠောန်ပရေၚ်ၜိုဟ်လလမ် PPST မဒက်ပ္တန်လဝ် နကဵုဂကောံရပ်လွဟ်ကောန်ဍုၚ်အရၚ် EAOs ထ္ပက်လဝ်စၟတ်တဲ ပ္ဍဲလိက်ကသုက်ဒေါအ်ပန်ပှော် အလုံကၟိန်ဍုၚ် NCA ဂှ် ကော်လဝ် ကောံဓရီုတၟေၚ်မွဲ ပ္ဍဲဂိတုမေ စၟတ်တ္ၚဲ (၆) ဂှ်ရ။

အပ္ဍဲကောံဓရီုတၟေၚ်ဂှ် ဂကောံဒေါအ်ပန်ပှော် (၅) ဂကောံ သွက်ဂွံဆဵုဂဗကဵု က္ဍိုပ်သ္ကိုပ်ပၞာန် ကဵုလဝ်တၚ်စၟတ် လစွံစိုတ်တံရဂှ် ညးမၞုံအခေါၚ်ဟီုဂး PPST သ္ကိုပ်ဗိုလ်ဇၞော် သဝ်ကျဝ်ညောအ် ဟီုရ။

“ပ္ဍဲကောံဓရီု နူဏေံတေံ လ္တူတၚ်ကော်ဘိက်တံဂှ် သွက်ဂွံတိုန်စိုပ် ဂကောံကဵုလဝ်လစွံစိုတ်ဂှ် (၅) ဂကောံရ၊ အပ္ဍဲ PPST Member မွဲဂကောံမသှ်ေဒၟံၚ်ဂှ်တှ်ေ သွက်ဂွံကလေၚ်ကၠောန် ကောံဓရီုကမ္မတဳဗဟဵုနွံတုဲ ပြဟ်ဟ်ဏံ ကဵုလစွံစိုတ် ဟွံမာန်ဏီဂှ်ကီု၊ ဂကောံ PPST Member မသှ်ေဒၟံၚ် မွဲဂကောံပၠန်ဂှ်လေဝ် ဟိုတ်နူတေက်ဒၟံၚ်ကဵု အခက်အခုဲဟွံသၠး အပ္ဍဲဂကောံ မက္တဵုဒှ်ဒၟံၚ်လၟုဟ်တံ ကေုာံ ဟိုတ်နာနာပက္ကရဂှ်ရ ပြဟ်ဟ်ဏံ သွက်ဂွံတိုန်စိုပ်ဂှ် ဟွံဒှ်ဒတုဲဏီဂးတုဲ ကဵုလဝ်လစွံစိုတ်နွံ”  သာ်ဝွံ ညးသ္ဂးရ။

ဂကောံဒေါအ်ပန်ပှော် (၅) ဂကောံ မအာစိုပ်ဆဵုဂဗကဵု က္ဍိုပ်သ္ကိုပ်ပၞာန်သီအဝဵု သွက်ဂွံသဳကၠဳပရေၚ်ၜိုဟ်လလမ်ဂှ် ဗော်ဗၠးၜးရခေၚ် ALP၊ ဗော်ဍုၚ်မန်တၟိ NMSP၊ ဒပ်ပၞာန်ဒတုဲဖဵုဒဳမဝ်ကရေဇြဳကရေၚ် DKBA ၊ ကံၚ်ဇြဳပရေၚ်ၜိုဟ်လလမ်ကရေၚ် KNU/KNLA/PC ကေုာံ ဌာန်ဂအုပ်ပရေၚ်ဗၠးၜး ကောန်ဂကူပအိုဝ် PNLO တံ ပါလုပ်ရ။

ပ္ဍဲကောံဓရီုတၟေၚ် ဂကောံဒေါအ်ပန်ပှော်တံဂှ် ပ္ဍဲအရာအာစိုပ်ဆဵုဂဗကဵု က္ဍိုပ်သ္ကိပ်ပၞာန်ဂှ် သ္ဂုတ်သွာတ်ဖျေံစၟတ်လဝ် တၚ် (၅) တၚ် မပ္တံကဵု သွက်သ္ဂောံဂွံ တၚ်ကဵုကသပ်ဂၞန် နူဗွိုၚ်ဍုၚ်သ္အာၚ်တံကီု၊ သွက်သ္ဂောံဂွံပရေၚ်ကၠိုဟ်စိုတ် အကြာဂကောံဇြဟတ်လညာတ်ဟွံတုပ် နူအပ္ဍဲဍုၚ်မ္ၚးဍုၚ် သ္ဂောံဂ္စါန်အာတံ မပါလုပ် သွက်ဂွံသဳကၠဳပ္ညဳပ္ညပ် အကြာဂကောံရပ်လွဟ်ကောန်ဍုၚ်အရၚ်တံရ။

က္ဍိုပ်သ္ကိုပ်ပၞာန်သီအဝဵု မေန်အံၚ်လှာၚ်ဂှ် သွက်ပဋိပက္ခရပ်လွဟ် သ္ဂောံဒေါအ်အာဂှ် အလဵုညး ဒဒှ်ရမိက်ဂွံဆဵုဂဗကဵု က္ဍိုပ်သ္ကိုပ်ရပ်လွဟ်ကောန်ဍုၚ်အရၚ်တံတုဲ နကဵုဂကောံမအာစိုပ်ဆဵုဂဗတံ ပ္ဍဲဂိတုမေ စၟတ်တ္ၚဲ (၉) ဏံ စွံလက္ကရဴအိုတ်တုဲ သွက်ဂွံကဵုစရၚ် ယၟုဂှ် ကော်ဘိက်လဝ်ရ။

အခိၚ်လၟုဟ်ဂှ် ဒပ်ပၠတရဴကောန်ဂကူချေၚ် CNF မထ္ပက်လဝ်စၟတ်တဲ ဒေါအ်ပန်ပှော်၊ ဂကောံဗၠးၜးကချေၚ် KIO ၊ ဗော်တောတက်ကရေၚ်ဍာဲ KNPP ဂကောံဟွံဂွံထ္ပက်လတ်စၟတ်တဲ ဒေါအ်ပန်ပှော်ဏီတံဂှ် လ္တူပွမကော်ဘိက် သွက်ဂွံသဳကၠဳပရေၚ်ၜိုဟ်လလမ် က္ဍိုပ်သ္ကိုပ်ပၞာန်ဂှ် တိုန်စိုပ်သဳကၠဳအာ ဟွံသေၚ်ပုဟ်ဂှ် လလောၚ်ပ္တိတ်လဝ် ဗွဲမလုပ်သၞောဝ်ရ။ ပရိုၚ်−သြၚ်လောန်တိုၚ်(မ်)