မတ်မလီု၊ အံက်တဝ်ဗာ (၁၅)
သၟာကမၠောန်ဆုဲပြံၚ်ကၟိန်ဍုၚ်ဗၟာ တတ်ကၠောံပယျဵုဒၞက်တုဲ ဒဒှ်မကၠတ်လုပ် အပ္ဍဲဍုၚ်သေံဂှ် ဟွံစှ်ေအာတုဲ ဆက်သၠုၚ်တိုန်ဒၟံၚ်ဂှ် ညးမရီုဗၚ် ပရေၚ်သၟာကမၠောန်ဆုဲပြံၚ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲကၟိန်ဍုၚ်ဗၟာ ကြဴနူဒပ်ပၞာန်သီအဝဵုတုဲဂှ် ဟိုတ်နူအခေါၚ်အဝဵု ကမၠောန်ကၟိတ် အောန်စှ်ေကၠုၚ်ကီု၊ သြန်လုပ်လၟေၚ်ၚ်ဟွံမွဲကီုတံမပါလုပ် သီုကဵုအခက်အခုဲပရေၚ်စသုၚ်မံၚ်စံၚ် သ္ၚိကၟိန်တံတုဲ သၟာကမၠောန်ဆုဲပြံၚ်ကၟိန်ဍုၚ်ဗမာတံဝွံ အရိုဟ်ဒဒှ်တ္ၚဲ တတ်ကၠောံပယျဵုဒၞက် ဟွံလုပ်သၞောဝ်တုဲ လုပ်စိုပ်ဒၟံၚ် အပ္ဍဲဍုၚ်သေံရ။
အတိုၚ်တၚ်လလောၚ်တြး အလဵုအသဳသေံတံဂှ်မ္ဂး သၟာကမၠောန်ဆုဲပြံၚ်ကၟိန်ဍုၚ်ဗၟာ တတ်ကၠောံပယျဵု ဟွံလုပ်သၞောဝ်တုဲ မလုပ်စိုပ်ကၠုၚ်တံဝွံ သရောပ်မ္ဂး မွဲဂိတု လၟိဟ်မၞိဟ် နူ (၃၀၀၀) စဵုကဵု (၄၀၀၀) နွံဒၟံၚ်ဂှ် လလောၚ်ပ္တိတ်လဝ်ရ။
စပ်ကဵုသၟာကမၠောန်ဆုဲပြံၚ်ကၟိန်ဍုၚ်ဗၟာတံ ကၠတ်လုပ်စိုပ်အပ္ဍဲဍုၚ်သေံ ဟွံဗဗွဲကဵုသၞောဝ်ဂှ်တုဲ ဥက္ကဌဇာဇၞိက်အခေါၚ်အရာ သၟာကမၠောန်ဆုဲပြံၚ် (MWRN) ဥူကျဝ်အံၚ် ဟီုလဝ်သာ်ဏံရ။
“ ဒဵုကဵုအကာဲအရာလၟဟ်ဂှ်တှ်ေ အပ္ဍဲဍုၚ်ဇကုတံဂှ် ကမၠောန်ကၟိတ်လေဝ်ဟွံမွဲ၊ ပရေၚ်ဂီုကၠီုဟွံမွဲ၊ အရာအိုဿီု အခိၚ်ဒးဂဗဒၟံၚ်ကဵု အခက်အခုဲတံဂှ် သၟတ်အာယုက်အဝဲစိုပ်တုဲ ကၠောန်ကမၠောန်မာန် မၞုံအပ္ဍဲဍုၚ်တေံ ဗွဲမဂၠိုၚ်ဂှ်တှ်ေ ကၟိန်ဍုၚ်ဇိုၚ်ဝုတ်ဒိုဟ်အာဂွံ လောဲလောဲသွာသွာဟီုဂှ် ဍုၚ်သေံမွဲရ နွံ၊ တုဲပၠန် နကဵုလညာတ် စိုပ်ကၠုၚ်ဍုၚ်သေံမ္ဂး ကလိဂွံကမၠောန်ကၟိတ်တံ ဗွဲမလောဲသွာမာန်ဂှ် ကၠတ်လုပ်စိုပ်ကၠုၚ် ဍုၚ်သေံ ဟွံဗဗွဲကဵု သၞောဝ်တံဂှ်တှ်ေ ဒေါအ်ဒေၚ်အာဟွံမွဲတုဲ နွံဒၟံၚ်အတိုၚ်တြေံဖိုဟ်ရ” ဂှ် ညးသ္ဂးရ။
အခိၚ်လၟုဟ် အလဵုအသဳသေံဝွံ သွက်ဂွံကၠောန်ကဵု တၞးကာဒ်အခေါၚ်ကၠောန်ကမၠောန် (တၞးကာဒ်သာ်ပ္ကဴ) သွက်သၟာကမၠောန်ဆုဲပြံၚ်ကၟိန်ဍုၚ်ဗၟာ ဟွံလုပ်သၞောဝ်တံဂှ် တုဲကၠုၚ် နူဂိတုအဝ်ဂါတ် (၁) စဵုကဵု (၁၅) တေံ သွက်ဂွံအာတ်ပ္တိုန်လိက် နူကဵုသၞောတ်အန်လာၚ်ဂှ် ကဵုလဝ်အခေါၚ်ရ။
ဆ္ဂး သွက်သၟာကမၠောန်ဆုဲပြံၚ် လုပ်စိုပ်ကၠုၚ် လက္ကရဴဏံ သက်သဳဟွံမွဲတံဂှ် ဂွံကၠောန်ကဵုတၞးကာဒ်ကောန်ဍုၚ်သာ်ပ္ကဴဂှ် ဟွံဂတာပ်အခိၚ်တံ နွံဒၟံၚ်တုဲ ဒးဂဗဒၟံၚ် အခက်အခုဲတံရဂှ် ဥူအံၚ်ကျဝ် သ္ဂးရ။
အခိၚ်လၟုဟ် အတိုၚ်သၞောတ် MOU လိက်ကသုက်တုပ်စိုတ် သေံ−ဗၟာ ၜါဍုၚ်ဂှ်မ္ဂး ၜိုန်ရပလံၚ်ဗစိုပ်ကဵုဒၟံၚ် သၟာကမၠောန်ဆုဲပြံၚ်တံ နူကဵုဂၠံၚ်လုပ်သၞောဝ် ပ္ဍဲဍုၚ်သေံတေံကီုလေဝ် မွဲဒမြိပ်ပယျဵုဒၞက်ဂှ် သၟာကမၠောန်ဆုဲပြံၚ်ကၟိန်ဍုၚ်ဗၟာ ဟွံလုပ်သၞောဝ် ကၠတ်လုပ်ကၠုၚ်တံဝွံ ဆက်နွံဒၟံၚ် အရိုဟ်ဒဒှ်တ္ၚဲရ။
ပရိုၚ်−သြၚ်လောန်တိုၚ်(မ်)