သဓီု- နိုဝမ်ပါ ၁၂
ဥက္ကဌ ခရိုၚ်သဓီု မဟာဒပ်(၁) ဗော်သွးကောန်ဂကူကရေၚ် KNU ပဒိုသဝ်သိုဝ်မျေအ် မပါလုပ်မၞိဟ် ၂၂ နကဵုဥပဒေစဵုဒၞာပေါဲရုဲမာဲ ဒးဒုၚ်ကေတ်အရေဝ်ပံက်လဝ်အမှုရောၚ် လပါ်ကဝ်မယှေန်ပၞာန် ပတိတ်လဝ်ပရိုၚ်ရ။
ပေါဲရုဲမာဲ ကဝ်မယှေန် သီအဝဵုကၠောန်အာဏံ KNU ခရိုၚ်သဓီု ဒစဵုဒစးပတိုက်သရိုဟ်အာဏောၚ် ဟိုတ်နူပတိတ်လဝ်လိက်လလောၚ်တြးဂှ်ရ ပ္ဍဲကဵုနဝ်ဝမ်ပါ ၅ ဂှ် ပံက်လဝ်အမှုပ္ဍဲကဵုဗ္ဒိုပ်ဗၠာဲသၟိၚ် တိၚ်သိက် ပွိုၚ်ဍုၚ်သဓီုသ္ဂးရ။
ဥက္ကဌ ခရိုၚ်သဓီု KNU ပဒိုသဝ်သိုဝ်မျေအ် မပါလုပ် သီုမၞိဟ် ၂၂ တၠတံဂှ် နကဵုဥပဒေစဵုဒၞာပေါဲရုဲမာဲ ၝောံပိုဒ် ၂၃(ခ) ပံက်လဝ်အမှု မဒှ်ရ။
လ္တူကဝ်မယှေန်ပၞာန် ကေတ်အရေဝ်ပံက်လဝ်အမှုဂှ် ညိလေဝ်ဟွံသ္ပကာ၊ အတိုၚ်မူဝါဒ ဆက်ကၠောန်အာဏောၚ် KNU ခရိုၚ်သဓီု ညးအုပ်ကာ ပဒိုသဝ်ဧနိုင် ဟီုကဵုဌာန်ပရိုၚ် သြၚ်လောန်တိုၚ်မ်ရ။
ပ္ဍဲအရာဗတိုက်သရိုဟ်အာ ပေါဲရုဲမာဲကဝ်မယှေန်ပၞာန်ဂှ် ပံၚ်ကောံအာက္ဍိုပ်မွဲကရောံကဵု ညးဆေၚ်စပ်တံတုဲ KNU ခရိုၚ်သဓီုဒက်ပတန်အာ ဂကောံဇြဟတ်မွဲ ဗတိုက်ပလီုအာရောၚ်ဂှ် တုဲကၠုၚ်ဂိတုသိပ်တမ်ပါ ၂၀ တေံ လလောၚ်တြးလဝ်ရ။
မွဲလပါ်ဂှ်ပၠန် ဥက္ကဌ KNU ပဒိုသဝ်ကွေဝ်ထူဝေန်ကဵု မၞိဟ် ၁၃ တၠ၊ ဒပ်ပၞာန်အာရက္ခ AA၊ ဂကောံအလဵုအသဳဍုၚ်ချေၚ် ၁၇ တၠတံဂှ်လေဝ် ကဝ်မယှေန်ပၞာန်ပံက်လဝ်အမှု နကဵုဥပဒေစဵုဒၞာပေါဲရုဲမာဲ ပ္ဍဲကဵုသိပ်တမ်ပါ ၂၄ တေံကီုရ။
လ္တူပေါဲရုဲမာဲကၠောန်အာဏံ ညးဒစဵုဒစးမံၚ်တံဂှ် နကဵုဥပဒေစဵုဒၞာ ပေါဲရုဲမာဲကဝ်မယှေန်ပၞာန် ပံက်အမှုကေတ်မံၚ်အရေဝ် ကၠောန်ကၠုၚ်မံၚ်အဆက်က် မဒှ်ရ။
ပရိုၚ်-သြၚ်လောန်တိုၚ်မ်
Photo – KNU