ဗေဂျေန်၊ နိုဝမ်ပါ ၁၇
ယဝ်ရထာဲဝါန် ဒးဒုၚ်ဗတိုက်မ္ဂး အကာဲအရာဒှ်ကၠုၚ်မာန် သ္ကိုပ်ဝန်ဇၞော်ဂျပါန် တာကာအဳချဳဟီုလဝ်ဂှ် အကြာအမာတ်ကလုတ်တံ ဒှ်ပရေၚ်ကယျာန်ဓဝါတ်တုဲ ကောန်ဍုၚ်ကြုက်တံ လ္ပအာဂျပါန်ညိဂှ် ကြုက်တိုက်ဖအောဝ်လဝ်ကောန်ဍုၚ်တံရ။
ထာဲဝါန်ဂှ် ဒှ်ညးတံပိုၚ်လဝ်ရောၚ် ကြုက်ဟီုလဝ်တုဲ ယဝ်ရၜက်ၜေတ်ဗတိုက်ကၠုၚ်မ္ဂး ဂျပါန်လေဝ် ပါလုပ်ဗတိုက်ကီုရောၚ် ပ္ဍဲကဵုစၠတ်ထဝ် သ္ကိုပ်ဝန်ဇၞော်တာကာအဳချဳဟီုလဝ် ပ္ဍဲနိုဝမ်ပါ ၇ ရ။
စပ်ကဵုပရေၚ်ဟီုလဝ်သာ်ဏံဂှ် ကုတ်ထောံကအ်သ္ကိုပ်ဝန်ဇၞော်ဂျပါန်ရောၚ် ညးတာလျိုၚ်ကြုက်မွဲတၠ ချူဘပဠလဝ် ပ္ဍဲမဳဒဳယာပရေၚ်မၞိဟ်ရ။
စပ်ကဵုပရေၚ်ချူဘပဠလဝ် လ္တူအန်လိုၚ်တုဲ ဗီုဂျပါန်ကော်ဟီုလဝ် အမာတ်ကလုတ်ကြုက်ဂှ် ဗေဂျေန်လဝ် ကော်ဟီု အမာတ်ကလုတ်ဂျပါန်ကီုရ။
သ္ၚောဲခြာမံၚ်ၜိုတ် ၁၀၀ ကဳလဝ်မဳတာ နူကဵုဂျပါန်တုဲ စပ်ကဵုပရေၚ်ထာဲဝါန်မ္ဂး တင်ဒတူလိုင်ပိုဲတံ ပြံၚ်သၠာဲဟွံသေင်ပုဟ် အလဵုအသဳ တိုကျိုဟီုလဝ်ရ။
ကောန်ဍုၚ်ကြုက်တံ လ္ပကၠုၚ်ဂျပါန်ညိ ရုၚ်ကလုတ်ကြုက် မၞုံဍုၚ်ဂျပါန် ဗတိုက်ဖအောဝ်ချူလဝ် ပ္ဍဲနဝ်ဝမ်ပါ ၁၄ ရ။
ပ္ဍဲဂျပါန် သွက်ကောန်ဍုၚ်ကြုက်တံ ပရေၚ်ဂီုကၠီု ဟွံဂွံဖျေံစိုတ်ပုဟ် ပ္ဍဲလိက်လလောၚ်တြးဂှ် ချူလဝ်ရ။
ဒဵုကဵု ၁၉၄၅ တေံ သၞာံဗွဝ်စှ်ဗွဲမဂၠိုၚ် ဂျပါန်သီလဝ် ထာဲဝါန်ဂှ် ဒှ်ကြုက်ပိုၚ်လဝ်ဂးတုဲ သွက်ဂွံကလေၚ်စိုပ် သၟဝ်တဲပရေၚ်အုပ်ဓုပ်ဇကု ထေက်ကဵုဒးစကာအာဇြဟတ်မ္ဂး ဒးစကာအာရောၚ် ကြုက်ဟီုလဝ်ရ။
ကြုက်ကဵု ဂျပါန်တံ ၜိုန်ရဒှ်ဍုၚ်မံၚ်ဍုၚ်ဆောဖွက် ပရေၚ်ကူသာန်သွံရာန်ကီုလေဝ် စပ်ကဵုပရေၚ်ကယျာန်ဓဝါတ် တိဍာ်ပယျဵုဓနက်ကီု နကဵုရာဇဝင် ဟွံဂံၚ်ပတေဟ်ညးသ္ကံ၊ သဘဴလစွံစိုတ်ပါ်ခြာ၊ စပ်ကဵုရပ်စပ်စကာ သၠုၚ်ပတိုန်လဝ်ပရေၚ်ဘဏ္ဍာပၞာန်တုဲ ပြဿနာနွံမံၚ်ရ။
Ref:AFP