ဒါကာ၊ နိုဝမ်ပါ ၁၈
ဂကောံနာဲဗ္စာ အခိၚ်ဖျေံအမိၚ်ဂစိုတ်ကု သ္ကိုပ်ဝန်ဇၞော်တြေံဗင်ဂလာဒက်ချ် ဟာသဳနာဂှ် ပ္ဍဲရုၚ်သၞောဝ်ဓရ်ဒါကာ ရမျှာၚ်ဖအဴညာန်တိုန်တုဲ ပေါဲထ္ၜးဆန္ဒက္တဵုဒှ်မံၚ်ဂှ် ဒးသၠုၚ်လဝ်အသိၚ် ပရေၚ်ဂီုကၠီုတံရ။
ပ္ဍဲသၞာံတုဲကၠုၚ်ဏံ အခိၚ်ကွးဘာတံ သ္ကိုပ်သ္ကကၠောန်လဝ် ပေါဲထ္ၜးဆန္ဒတံဂှ် သ္ကိုပ်ဝန်ဇၞော် ဟာသဳနာ ကဵုလဝ်စၞောန် ဗတိုက်သၠေက်ဗွဲပကီုပရာတ်တုဲ အပ္ဍဲပရေၚ်ဏံ မၞိဟ် ၁၄၀၀ ပြင်ချိုတ်လဝ်နွံ နူကုလသမဂ္ဂ တော်ဆလဝ်ရ။
ဟာသဳနာ ဒးဒုၚ်သီပလှ်အဝဵု ဂြိပ်တိတ်အာဍုၚ်အေန္ဒိယတုဲ ဗွဲကြဴမုက်ညးတေံ စၟဳစၟတ်မံၚ်အမှုဏံ မဒှ်ရ။
တင်စောဲစပ်လဝ်သီုဖအိုတ်တံဂှ် ဟာသဳနာ တးပါဲစွံတုဲ သၟာဂဗုတ်အလဵုအသဳတံဂှ် သွက်ဂွံဖျေံအမိၚ်ဂစိုတ် လွဳဂစာန်မံၚ်အိုတ်ရ။
ယဝ်ရဖျေံအမိၚ်လ္တူညးမ္ဂး ပေါဲထ္ၜးဆန္ဒ ထပ်ကလေၚ်ဒှ်ကၠုၚ်မာန်တုဲ ဒးသၠုၚ်လဝ်ပရေၚ်ဂီုကၠီု ဗွဲတၟေၚ်ရ။
ဆေင်စပ်ကဵု ဗီုပြၚ်အလဵုအသဳ ပါ်ပရအ်ကၠောန်ကမၠောန်ဂှ် သၟတ်တံ ဒေါသတိတ်တုဲ ပ္ဍဲသၞာံအာဏံ ပေါဲထ္ၜးဆန္ဒဂမၠိုၚ် ဒှ်လဝ်ရ။
အခိၚ်ဂွံကၠုၚ်သၠးပွး နူကဵုပါကေတ်သတာန် သွက်ကၟိန်အိန်ထံၚ်ညးပါလုပ်ဗတိုက်ကၠုၚ်လဝ်တံ အလဵုအသဳပါဲစွံလဝ်ကဵု ဒၞာဲကမၠောန် ၃၀% ဂှ်တုဲ အကြာသၟတ်ဂမၠိုၚ် အခိၚ်ကမၠောန်ဟၟဲဂၠိုၚ်တိုန်ဂှ် ညးဍုၚ်ကွာန်တံ ဒေါသတိတ်ကၠုၚ်လဝ် မဒှ်ရ။
အခိၚ်အလဵုအသဳယာယဳ ကေတ်ကၠုၚ်လဝ်တာလျိုၚ်ဏံ ယှအ်ဖျေံထောံ သၞောတ်ထ္ၜးတံဏံကၠးကၠးမးမးနွံတုဲ အခိၚ်လၟုဟ် ခုတ်စၟတ်လဝ် ၜိုတ် ၅% မဒှ်ရ။
Ref:BBC