လံၚ်လုၚ်၊ ဒဳဇြမ်ပါ ၃၀
ရးတနၚ်သဳ ပ္ဍဲပွိုၚ်ဍုၚ်လံၚ်လုၚ် ဟိုတ်နူဒပ်ပၞာန်ပန်လွဟ်ဇၞော်ဂှ်ရ ညးဍုၚ်ကွာန်ချိုတ်မွဲတၠတုဲ ကျာ်ဇၞော်မွဲတၠ ဒးလဝ်ဝပ်နွံ ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
တ္ၚဲကၠောန်ပေါဲရုဲမာဲ ဒဳဇြမ်ပါ ၂၈ အခိၚ်နူဂယးဂှ် နူကဵုဒပ်ကဝ်မယှေန် ဖျေံလဝ်သ္ဇိုၚ် ပ္ဍဲဍုၚ်ထဝါဲကဵု ဍုၚ်လံၚ်လုၚ်တံ ပန်မံၚ်လွဟ်ဇၞော်ကဵု ကွာန်ဗ္ဒာဲကရပ်တံ ကြာန်န်ရ။
အတိုၚ်ညးဒေသတံဟီုမ္ဂး အခိၚ်ကၠောန်မံၚ်ပေါဲရုဲမာဲ လ္တူဍုၚ်ထဝါဲ ဗုမ်ခတိုဟ်အာမွဲဒၞာဲတုဲ ဒပ်ပၞာန်ဗမာတံ ပန်ခြော်ဏာလွဟ်ဇၞော် ကြာန်န် ဒၞာဲကဵုကွာန်ဗ္ဒာဲဗ္ဒာဲတံ မဒှ်ရ။
လွဟ်ဇၞော်နူဒပ်ကဝ်မယှေန် ပန်စုတ်ဏာမွဲမဂှ် ဒတုံခတိုဟ်စှ်ေအာ ကရပ်ကွဳစက်ကျာ်ဇၞော် ကွာန်ပျေန်ထိၚ်ဘာဗၟံက်ဂှ်တုဲ ကွဳစက်လီုလာ်အာ ကျာ်ဇၞော်လေဝ်ဒးဝပ်ရဂှ် ညးဒေသညးတြုံမွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
အပ္ဍဲကဵုတ္ၚဲဂှ်အခိၚ်နူဂယးဂှ်တှ်ေ နူကဵုဒပ်ကဝ်မယှေန်ပၞာန် ဖျေံလဝ်ဒပ် ပ္ဍဲကွာန်နခါန်တဝ် ပွိုၚ်ဍုၚ်လံၚ်လုၚ် ပန်ဏာလွဟ်ဇၞော်ဒတုံစှ်ေအာ ပ္ဍဲကွာန်ထိၚ်တွေင်ဂှ် ဥူသိုဝ်တေအ် အယုက် ၆၀ ဒးဝပ် ချိုတ်အာလဝ် သ္ဂးရ။
အခိၚ်ကဝ်မယှေန်ပၞာန် ကၠောန်မံၚ်ပေါဲရုဲမာဲသ္ကုတ် ၁ ကဵုမံၚ်မာဲ လ္တူဍုၚ်ထဝါဲဂှ် ဗုမ်ခတိုဟ်လေဝ်နွံ ပ္ဍဲပွိုၚ်ဍုၚ်ဗုက်ပျေၚ် အကြာဒပ်ကဝ်မယှေန်ပၞာန်ကဵု ဒပ်ပၠန်ဂတးတံ ၜါလပါ် ဒှ်မံၚ်ပေါဲဗတိုက်ကီု ဂွံတီရ။
ပရိုၚ်-သြၚ်လောန်တိုၚ်မ်
Photo – Social Media