မုဟ်ဍုၚ်၊ ဂျာန်နဝါရဳ ၇
ညးဗြဴၜါတၠ ဒးဒုၚ်ဂစိုတ်လဝ် နူကဵုပွိုၚ်ဍုၚ်မုဟ်ဍုၚ်ကဵု ဍုၚ်ဗြဝတဳ ပ္ဍဲကဵုတွဵုရးကရေၚ်တံ ဒဵုအခိၚ်တ္ၚဲဏံ တၠတဲဟွံမံက်ဏီ ဒှ်မံၚ်ဂှ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ဇွညးဗြဴမွဲတၠ ဒးဒုၚ်ပန်လဝ်ကဵုလွဟ် ချိုတ်မံၚ် ပ္ဍဲကၠအ်ရာဘာ ဒကဲဂၠံၚ်ကွဳစက် ဇြပ်ဗု-မုဟ်ဍုၚ် ဒၞာဲကွာန်ဆက်တဲ ပွိုၚ်ဍုၚ်မုဟ်ဂှ် ညးဒေသတံ ဆဵုလဝ် တ္ၚဲဂျာန်နဝါရဳ ၄ တေံရ။
မထိတ်တ်မိုဝ်ဥူ အယုက် ၃၄ သၞာံ ကောန်ကွာန်ဝါရက် ပွိုၚ်ဍုၚ်ဇြပ်ဗု အဃောအာထ္ၜးခဒမ်ဂဥုဲဍုၚ်မုဟ်ဍုၚ်ဂှ် ဒးဒုၚ်ပန်ဂစိုတ်လဝ်ကဵုလွဟ် ညးဒေသတံ ဟီုရ။
ပ္ဍဲဂျာန်နဝါရဳ ၅ ဂှ်လေဝ် လ္တူဍုၚ်ဗြဝတဳ ပ္ဍဲသ္ၚိနွံမံၚ်အရာပ် ၃ မွဲမဂှ် ညးဗြဴမွဲတၠ ဒးဒုၚ်ဒက်လဝ်ဇုက်သီုဇိုၚ်သီုတဲ ကၠေၚ်မာတ်လဝ်ယာတ်မာတ်မုက်၊ ဒးဒဏ်ဘဲဝပ်ၜုၚ်ဖျိပ်လဝ်က္ဍိုပ် ဂစိုတ်ထောံလဝ်ဂှ် ညးဒေသတံ ဆဵုညာတ်လဝ် သ္ဂးရ။
ညးချိုတ်လဝ်ဂှ် ဒဝ်မေသာန် အယုက် ၄၃ ရဲသွံဆေင်ဖျာကပေါတ်စၞဟကှ် ပ္ဍဲကဵုဖျာဗယျေအ်နံၚ်ဗြဝတဳ၊ ဇာတိ နူကဵုဍုၚ်ရေဝ် တွဵုရးမန် ဂွံတီရ။
အခိၚ်ကာလပၞာန်သီအဝဵုဏံ ညးဗြဴတံ ပရေၚ်ဂီုကၠီုဟၟဲတုဲ ဒးဒုၚ်ဟဍိုက်ဟရိုဟ်ပရေၚ်လိၚ်ကဵု ပရေၚ်ဂစိုတ် ပကီုပရာတ်တံ မွဲဏှမွဲဏှ ဒးဆဵုဂဗလဝ် မဒှ်ရ။
အတိုၚ်တၚ်နၚ် ဂကောံရီုဗၚ်ကောန်ထံၚ်ပရေၚ်ဍုၚ်ကွာန် AAPP တံမ္ဂး အခိၚ်ပၞာန်သီလဝ်အဝဵု ကရပ်ပွိုၚ် ၅ သၞာံဏံ ဟိုတ်နူကဝ်မယှေန်ပၞာန် ရပ်ဂစိုတ်လဝ်တုဲ ညးဗြဴကရပ် ၂၀၀၀ တၠ ချိုတ်လဝ်နွံရ။
ပရိုၚ်-သြၚ်လောန်တိုၚ်မ်
Photo – CJ