ဗြဝတဳ၊ ဂျာန်နဝါရဳ ၇
ဍိက်ညးတၞဟ်ဂှ်ဟွံသ္ပ၊ သ္ပတၠနာဲ အုပ်ဓုပ်ပကၚ်ရၚ်အာ တိဍာ်ဇကုတံရောၚ် ဒပ်ပၞာန်ကောန်ဂကူကရေၚ် KNA ညးတာလျိုၚ်သ္ကုတ်ဒေသပၞာန်လၟိဟ် ၂ ဒုသ္ကိုပ်ပၞာန် သဝ်တေန်ဝေန် ဟီုရ။
ပ္ဍဲကဵုအကြာတ္ၚဲတံဏံ ကၠောန်လဝ်အခန်ကၞာ နူကဵု BGF ပြံၚ်သၠာဲတဆိပ်ပၞးတၟိ KNA ဂှ် ဒုသ္ကိုပ်ပၞာန် သဝ်တေန်ဝေန် ဟီုလဝ်ဂလာန်ဗကန်ကဵု ကောန်ပၞာန်ဍေံတံရ။
သွက်သၠးပွးဍုၚ်ဇကု သီုညးဖအိုတ်တံ အလဵုဇကုဇကု ဒးကၠောန်ကေတ်ဏောၚ်၊ သ္ပတၠနာဲရောၚ် သ္ပဍိက်ဟွံမာန်ပုဟ် ကၠုဟ်ရသေၚ်” ဒုသ္ကိုပ်ပၞာန် သဝ်တေန်ဝေန် သ္ဂးရ။
စနူဂျာန်နဝါရဳ ၁ တေံ နူကဵုဒပ်မၚ်ပယျဵုကရေၚ် BGF ပြံၚ်လှာဲ KNA ဂှ်တှ်ေ ပလှ်ထောံတဆိပ်ပၞး BGF တုဲ ပြံၚ်စုတ်လဝ် တဆိပ်ပၞး KNA ရ။
တမ်ဒပ် BGF ဗွဲမဂၠိုၚ် ပြံၚ်ထောံတဆိပ်ပၞး KNA ကီုလေဝ် တမ်ဒပ်BGF ၁၀၂၂ သ္ကိုပ်ဗိုလ်သဝ်မုက်တုၚ်တံ ဟွံပါလုပ်ပုဟ် ဂွံတီရ။
နူကဵု BGF ဒေသပၞာန်လၟိဟ် ၃ သဝ်ချေတ်တူကဵု ကောန်ဍေံတံ၊ နူကဵု BGF ဒေသပၞာန်လၟိဟ် ၂ သဝ်တေန်ဝေန်တံ ပါ်တိတ် ပြံၚ်အာ KNA တုဲ ဥက္ကဌ၊ ဒုဥက္ကဌ၊ ဒေသပၞာန်လၟိဟ် ၁ ကဵု ဒေသပၞာန်လၟိဟ် ၄ တံ ဟွံပါ်တိတ်အာ ဆက်နွံမံၚ် နဒဒှ် ဒပ် BGF ဖိုအ် ညးတြးဝါဒဂကောံပၞာန်တံ သ္ဂးရ။
BGF ပြံၚ်လဝ် KNA တုဲဗွဲကြဴဏံ ညးတာလျိုၚ်ကဵု ကောန်ပၞာန်ဗမာ တောဲစုတ်လဝ်ကဵု BGF တံဂှ် နူကဵုကဝ်မယှေန်ပၞာန် ကလေၚ်ကော်ဖျဴဏာဂှ် ဂွိၚ်ဖေက်အကြာၜါ်လပါ် အကာဲအရာကြံၚ်မ္ၚိုဟ်တုဲ လတူဍုၚ်ဖာအၚ်၊ ဍုၚ်ဗြဝတဳကဵု ဍုၚ်လ္ၚဵုလ္ၚဵုတံဂှ် နူကဵုဒပ်ကဝ်မယှေန်ပၞာန် သၠုၚ်လဝ်ပရေၚ်ဂီုကၠီု ဗ္ၚုဟ်လဝ်ဒပ် ကဵုမၚ်လဝ်ဂွန်အိုတ်ရ။
စပ်ကဵုပရေၚ်ပြံၚ်သၠာဲလဝ် KNA ဂှ် လလောၚ်ပတိတ်လဝ် ဗဗွဲလုပ်သၞောဝ်လေဝ်ဟၟဲဏီ၊ နူကဵုလပါ်ကဝ်မယှေန်ပၞာန်ဗမာလေဝ် မုလေဝ်ဟီုဂးလလောၚ်တြးလဝ်ကီု ဟွံဂွံဆဵုဏီရ။
ဆဂး ပ္ဍဲကဵုပရေၚ်ဗတိုက်သရိုဟ် ကမၠောန်ကျာဖျ ယှိုဲကုက်ကိုဂှ် BGF ပံၚ်ကၠောန်လဝ်လေဝ်နွံ ဟွံပံၚ်ကၠောန်လေဝ်နွံတုဲ ဒးပါ်ကၠောန်အာချိုတ်တ်ပၠိုတ်တ်ရောၚ် ညးအခေါၚ်ဟီုဂးနွံ ကဝ်မယှေန်ပၞာန် သ္ကိုပ်ပၞာန် ဇြဝ်မေန်ထောန် ဟီုလဝ် ပ္ဍဲကဵုပေါဲသောၚ်ကလးလိက်ပရိုၚ် ဂိတုဒဳဇြမ်ပါတေံရ။
ပရိုၚ်-သြၚ်လောန်တိုၚ်မ်
Photo – BGF