ဖာအၚ်၊ ဂျာန်နဝါရဳ ၁၄
တွဵုရးကရေၚ် ဂိက်သၞေဟ်ကၚ် BGF နွံမံၚ်ပွိုၚ်ဍုၚ်ဖာအၚ်မွဲဒၞာဲဂှ် ၜၚ်ကျာဒပ်ပၞာန်ဗမာကြဳဖျေံဗုမ်ရဂှ် တမ်ရိုဟ်ပရိုၚ်ဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ပ္ဍဲဂျာန်နဝါရဳ ၁၂ ၜိုတ်အခိၚ်သဝ်တ္ၚဲ ၄ နာဍဳ ဒၞာဲဂိက်သၞေဟ်ကၚ် အကံက် BGF မွဲဒၞာဲ နွံမံၚ်ကွာန်သိုက်တဝ်ဂှ် ပေါဲဗတိုက်ဟၟဲကီုလေဝ် ၜၚ်ကျာဒပ်ပၞာန်ဗမာ ကၠုၚ်ကြဳဖျေံဏာဗုမ်ရ။
ဟိုတ်နူၜၚ်ကျာဒပ်ပၞာန်ဗမာ ကြဳဖျေံဏာဗုမ်ဂှ် ရဲဒဳဂၠုၚ်စက်မွဲတၠချိုတ်အာတုဲ၊ ကောန်ပၞာန် BGF ဟွံအောန်နူကဵုပိတၠ ဒးလဝ်ဝပ်ဂှ်တှ်ေ ဒးဂွိၚ်မံၚ်ကဵုအန္တရာဲလမျီုနွံမွဲတၠ သ္ဂးရ။
ကွာန်သိုက်တဝ်ဂှ် နွံမံၚ်အကြာပွိုၚ်ဍုၚ်ဖာအၚ်ကဵု ပွိုၚ်ဍုၚ်လိုၚ်ဗၠဲတုဲ ကပေါတ်လုပ်ကၠုၚ်နူဍုၚ်သေံ မပ္တံကွဳစက်လိုၚ်သေၚ်ဟၟဲ၊ ကၠေင်စက်၊ စနူကဵုကပေါတ်ဗၞိက်နာနာတံကီု နူကဵုဂိက်သၞေဟ်ကၚ် ကွာန်သိုက်တဝ်ဏံ စၠောအ်ကဵုဖံၚ်ဂၠုၚ်စက် ဗစိုပ်ကဵုကွာန်ဝတ်ဂျဳ ထၜက်ကဵုၜဳသြၚ်လောန်မွဲလပါ်တေံရ။
ပ္ဍဲကဵုစၠောအ်ကဵုမံၚ်ဖံၚ်ဂၠုၚ်စက်တံဂှ် BGF ကံက်အကံက်ကီု၊ ကပေါတ်ဗၞိက်တံကဵု ကွဳစက်လိုၚ်သေၚ်ဟၟဲတံဂှ်တှ်ေ မိက်ဂွံပါဲဓလေတ်ဂၠံၚ် ဒဒန်သြၚ်လောန်ဍုၚ်ဖာအၚ် ဂိက်သၞေဟ်ကၚ်စၟဳစၟတ်ဂှ်တုဲ နူကဵုဂၠံၚ်ဗၞိက်ဒမၠု ကွာန်သိုက်တဝ် ဂိက်သၞေဟ်ကၚ် BGF ဏံမွဲအဆံၚ် ဒးကၠောံအာမံၚ်မဒှ်ရ။
နူကဵု BGF ကံက်မံၚ်အကံက်ဗီုတံဏံဂှ် နူကဵုကဝ်မယှေန်ပၞာန်ဗမာ တီလဝ်နူကၠာတေံကီုလေဝ် မုလေဝ်ဟွံဟီုဂးကၠုၚ်။ ဆဂး အခိၚ်လၟုဟ် နူကဵု BGF ပြံၚ်လှာဲအာ KNA မှ ဒပ်ပၞာန်ကျာ ကၠုၚ်ကြဳဖျေံဗုမ် အလန်ပထမကိုပ်ကၠာအိုတ် မဒှ်ရ။
ပရိုင်-သြၚ်လောန်တိုၚ်မ်
Photo – KNA