ပ္ဍဲတွဵုရးမန် ပေါဲရုဲမာဲဒပ်ပၞာန် ညးစုတ်မာဲ ၄၀% ဟွံပေၚ်

မတ်မလီု ၊ ဂျာန်နဝါရဳ ၁၄

ပ္ဍဲကဵုတွဵုရးမန် ပေါဲရုဲမာဲသ္ကုတ် ၁ ကဵု သ္ကုတ် ၂ ဒပ်ပၞာန်ဗမာကၠောန်အာဂှ် ညးကၠုၚ်စုတ်မာဲကြပ် ၄၀% နွံမံၚ်ရောၚ်ဂှ် ဂွံတီကေတ် အတိုၚ်တၚ်နၚ်ကဝ်မယှေန်ပေါဲရုဲမာဲကၟိန်ဍုၚ်ရ။

အတိုၚ်တၚ်နၚ် ကဝ်မယှေန်ပေါဲရုဲမာဲကၟိန်ဍုၚ်မ္ဂး ပ္ဍဲပေါဲရုဲမာဲသ္ကုတ် ၁ ကၠောန်လဝ် ပွိုၚ်ဍုၚ်ကျာ်ထဝ်၊ သဓီု၊ မတ်မလီု၊ ၜါသွာၚ်ကဵုကျာ်မြဟ်တံ ညးကၠုၚ်ကဵုမာဲကရပ် ၆ ကိုတ်နွံတုဲ အပ္ဍဲကဵုဏံညးကၠုၚ်စုတ်မာဲ ပိဠက်ပြၚ် နွံမံၚ် ၃၉% ပြၚ်ရ။

ပ္ဍဲပေါဲရုဲမာဲသ္ကုတ် ၂ ပွိုၚ်ဍုၚ်ၜဳကလေၚ်၊ ပံၚ်၊ မုဟ်ဍုၚ်၊ ဇြပ်ဗုကဵုရေဝ်တံ ညးအခေါၚ်ကဵုမာဲ ၅ ကိုတ် ၉ လက်ပြၚ်နွံတုဲ ညးကၠုၚ်ကဵုမာဲ ၂ ကိုတ် ၁ ဠက်ပြၚ် ကြပ် ၃၉% နွံမံၚ် မဒှ်ရ။

ယဝ်ရ ဟွံကၠုၚ်စုတ်မာဲမ္ဂး ကဝ်မယှေန်ပၞာန် ဖေက်ကၠောန်လ္တူညးတံ မွဲမွဲဗီုဒှ်ဒွိၚ်တုဲ ဗွဲမဂၠိုၚ်ကဵုမာဲကီုလေဝ် လ္တူပေါဲရုဲမာဲဂှ် မၞိဟ်ဂမၠိုၚ်တံ စိုတ်ဟွံလုပ်စပုဟ်ဂှ် ညးဒေသရေဝ်မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။

“မၞိဟ်ဗွဲမဂၠိုၚ်တံဂှ်တှ်ေ ယဝ်ရညးတံဟွံကၠုၚ်ကဵုမာဲတှ်ေ မွဲမွဲဗီု၊ ဒှ်ပရေအ်ပရေအ်မာန်ဟာ ဒှ်ဒဝိၚ်တုဲ ကၠုၚ်စုတ်မာဲရ၊ လ္တူပေါဲရုဲမာဲဂှ် ညးတံစိုတ်လုပ်စအောန်ကွေံကွေံ၊ ဟီုဂးမံၚ်ဗီုတေံဗီုဏံ ဖေက်ကွေံရ။ ဂွိၚ်တုဲ ဒးကၠုၚ်စုတ်မာဲအိုတ်၊ ဟွံကၠုၚ်ဟွံစုတ်လ္ပကဵုဒှ်ညိ ဟီုတုဲဒးကၠုၚ်စုတ်မာဲ” သာ်ဝွံ သ္ဂးရ။

နူကၠာဟွံစိုပ်ပေါဲရုဲမာဲဏီ ဟွံစုတ်မာဲလ္ပကဵုဒှ်ညိ ကဝ်မယှေန်ပၞာန်ဗက်ဆဝ်ဗ္ၚုဟ်မံၚ်ကဵုစက်သၠဲရမျှာၚ်၊ ဂကောံပရေၚ်အုပ်ဓုပ်တံပၠန်ဂှ်လေဝ် တိုန်မွဲသ္ၚိစှ်ေမွဲသ္ၚိတုဲကဵုဇြဟတ်ဟရိုဟ် ဗက်ဆဝ်ဗ္ၚုဟ်မံၚ်ကီုရ။

ပ္ဍဲပေါဲရုဲမာဲ ညးဟွံကၠုၚ်စုတ်မာဲဂၠိုၚ်မံၚ်ကီုလေဝ် ဟိုတ်နူကဝ်မယှေန်ပၞာန် ကဵုမံၚ်ဇြဟတ်ဟရိုဟ်နာနာသာ်တုဲ ဒးအာစုတ်လဝ်မာဲလေဝ်နွံရဂှ် ညးဒေသၜဳကလေၚ်မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။

“မၞိဟ်ဗွဲမဂၠိုၚ်တံ ဖေက်တုဲ ဒးအာကဵုမာဲရ။ ညးဍုၚ်ကွာန်တံ ဖေက်မံၚ်ဒပ်ပၞာန်ဏံဏောၚ်၊ ဘပဠလဝ်ကဵု ဥပဒေပေါဲရုဲမာဲနွံမံၚ်။ မွဲပၠန် ယဝ်ရဟွံအာကဵုမာဲတှ်ေ ကောန်ဇာတ်တံ ဒးလုပ်ယိုက်ဝန်ပၞာန်တံမုတံ။ ဇြဟတ်ဟရိုဟ်ဗီုဗီုတံဏံ နွံမံၚ်” သ္ဂးရ။

အတိုၚ်တၚ်နၚ်ကဵုလဝ်မာဲမ္ဂး ပ္ဍဲပွိုၚ်ဍုၚ်မုဟ်ဍုၚ်ဂှ် ၃၄%၊ ပွိုၚ်ဍုၚ်သဓီု ၃၂% အောန်အိုတ်၊ ပွိုၚ်ဍုၚ်ၜါသွာၚ် ၄၄% ဂၠိုၚ်အိုတ် ဒှ်ကၠုၚ်လဝ်မဒှ်ရ။

ပ္ဍဲလက်ထက်အလဵုအသဳ NLD ကၠောန်လဝ်ပေါဲရုဲမာဲ ၂၀၂၀ တေံ အလုံဍုၚ်မွဲ ကဵုလဝ်မာဲ ၇၀% ပြၚ် နွံရ။

ပေါဲရုဲမာဲဒပ်ပၞာန်ကၠောန်လဝ် ပ္ဍဲကဵုတွဵုရးမန်ဂှ် ဗော်ပျဳခိုၚ်ဖျိုဝ် ၂၁ ဒၞာဲ ဂွံဂၠိုၚ်အိုတ်တုဲ ဗော်ညဳသၟဟ်မန် ၁၇ ဒၞာဲ ဒုတိယဂၠိုၚ်အိုတ် ဂွံကၠုၚ်လဝ်ဇၞး မဒှ်ရ။

ပရိုင်-သြၚ်လောန်တိုၚ်မ်

Photo – MOI