ကအ်ကြိက်၊ ဂျာန်နဝါရဳ ၁၆
တွဵုရးကရေၚ် နူကဵုတမ်ဒပ် ခမရ ၅၄၈ ဖျေံသ္ဇိုၚ်ကအ်ကြိက် ကောန်ပၞာန် ၂ တၠ သီုကဵုလွဟ် လုပ်ဖျေံလဝ်လွဟ်ရဂှ် နူကဵုဌာန်ဂအုပ်ဗဟဵု ဗော်သွးကောန်ဂကူကရေၚ် KNU လလောၚ်ပတိတ်ပရိုၚ်ရ။
ကောန်ပၞာန် ၂ တၠဏံ ဒးဒုၚ်ပကောံလဝ် သွက်ယိုက်ဝန်ပၞာန်အတေၚ်အဓ္ဓမဂှ် ပ္ဍဲဂျာန်နဝါရဳ ၁၂ ဂှ်တှ်ေ ကေတ်နၚ်သီုကဵုလွဟ်မကမ်တံတုဲ လုပ်ဖျေံလွဟ်ဇရေၚ်ဒပ် KNLA မဟာဒပ် ၇ ခရိုၚ် ဖာအၚ်ရ။
ကောန်ပၞာန်အာယုက် ၂၅ သၞာံ သဳတူဟုၚ်ကဵု ကောန်ပၞာန် မိုၚ်မိုၚ်သိုဝ် အယုက် ၂၄ တံ ဟိုတ်နူကၠုၚ်ဖျေံလွဟ် သီုကဵုလွဟ်မကမ်တံဂှ်ရ ဖျေံဏာလာပ် ညးမွဲသြန် ၂၀ ကိုတ် KNU သ္ဂးရ။
တုဲပၠန် ဒၟာနူဟိုတ်ပရူပရာနာနာသာ် ညးဒးဒုၚ်စကာလဝ် လုပ်ယိုက်ဝန်ပၞာန်ဟၟဲကဵုဗဗွဲဓဝ်တံ နကဵုကောန်ပၞာန် ဒပ်ကဝ်မယှေန်ပၞာန် ဒၞာဲဂကောံပၠန်ဂတး ကြပ်ကဵုဇကုတံဂှ် နဲလဵုဒှ်ဒှ်ညံၚ်ဂွံကၠုၚ်ဖျေံလွဟ်အိုတ်ညိ KNU ဗတိုက်ဖအောဝ်လဝ်ရ။
ဗီုဂှ်ကီု လပါ်ကဝ်မယှေန်ပၞာန်ဂှ်လေဝ် ကောန်သ္ဂံၚ် PDF နူပွိုၚ်ဍုၚ် ကအ်ကြိက် ၅ တၠ သီုကဵုလွဟ်မကမ် ကၠုၚ်ဖျေံလဝ်လွဟ်နွံရောၚ် ပ္ဍဲဂျာန်နဝါရဳ ၁၄ ဂှ် ပတိတ်လိက်လလောၚ်တြးရ။
ကောန်သ္ဂံၚ် PDF ၅ တၠ ဖျေံလွဟ်သီုကဵုလွဟ်မကမ်တံဂှ် ကဝ်မယှေန်ပၞာန် ဖျေံလာပ်သြန် ၁၅၄ ကိုတ်ဒကေဝ် ကဵုဒုၚ်ဝန်ထပက်စၟတ်တဲတုဲ ကလေၚ်ပအပ်ကဵုလဝ်မိမဆေင်စပ်တံရဂှ် တြးလဝ်ဝါဒကီုရ။
ပရိုၚ်-သြၚ်လောန်တိုၚ်မ်
ဗီုရုပ်-KNU