နေပျဳတဝ် ၊ ဂျာန်နဝါရဳ ၁၆
ပ္ဍဲကဵုဒပ်ပၞာန်သ္ကိုပ်သ္ကကၠောန်လဝ် ပေါဲရုဲမာဲဏံအရာကၠးမးဟၟဲမံၚ် စပ်ကဵုပရေၚ်ကိစ္စမာဲဒစးဒုၚ်ဂှ် ညံၚ်ဂွံစၟဳစၟတ်ကဵုညိ ဗော်ပရေၚ်ဍုၚ် ကွာန် ၃ ဗော်အာတ်မိက်လဝ်ကီုလေဝ် ပေါဲရုဲမာဲဏံဓဝ်ယာမံၚ်ရောၚ် က္ဍိုပ်သ္ကိုပ်ပၞာန် ဂအုပ်သ္ကိုပ်ပၞာန်ဇၞော် မေန်အံၚ်လှိုၚ် ဟီုပတိတ်လဝ်ရ။
ပေါဲရုဲမာဲၜိုတ်ကၠောန်လဝ်တုဲကၠုၚ်ဏံ နွံကဵုသၠးပွးဓဝ်ယာတုဲ သီုညးဖအိုတ်ဒုၚ်တဲတုဲ ဂါံကွာ်အာမံၚ်လ္တူဂၠံၚ်တရဴ ဒဳမဝ်ကရေသဳရောၚ် ပ္ဍဲကဵုဂျာန်နဝါရဳ ၁၃ က္ဍိုပ်သ္ကိုပ်ပၞာန် ဟီုဂလာန် ပံက်လဝ်အခန်ကၞာ ဖိုရမ်သၟတ်ပရေၚ်ၜိုတ်လလမ်ရ။
ပ္ဍဲဒဳဇြမ်ပါ ၂၈ ကၠောန်လဝ်ပေါဲရုဲမာဲသ္ကုတ် ၁ တုဲ စပ်ကဵုပရေၚ်ကိစ္စ မာဲဒစးဒုၚ်တံဂှ် ပရေၚ်ကၠးမးဟၟဲပုဟ် ဗော်ညးဍုၚ်ကွာန်၊ ဗော်ကၠဗုကဵု ဗော် “မြန်မာနိုင်ငံတောင်သူလယ်သမား ဖွံ့ဖြိုးတိုးတက်ရေးပါတီ” တံ တေင်စိုပ်ပလံၚ်ဏာလိက် ဇရေၚ်က္ဍိုပ်သ္ကိုပ်ပၞာန်ရ။
စပ်ကဵုပရေၚ်မာဲဒစးဒုၚ်တံတုဲ နကဵုလၟေၚ်ပရေၚ်ကမၠောန် ဗွဲမစှ်ေသဘဴသၞောတ် ကၠးကၠးမးမး ရေၚ်တၠုၚ်ကဵုလဝ်ရောၚ် ကဝ်မယှေန်ပေါဲရုဲမာဲကၟိန်ဍုၚ်လလောၚ်တြးတုဲ ပ္ဍဲကဵုဂျာန်နဝါရဳ ၆ ဂှ် ဆဵုဂဗလဝ်ကဵု ဗော်ပရေၚ်ဍုၚ်ကွာန်တံရ။
ကိစ္စမာဲဒစးဒုၚ်ဂှ် ကၠောန်လဝ်ကဵုကၠးကၠးမးမးနွံတုဲ ပေါဲရုဲမာဲသ္ကုတ် ၂ လေဝ် ကၠောန်ကဵုအတိုၚ်ဂှ်ပၠန်ရောၚ် ကဝ်မယှေန်ပေါဲရုဲမာဲကၟိန်ဍုၚ် ဟီုလဝ်ကဵုဗော်ပရေၚ်ဍုၚ်ကွာန်တံရ။
ပ္ဍဲကဵုဗက်ကံက်စုတ်မာဲဒစးဒုၚ်တံဂှ် နူကဵုဗော်ပျဳခိုၚ်ဖျိုဝ် ဂွံအခေါၚ်ဗက်အာမွဲကရောံကီု၊ ဇုက်ပရေၚ်ဂီုကၠီုမာဲဒစးဒုၚ်ဂှ် ဇုက်အတိုၚ်စၟတ်လဝ် ဟွံသေၚ်ဒှ်မံၚ်ကီု၊ လက်ကြဴမာဲဒစးဒုၚ်တံဂှ် စၟတ်တဲဥက္ကဌကဝ်မယှေန် အရာပ်/ကွာန်တံဟွံပါလဝ်၊ ဒၞာဲဒးခရက်စုတ်မာဲဂှ်ပၠန် ညံၚ်ကဵုမၞိဟ်မွဲတၠဓဝ်ဟေၚ် ခရက်ချူကေတ်လဝ်ရောၚ် ဒးခယျမံၚ် မဒှ်ရ။
စပ်ကဵုအကာဲအရာမာဲဒစးဒုၚ်ဂှ် ရံၚ်အာမ္ဂး အလံၚ်အမာတ် ဗော်ပျဳခိုၚ်ဖျိုဝ်တံရ ပ္ဍဲဇၟာပ်ဒၞာဲဂွံပဵုနူကဵု အလံၚ်အမာတ် ဗော်တၞဟ်ဟ်တံတုဲ ပ္ဍဲဇၟာပ်ပွိုၚ်ဍုၚ်သီုဖအိုတ်တံဂှ် ဗော်ပျဳခိုၚ်ဖျိုဝ်ဂွံဂၠိုၚ်အိုတ်ရောၚ် ဂွံဆဵုလဝ် ပ္ဍဲကဵုလိက်ဒုၚ်စဳရေၚ်အကာဲအရာသ္ၚဳဂၠိပ် ပေါဲရုဲမာဲသ္ကုတ် ၁ Data For Myanmar ချူထမံက်လဝ်ဂှ်ရ။
ပရေၚ်သၠးပွဓဝ်ယာပေါဲရုဲမာဲဂှ် ကၠောန်အာသီုပိသ္ကုတ်တုဲမှ ညံၚ်ဂွံပါ်ပါဲအာ၊ ဟိုတ်နူပေါဲရုဲမာဲဒပ်ပၞာန်ကၠောန်ဂှ် ညံၚ်ဂွံဒှ်ပရေၚ်ဓဝ်ယာသၠးပွး ဒုၚ်လျိုၚ်ရောၚ် ပ္ဍဲကဵုတ္ၚဲကၠောန်ပေါဲရုဲမာဲသ္ကုတ် ၁ ဂှ် က္ဍိုပ်သ္ကိုပ်ပၞာန် ဟီုလဝ်ကဵုမဳဒဳယာတံရ။
ပေါဲရုဲမာဲသ္ကုတ် ၁ ကၠောန်လဝ် ၁၀၂ ပွိုၚ်ဍုၚ် ဂအုံဂကောံကွာန် ၅၆၀၀ နွံမံၚ်ဂှ် ကၠောန်လဝ် ၄၂၀၀ ပြၚ် ညးအခေါၚ်ကဵုမာဲနွံ ၁၁ ဒသမ ၆ ပြကောတိကိုတ်ဂှ် မၞိဟ် ၆ ပြကောတိကိုတ်ပြၚ် ကဵုလဝ်မာဲ၊ ညးကဵုလဝ်မာဲနွံ ၅၂% ပြၚ်မံၚ်ရဂှ် Data For Myanmar ချူလဝ်ရ။
နကဵုကၟိန်သ္ၚိဌာန်သၞာဲဒါ ညးယိုက်ဝန်အလဵုအသဳတံ ညံၚ်ဂွံစုတ်မာဲ၊ ယဝ်ရဟွံစုတ်မာဲမ္ဂး တၚ်ယုတ်ဒေက် ပရေၚ်ကဆံၚ်တာလျိုၚ်နွံမာန် ဂွိၚ်တုဲဒးစုတ်မာဲဂှ်လေဝ်နွံ ပ္ဍဲကွာန်ဒေသလ္ၚဵုတံဂှ် ညးဍုၚ်ကွာန်တံ ညံၚ်ဂွံအာကဵုမာဲ သ္ကိုပ်အုပ်ဓုပ်တံ ကဵုမံၚ်ဇြဟတ်ဟရိုဟ်အတေၚ်ရ။
တုဲပၠန် ညးဒးပါဲမံၚ်ဘဲပၞာန်တံကီု ညးဍုၚ်ကွာန် ကွာန်ရးတံကီု ဖေက်မိတ်လီုကဵုသ္ကိုပ်အုပ်ဓုပ်တံကီု ဟွံဖေက်မိတ်သဟာဲလီုကီုလေဝ် ဖေက်ပြဿနာတၞဟ်ဟ်တောဲဆက်ဗက်ကၠုၚ် ဂွိၚ်တုဲဗီုလဵုဒှ်ဒှ် အာစုတ်လဝ်မာဲနွံမံၚ် သ္ဂးရ။
ဟိုတ်နူဇြဟတ်ဟရိုဟ် သ္ကိုပ်အုပ်ဓုပ်တံဂှ် အကာဲအရာပရေၚ်စုတ်မာဲ မွဲဒၞာဲကဵုမွဲဒၞာဲဗက်ကဵုပွိုၚ်ဍုၚ်မ္ဂး တၞဟ်ခြာမံၚ်နွံကီု နကဵုဆန္ဒဇကုဗော်ဇကုနွံပၟိက်ဂှ် အာစုတ်မာဲလေဝ်နွံမံၚ်ကီုရောၚ် ပ္ဍဲလိက်ဒုၚ်စဳရေၚ် Data For Myanmar ချူလဝ်ရ။
မွဲလပါ်ပၠန် အတိုၚ်ကဝ်မယှေန်ပၞာန်ချူခၞံလဝ် သၞောဝ်ဥပဒေစဵုဒၞာပေါဲရုဲမာဲဂှ် စောဲစပ်လဝ်ပလီုပေါဲရုဲမာဲဂးတုဲ ရပ်လဝ်မၞိဟ်ကြပ် ၃၄၀ တၠတံတုဲ ပံက်အမှုကေတ်လဝ်အရေဝ်ရ။
ပရိုၚ်-သြၚ်လောန်တိုၚ်မ်
Photo – MOI